ນິວຊີແລນສັ່ງລັອກດາວເມືອງໂອ໊ກແລນແລ້ວ ຫລັງພົບຜູ້ຕິດເຊື້ອໃໝ່ 3 ຄົນຄັ້ງທຳອິດໃນຮອບໜຶ່ງເດືອນ
ທ່ານ ນາງ ຈາຊິນດາ ອາເດິນ ນາຍົກລັດຖະມົນຕີນິວຊີແລນ ໄດ້ອອກປະກາດຄຳສັ່ງ “ລັອກດາວ” ໂອ໊ກແລນ ເມືອງໃຫຍ່ທີ່ສຸດຂອງປະເທດເປັນໄລຍະເວລາ 3 ວັນແລ້ວ ໂດຍໃຫ້ມີຜົນນັບແຕ່ວັນທີ 14 ກຸມພາເປັນຕົ້ນໄປ ຫລັງເຊົ້າວັນທີ 14 ກຸມພາ ນິວຊີແລນໄດ້ກວດພົບຜູ້ຕິດເຊື້ອໃໝ່ຢູ່ເມືອງດັ່ງກ່າວ 3 ຄົນ ເຊິ່ງຖືເປັນການພົບຜູ້ຕິດເຊື້ອໃໝ່ຄັ້ງທຳອິດໃນຮອບໜຶ່ງເດືອນ.
ສຳລັບມາດຕະການລັອກດາວທີ່ທາງນາຍົກລັດຖະມົນຕີ ອາເດິນ ໄດ້ປະກາດອອກມາໃນຄັ້ງນີ້ ຈະມີມາດຕະການຄວາມເຂັ້ມງວດຢູ່ “ລະດັບ 3” ໂດຍໃຫ້ປະຊາຊົນ ແລະ ພົນລະເມືອງໃນໂອ໊ກແລນທຸກຄົນອາໄສຢູ່ແຕ່ໃນເຮືອນ, ຍົກເວັ້ນແຕ່ຈະມີເຫດທີ່ຕ້ອງໄປປະຕິບັດງານ ຫລື ຊື້ເຄື່ອງໃຊ້ທີ່ຈຳເປັນເທົ່ານັ້ນ.
ກ່ອນໜ້ານີ້, ນິວຊີແລນບໍ່ພົບລາຍງານຜູ້ຕິດເຊື້ອໂຄວິດ-19 ມາແຕ່ເດືອນມັງກອນຜ່ານມາ ລວມເປັນໄລຍະເວລາກວ່າໜຶ່ງເດືອນ ຈົນກະທັ້ງເຊົ້າວັນທີ 14 ກຸມພາ ມີກໍລະນີລາຍງານການກວດພົບຜູ້ຕິດເຊື້ອໃໝ່ເພີ່ມ.
ທີ່ສຳຄັນ ນິວຊີແລນຍັງໄດ້ຮັບການຈັດອັນດັບໃຫ້ເປັນປະເທດລຳດັບຕົ້ນໆຈາກດັດຊະນີ 100 ປະເທດທີ່ມີປະສິດທິພາບໃນການຄວບຄຸມການແຜ່ລະບາດຂອງໂຄວິດ-19 ໄດ້ດີທີ່ສຸດ ດ້ວຍການປິດຊາຍແດນການເດີນທາງເຂົ້າປະເທດໃນໄລຍະທີ່ໄວຣັສເລີ່ມລະບາດໃໝ່ໆ.
