ເສດຖະກິດຍີ່ປຸ່ນຫລຸດລົງ 4,8% ໃນປີ 2020 ຜົນຈາກວິກິດໂຄວິດ-19
ທາງການຍີ່ປຸ່ນເປີດເຜີຍຕົວເລກລວມຍອດຜະລິດຕະພັນພາຍໃນ (GDP) ປະຈຳປີ 2020 ເຖິງວ່າຈະຂະຫຍາຍຕົວໃນໄຕມາດ 4, ແຕ່ຜົນກະທົບຈາກໂຄວິດ-19 ກໍບໍ່ອາດຊ່ວຍໃຫ້ເສດຖະກິດຫລຸດພົ້ນຈາກສະພາບຕິດລົບໃນພາບລວມໝົດປີໄດ້.
ໃນໄລຍະເດືອນຕຸລາຫາເດືອນທັນວາປີຜ່ານມາ, ເສດຖະກິດຍີ່ປຸ່ນຍັງເຕີບໃຫຍ່ຕໍ່ເນື່ອງໃນລະດັບ 3% ເມື່ອທຽບໃສ່ໄລຍະເວລາດຽວກັນຂອງປີ 2019, ແຕ່ເປັນອັດຕາທີ່ຊ້າລົງຈາກໄຕມາດທີ 3 ທີ່ຂະຫຍາຍຕົວ 5,3%.
ສ່ວນໃນພາບລວມໝົດປີ 2020 ນັ້ນ GDP ຂອງຍີ່ປຸ່ນທີ່ມີຂະໜາດໃຫຍ່ເປັນອັນດັບ 3 ຂອງໂລກ ຫລຸດລົງ 4,8% ເຊິ່ງຖືເປັນການຕິດລົບຄັ້ງທຳອິດນັບແຕ່ປີ 2009 ເມື່ອຄັ້ງເກີດວິກິດການເງິນທົ່ວໂລກ.
ທັງນີ້, ເສດຖະກິດຍີ່ປຸ່ນຫລຸດລົງລາຍໄຕມາດຄັ້ງຮຸນແຮງທີ່ສຸດນັບແຕ່ຍຸກຫລັງສົງຄາມໂລກຄັ້ງທີ 2 ໃນໄຕມາດທີ 2 (ເມສາ-ມິຖຸນາ) ຂອງປີ 2020 ຈາກຜົນຂອງວິກິດໂຄວິດ-19 ທີ່ສົ່ງຜົນກະທົບຕໍ່ຂະແໜງບໍລິໂພກ ແລະ ສົ່ງອອກ ເຊິ່ງເປັນພະລັງຂັບເຄື່ອນເສດຖະກິດສຳຄັນຂອງຍີ່ປຸ່ນ.
ເຖິງຢ່າງໃດກໍຕາມ, ຂະແໜງບໍລິໂພກ ແລະ ສົ່ງອອກສົ່ງສັນຍານຟື້ນຕົວໃນຊ່ວງເຄິ່ງຫລັງຂອງປີຜ່ານມາ ໂດຍການບໍລິໂພກພາກເອກະຊົນຂະຫຍາຍຕົວ 5,1% ໃນໄຕມາດທີ 3 ກ່ອນຈະຊ້າລົງມາເຫລືອ 2,2% ໃນໄຕມາດ 4.
ນອກຈາກນີ້, ຜົນຈາກການເສດຖະກິດທົ່ວໂລກເລີ່ມຟື້ນຕົວ ຍັງຊ່ວຍກະຕຸ້ນຂະແໜງການສົ່ງອອກຂອງທຸລະກິດຍີ່ປຸ່ນໃຫ້ຂະຫຍາຍຕົວດີຂຶ້ນໃນຊ່ວງເຄິ່ງປີຫລັງຂອງປີ 2020.
ເຖິງຢ່າງໃດກໍຕາມ, ນັກວິເຄາະເຕືອນວ່າ: ການເຕີບໃຫຍ່ຂອງຍີ່ປຸ່ນຍັງຢູ່ໃນສະພາບບອບບາງ ແລະ ອາດຖືກບັນທອນອີກຈາກມາດຕະການລັອກດາວ ເນື່ອງຈາກການລະບາດຂອງໂຄວິດ-19 ຮອບໃໝ່.
