ຈົ່ງມີສະຕິຕໍ່ໂຄສະນາການລົງທຶນແບບຫຼອກລວງ

ໂດຍ: ລູກເມືອງພວນ

ຍຸກນີ້ ເປັນຍຸກຂໍ້ມູນຂ່າວສານ ແລະ ເທັກໂນໂລຊີ ທີ່ບໍ່ມີພົມແດນ, ແອັບ, ເພຈຕ່າງໆ ໄດ້ກາຍເປັນເຄື່ອງມືຊ່ວຍໃຫ້ຜູ້ຄົນມີຄວາມສະດວກສະບາຍຂຶ້ນນັບມື້, ໂດຍສະເພາະ ແມ່ນສື່ສັງຄົມອອນລາຍ ໄດ້ກາຍເປັນເຄື່ອງມືທີ່ບໍ່ສາມາດຂາດໄດ້ຂອງຄົນໃນຍຸກນີ້.

ຈຸດປະສົງຂອງການນຳໃຊ້ສື່ ໃຊ້ເພຈ ແລະ ແອັບຕ່າງໆຂອງແຕ່ລະຄົນກໍມີຈຸດສົງເປົ້າໝາຍທີ່ແຕກຕ່າງກັນອອກໄປ. ມີບາງຄົນກໍໃຊ້ເພື່ອຕິດຕາມຂ່າວຄາວດ້ານຕ່າງໆ ເພື່ອຄວາມຮູ້, ຄວາມເຂົ້າໃຈ, ບາງຄົນກໍໃຊ້ໄປໃນແງ່ບັນເທີງ, ກິລາ ແລະ ຄວາມມ່ວນຊື່ນ, ບາງຄົນກໍນຳໃຊ້ເພື່ອຈຸດປະສົງ ແລະ ເປົ້າໝາຍເພື່ອທຸລະກິດທັງທາງດີ ແລະ ທາງຮ້າຍ. ໜັກໄປກວ່ານັ້ນ, ມີບາງຄົນ, ບາງກຸ່ມຄົນ ຍັງໃຊ້ສື່ສັງຄົມອອນລາຍໄປໃນທາງທີ່ບໍ່ຖືກຕ້ອງ ຫຼື ຜິດກົດໝາຍເຊັ່ນ: ປ່ອຍຂ່າວເພື່ອສ້າງຄວາມປັ່ນປ່ວນ, ສ້າງຄວາມບໍ່ສະຫງົບໃນສັງຄົມ, ສ້າງຄວາມແຕກແຍກໃນຊາດ ແລະ ໃນໝູ່ປະຊາຊົນ, ຕົວະຍົວະ, ຕົວະຕົ້ມ, ຫຼອກລວງ, ສໍ້ໂກງ ຕົ້ມຕຸ່ນ…

ພິເສດໃນໄລຍະນີ້ ປະກົດວ່າມີສື່ສັງຄົມອອກລາຍ, ຫຼາຍເພຈ, ແອັບຕ່າງໆ ໄດ້ຕົວະຕົ້ມຫຼອກລວງ ຄົນທີ່ບໍ່ຮູ້ເທົ່າເຖິງການໃຫ້ຫຼົງເຊື່ອ ເພື່ອຫຼອກເອົາເງິນ, ເອົາຊັບສິນ ທີ່ມີມູນຄ່າຫຼາຍຮ້ອຍ ຫລາຍພັນລ້ານກີບ.  ໂດຍເພຈ ຫລື ແອັບເຫຼົ່ານັ້ນ ໃຊ້ວິທີຊັກຊວນໃຫ້ຄົນເຂົ້າຮ່ວມລົງທຶນແລ້ວແບ່ງຜົນກຳໄລ. ໃນເບື້ອງຕົ້ນກໍແບ່ງປັນຜົນກຳໄລໃຫ້ພໍຄື ເພື່ອໃຫ້ຜູ້ຮ່ວມລົງທຶນມີຄວາມເຊື່ອໝັ້ນ ຕາຍໃຈ, ເມື່ອດົນໆໄປ ເມື່ອໄດ້ເງິນຫຼາຍແດ່ແລ້ວກໍປິດເພຈຫອບເອົາເງິນໜີໄປໂດຍບໍ່ຮູ້ຮ່ອງຮອຍ. ຊຶ່ງບັນຫາດັ່ງກ່າວເຄີຍພົບເຫັນຫຼາຍກໍລະນີເກີດຂຶ້ນຕົວຈິງໃນສັງຄົມມາແລ້ວເຊັ່ນ: ບໍລິສັດ PS ຊຶ່ງຫຼາຍຄົນຄົງຈະຮູ້ດີ ຫວ່າງ 3-4 ປີຫຼັງມານິີ້, ໄດ້ຕົວະຕົ້ມໃຫ້ຄົນຂົນເອົາເງິນເຂົ້າໄປລົງທຶນຮ່ວມ ໃນລັກສະນະທຸລະກິດຕ່ອງໂສ້, ໃນທີ່ສຸດກໍໄປບໍ່ລອດ, ເຮັດໃຫ້ຫຼາຍຮ້ອຍ, ຫຼາຍພັນຄົນ ທີ່ຖືກເສຍເງິນໄປລ້າໆ ຕັ້ງຫຼາຍຮ້ອຍລ້ານກີບ.

ເມື່ອຕົ້ນເດືອນ ກຸມພາ 2021 ນີ້ເອງ ກໍມີແອັບໜຶ່ງທີ່ມີຊື່ວ່າ: “HSBC Wealth” ໄດ້ຊັກຊວນໃຫ້ຜູ້ຄົນເຂົ້າຮ່ວມລົງທຶນຖືຮຸ້ນ ເປັນຈຳນວນຫຼວງຫຼາຍ, ຕາມຕົວເລກທີ່ທາງເຈົ້າໜ້າທີ່ກ່ຽວຂ້ອງເກັບກຳໄດ້ ມີປະມານຫຼາຍກວ່າ 1000 ຄົນຫຼົງເຊື່ອເຂົ້າຮ່ວມລົງທຶນ, ເມື່ອເຫັນວ່າມີຄົນເຂົ້າຮ່ວມລົງທຶນຫຼາຍແລ້ວ ແລະ ມີມູນຄ່າສູງເຖິງຫຼັກຕື້ກີບ ແລ້ວ ເພຈ ດັ່ງກ່າວ ກໍໄດ້ປິດເພຈ, ແລ້ວ ອູ້ມເອົາເງິນໜີໄປ ໂດຍບໍ່ຮູ້ວີ່ແວວ ມີມູນຄ່າເສຍຫາຍຫລາຍຕື້ກີບ.

ອັນນີ້ເປັນພຽງສອງຕົວຢ່າງເທົ່ານັ້ນທີ່ຍົກໃຫ້ເຫັນ, ແຕ່ໃນຄວາມເປັນຈິງແລ້ວ ບັນຫາທີ່ເກີດຂຶ້ນໃນລັກສະນະນີ້ ແມ່ນມີຫຼາຍກວ່ານີ້ ຊຶ່ງພວກເຮົາບໍ່ສາມາດທີ່ຈະຍົກໃຫ້ເຫັນຢູ່ໃນທີ່ນີ້ໄດ້ທັງໝົດ.

ຈາກປາກົດການດັ່ງກ່າວ ນັບມື້ແຜ່ລາມໄປຢ່າງກວ້າງຂວາງໃນສັງຄົມລາວທຸກວັນນີ້, ຈຶ່ງຮຽກຮ້ອງໃຫ້ທຸກຄົນທີ່ ຫຼິ້ນເຟສ, ຫຼິ້ນແອັບຕ່າງໆ ເມື່ອເຫັນການຊັກຊວນໃຫ້ເຂົ້າຮ່ວມລົງທຶນທຸລະກິດ ຫຼື ແມ່ນແຕ່ການຊື້ສິ່ງຂອງທາງອອນລາຍ ກໍໃຫ້ມີຄວາມລະມັດລະວັງ, ພິຈາລະນາ ຕຶກຕອງໃຫ້ຖີ່ຖ້ວນ ແລະ ໂດຍສະເພາະຕ້ອງຮູ້ເພຈນັ້ນ, ແອັບນັ້ນວ່າມັນມີຕົວຕົນແທ້ ຫຼື ບໍ່, ຢ່າຟ້າວເຮັດຫູເບົາໃຈງ່າຍ ເຊື່ອຟັງງ່າຍ ໂດຍບໍ່ຮູ້ເທົ່າເຖິງການກໍຈະເສຍເງິນຄຳ, ຊັບສິນໄປລ້າໆ ດັ່ງຫຼາຍກໍລະນີທີ່ຍົກມາໃຫ້ເຫັນມາແລ້ວ. ຖ້າບໍ່ດັ່ງນັ້ນກໍຈະຕົກເປັນເຫຍື່ອຢ່າງງ່າຍດາຍ ແລະ ເສຍເງິນຊັບສິນໄປຊື່ໆ.