ລາວກຽມສະຫລອງວັນສ້າງຕັ້ງສະຫະພັນແມ່ຍິງຄົບຮອບ 62 ປີ

ເມື່ອທ້າຍອາທິດຜ່ານມານີ້, ທ່ານນາງ ບັນດິດ ປະທຸມວັນ ຮອງປະທານສູນກາງສະຫະພັນແມ່ຍິງລາວໄດ້ຖະແຫລ່ງກ່ຽວກັບການກຽມສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວຄົບຮອບ 62 ປີ (20 ກໍລະກົດ 1955-20 ກໍລະກົດ 2017) ວ່າ: ໃນທ່າມກາງບັນຍາກາດທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ພວມຕັ້ງໜ້າສະຫລຸບຕີລາຄາຄືນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ  ແລະ ກະກຽມສະຫລອງວັນຄ້າຍວັນເກີດທ່ານປະທານສຸພານຸວົງ, ວັນປ່ອຍປາ ແລະ ອະນຸລັກສັດປ່າແຫ່ງຊາດ, ສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ ແລະ ສຳລັບສະຫະພັນແມ່ຍິງລາວກໍຄືແມ່ຍິງລາວບັນດາເຜົ່າ, ນອກຈາກໄດ້ເຂົ້າຮ່ວມໃນຂະບວນການດັ່ງກ່າວຢ່າງຟົດຟື້ນແລ້ວ, ກໍໄດ້ຕັ້ງໜ້າສ້າງຜົນງານ ກໍຄືຂະບວນການຕ້ອນຮັບວັນສ້າງຕັ້ງສະຫະພັນແມ່ຍິງລາວຄົບຮອບ 62 ປີ ເພື່ອຫວນຄືນປະຫວັດມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວຂອງສະຫະພັນແມ່ຍິງລາວຕິດພັນກັບການສະຫລຸບຜົນງານການເຄື່ອນໄຫວ ແລະ ການບັນລຸຄາດໝາຍຕ່າງໆໃນໄລຍະ 1 ປີ ຜ່ານມາ.

ທ່ານຮອງປະທານສະຫະພັນແມ່ຍິງ ກ່າວວ່າ: ເພື່ອໃຫ້ການສະເຫລີມສະຫລອງວັນດັ່ງກ່າວມີບັນຍາກາດຟົດຟື້ນ, ມາຮອດປັດຈຸບັນສະຫະພັນແມ່ຍິງໃນທົ່ວປະເທດໄດ້ພ້ອມກັນກະກຽມຈັດກິດຈະກໍາຕ່າງໆ ເປັນຕົ້ນ: ຈັດສໍາມະນາ, ການຖາມ-ຕອບຄວາມຮູ້ວິທະຍາສາດ, ດ້ານກົດໝາຍ, ການຮັກສາສຸຂະພາບ, ການແຂ່ງຂັນກິລາ, ສິລະປະວັນນະຄະດີ ແລະ ອື່ນໆ, ຈັດການວາງສະແດງຮູບພາບຜົນງານການເຄື່ອນໄຫວວຽກງານທີ່ພົ້ນເດັ່ນຂອງສະຫະພັນແມ່ຍິງຢູ່ບັນດາທ້ອງຖີ່ນຕ່າງໆ ເພື່ອໃຫ້ເອື້ອຍນ້ອງແມ່ຍິງມີຄວາມເຂົ້າໃຈຕໍ່ມູນເຊື້ອ, ບົດບາດໜ້າທີ່ຂອງຕົນ ແລະ ເສີມຂະຫຍາຍມູນເຊື້ອດັ່ງກ່າວເຂົ້າໃນການດຳລົງຊິວິດໃນເງື່ອນໄຂໃໝ່, ເປັນການໂຄສະນາເຜີຍແຜ່ໃຫ້ສັງຄົມມີຄວາມຮັບຮູ້ຕື່ມຕໍ່ການພັດທະນາ ແລະ ປົກປ້ອງສິດຜົນປະໂຫຍດຂອງແມ່ຍິງ ແລະ ການສົ່ງເສີມຄວາມສະເໝີພາບຍິງ-ຊາຍໃນສັງຄົມ ແລະ ຄອບຄົວ, ພ້ອມທັງສ້າງຄວາມເຊື່ອໝັ້ນ ແລະ ຖືສຳຄັນຕໍ່ບົດບາດຂອງແມ່ຍິງໃນການເຂົ້າຮ່ວມການປະຕິບັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືການປະຕິບັດນະໂຍບາຍຂອງພັກ-ລັດຕໍ່ການພັດທະນາແມ່ຍິງ.