ປຶກສາຫາລືກຽມພ້ອມດໍາເນີນການຜະລິດໄມ້ເພື່ອໃຫ້ໄດ້ໂຮງງານມາດຕະຖານ

ໃນວັນທີ 12 ກຸມພາ 2021 ກຸ່ມບໍລິສັດ ອຸດສາຫະກໍາເຟີນີເຈີລາວ ຈໍາກັດ ເຂດອຸດສາຫະກໍາ ນະຄອນຫລວງວຽງຈັນ, ໄດ້ຈັດກອງປະຊຸມ ຄະນະກໍາມະການຊີ້ນໍາໂຄງການສ້າງຕັ້ງໂຮງ ງານຕົວແບບ ແລະ ເຄືອຂ່າຍການຜະລິດປຸງແຕ່ງໄມ້ຄັ້ງທີ 3 ໂດຍການເປັນປະທານຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງ ອຸດສາຫະກຳ ແລະ ການຄ້າ, ມີຫົວໜ້າກົມ, ຮອງກົມ ແລະ ພາກທຸລະກິດກ່ຽວຂ້ອງ ເຂົ້າຮ່ວມ.

ທ່ານ ສົມຈິດ ອິນທະມິດ ກ່າວວ່າ: ລັດຖະບານ ເຫັນຄວາມສໍາຄັນໃນການຜະລິດ ແລະ ປຸງແຕ່ງອຸດສາຫະກຳໄມ້ ເພື່ອຫລຸດຜ່ອນການສົ່ງອອກໄມ້ບໍ່ທັນແປຮູບ ຫັນມາແປຮູບແລ້ວຈໍາໜ່າຍພາຍໃນ ແລະ ສົ່ງອອກ. ກອງປະຊຸມຄັ້ງນີ້, ເພື່ອຮັບຟັງການລາຍງານການຈັດຕັ້ງປະຕິບັດວຽກງານໂຄງ ການສ້າງຕັ້ງໂຮງງານຕົວແບບ ແລະ ເຄືອຂ່າຍການຜະລິດປຸງແຕ່ງໄມ້ ສົກປີ 2017-2020 ເຖິງຂໍ້ສະດວກ, ຂໍ້ຫຍຸ້ງຍາກ ແລະ ກຽມຄວາມພ້ອມ ໃນການດໍາເນີນການຜະລິດ ເພື່ອໃຫ້ໄດ້ໂຮງງານທີ່ໄດ້ມາດຕະຖານ ນໍາໃຊ້ໄມ້ທີ່ໄດ້ຮັບອະນຸຍາດຂຸດຄົ້ນ ແລະ ໄມ້ປູກ ເຂົ້າໃນການຜະລິດເປັນຜະລິດຕະພັນ ສໍາເລັດຮູບ ເພື່ອຈໍາໜ່າຍພາຍໃນ ແລະ ສົ່ງອອກ. ການສ້າງຕັ້ງໂຮງງານຕົວແບບ ບໍ່ໝາຍສະເພາະແຕ່ຕົວແບບໃນດ້ານການຜະລິດເທົ່ານັ້ນ ຕ້ອງສ້າງໃຫ້ໄດ້ຕົວແບບໃນການດໍາເນີນທຸລະກິດໃຫ້ໄປຕາມລະບຽບກົດໝາຍ. ນອກຈາກນັ້ນ, ກໍແມ່ນວຽກງານການຈັດຕັ້ງຄຸ້ມຄອງ ເຮົາຢາກສົ່ງເສີມຍີ່ຫໍ້ຂອງລາວ, ສໍາຄັນແມ່ນຈະເຮັດແນວໃດ ໃຫ້ນໍາໃຊ້ໄມ້ເກີດປະໂຫຍດສູງສຸດ ໂດຍສະເພາະແມ່ນເບິ່ງຕະຫລາດພາຍໃນ ແລະ ຕະຫລາດຕ່າງປະເທດ, ສໍາຄັນທີ່ສຸດແມ່ນການສ້າງເຄືຶອຂ່າຍ ເພື່ອສ້າງຄວາມຢຶນຍົງ ໂດຍສະເພາະແມ່ນການແບ່ງງານ ການສະໜັບສະໜູນເຊິ່ງກັນ ແລະ ກັນ, ແບ່ງປັນວັດຖຸດິບນໍາກັນ.

ທ່ານ ທອງສະຫວັນ ສຸລິຍະມາດ ປະທານກຸ່ມບໍລິສັດອຸດສາຫະກຳ ເຟີນີເຈີລາວ ຈໍາກັດ ກ່າວວ່າ: ໂຄງການສ້າງຕັ້ງໂຮງງານຕົວແບບ ກໍເພື່ອຜັນຂະຫຍາຍຄໍາສັ່ງເລກທີ 15/ນຍ, ເພື່ອແກ້ໄຂຜົນກະທົບຈາກການຫ້າມສົ່ງອອກໄມ້ທ່ອນ, ໄມ້ເລື່ອຍແປຮູບ , ໄມ້ເຄິ່ງສໍາເລັດຮູບ, ປະກອບສ່ວນເຂົ້າໃນການຊຸກຍູ້ການຜະລິດພາຍໃນໃຫ້ເຕີບໃຫຍ່ຂະຫຍາຍຕົວ; ສ້າງໂຮງງານໃຫ້ກາຍເປັນສູນຝືກອົບຮົມ ແລະ ພັດທະນາອຸດສາຫະກຳໄມ້ ໃຫ້ກາຍເປັນບ່ອນຝືກງານ, ຖ່າຍທອດຄວາມຮູ້ ແລະ ເຕັກໂນໂລຊີໃນການປຸງແຕ່ງໄມ້ ຖ່າຍທອດພາກປະຕິບັດຕົວຈິງທີ່ດີເລີດ ການເຄື່ອນໄຫວດໍາເນີນທຸລະກິດການຜະ ລິດ ແລະ ການຕະຫລາດ ສົ່ງເສີມການຈັດຕັ້ງເຄືອຂ່າຍ ການຜະລິດອຸດສາຫະກຳໄມ້ ທີ່ຫລາກຫລາຍຜະລິດຕະພັນໄມ້. ສໍາລັບຕະຫລາດພາຍໃນ ແມ່ນບັນດາຮ້ານຄ້າໃນທົ່ວປະເທດ, ສ່ວນຕະຫລາດຕ່າງປະເທດ ແມ່ນເນັ້ນປະເທດໄທ, ສ.ເກົາຫລີ, ຈີນ, ຢີ່ປຸ່ນ, ຣັດເຊຍ, ເອີລົບ ແລະ ອື່ນໆ.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ພ້ອມກັນປະກອບຄໍາເຫັນ ເພື່ອເຮັດໃຫ້ຮ່າງແຜນດໍາເນີນງານໂຄງການສ້າງຕັ້ງໂຮງງານຕົວແບບ ແລະ ເຄືອຂ່າຍການຜະລິດປຸງແຕ່ງໄມ້ ສົກປີ 2021-2023 ມີຄວາມສົມບູນຍິ່ງຂຶ້ນ, ພ້ອມທັງໄດ້ຢ້ຽມຊົມການຜະລິດຕົວຈິງຂອງໂຮງງານ.