ຈີນປິດສະຖານີ BBC World News ຕອບໂຕ້ ອັງກິດຖອນໃບອະນຸຍາດຊ່ອງ CGTN ຂອງຈີນ

ສະຖານີ​ຂ່າວ​ຊ່ອງ BBC World News ຂອງ​ອັງກິດ ຖືກ​ຫ້າມ​ອອກ​ອາກາດ​ຢູ່​ຈີນ ​ໂດຍ​ສຳນັກງານ​ເບິ່ງ​ແຍງ​ກິດຈະການ​ວິທະຍຸ ​ແລະ ​ໂທລະພາບ​ແຫ່ງ​ຊາດ​ຂອງ​ຈີນ ລະບຸ​ໃນ​ຖະ​ແຫລ​ງການ​ທີ່​ເຜີຍ​ແຜ່​ໃນ​ວັນ​ທີ 12 ກຸມພາ​ວ່າ: ການ​ລາຍ​ງານ​ຂ່າວ​ຂອງ BBC World News ກ່ຽວ​ກັບ​ຈີນ​ນັ້ນຜິດ​ຂໍ້​ກຳນົດວ່າ​ດ້ວຍ​ການ​ນຳ​ສະ​ເໜີ​ຂ່າວ​ຕາມ​ຄວາມ​ເປັນ​ຈິງ, ​ເປັນກາງ, ອີກ​ທັງ​ເປັນ​ບ່ອນ​ທຳ​ອິດ​ຜົນ​ປະ​ໂຫຍ​ດ​ແຫ່ງ​ຊາດ ​ແລະ ຄວາມ​ປຶກ​ແຜ່​ນທາງ​ຊາດ​ພັນ​ຂອງ​ຈີນ.

ການ​ເຄື່ອນ​ໄຫວ​ດັ່ງກ່າວ​ມີ​ຂຶ້ນໜຶ່ງ​ອາທິດ ຫລັງ​ຈີນ​ຂູ່​ວ່າ​ຈະ​ຕອບ​ໂຕ້ ​ເນື່ອງ​ຈາກ​ກໍລະນີ​ທີ່​ອັງກິດ​ຖອນ​ໃບ​ອະນຸຍາດ​ການ​ອອກ​ອາກາດ​ຂອງ​ຊ່ອງ CGTN ຂອງ​ທາງ​ການ​ຈີນ ​ໂດຍ​ອັງກິດ​ໃຫ້​ເຫ​ດຜົນ​ວ່າ ພັກ​ກອມ​ມູນິດ​ຈີນ​ຄວບ​ຄຸມ​ເນື້ອ​ໃນ​ທັງ​ໝົດ​ທີ່​ອອກ​ອາກາດ​ໃນ​ຊ່ອງ​ນັ້ນ.

ສ່ວນ BBC ອອກ​ມາ​ຕອບ​ໂຕ້​ວ່າ: “ພວກ​ເຮົາ​ຮູ້ສຶກ​ຜິດ​ຫວັງ​ທີ່​ທາງ​ການ​ຈີນ​ຕັດສິນ​ໃຈດຳ​ເນີນ​ການ​ແບບ​ນີ້, BBC ​ເປັນ​ຜູ້​ລາຍ​ງານ​ຂ່າວ​ລະຫວ່າງ​ປະ​ເທດ​ທີ່​ເຊື່ອ​ຖື​ໄດ້​ຫລາຍ​ທີ່​ສຸດ​ໃນ​ໂລກ ​ແລະ ຜ່ານ​ມາ ລາຍ​ງານ​ຂ່າວ​ຈາກ​ທົ່ວ​ໂລກ​ຢ່າງ​ຍຸຕິ​ທຳ, ​ເປັນກາງ ​ແລະ ປາສະຈາກ​ຄວາມ​ຢ້ານ ຫລື ຄວາມ​ມັກ”.

ຂະນະ​ທີ່, ທ່ານ ​ໂດ​ມິ​ນິກ ຣາບ ລັດຖະມົນຕີ​ກະຊວງ​ການ​ຕ່າງປະ​ເທດ​ອັງກິດ ລະບຸ​ວ່າ: ການ​ປິດ​ສະຖານີ BBC World News ​ນັ້ນ​ເປັນ​ການ​ຫລຸດ​ເສລີພາບ​ສື່​ທີ່​ບໍ່​ອາດ​ຍອມຮັບ​ໄດ້, ການ​ກະທຳ​ແບບ​ນີ້​ມີ​ແຕ່​ຈະ​ທຳລາຍ​ຊື່​ສຽງຂອງ​ຈີນ​ໃນ​ສາຍຕາ​ຊາວ​ໂລກ.