ໜັກກວ່າທຸກຄັ້ງ ຫຼັງສັກວັກຊີນເສຍຊີວິດ

ລາຍງານຈາກຕ່າງປະເທດ ວັນທີ 11 ກຸມພານີ້ ໃຫ້ຮູ້ວ່າ: ເຈົ້າໜ້າທີ່ສາທາລະນະສຸກ ນິວຢອກ ສະຫະລັດ ຢືນຢັນວ່າ: ຊາຍຄົນໜຶ່ງໄດ້ເສຍຊີວິດ ພາຍຫຼັງສັກວັກຊີນຕ້ານໂຄວິດ-19 ສາຍພັນໃໝ່ທີ່ ຈາຄ໊ອບ,ຈາວິດຄອນເວນສັນ ເຊັນເຕີ ໃນແມນຣັດຕັນ ເມື່ອວັນອາທິດທີ 7 ກຸມພາ ຊຶ່ງເປັນເຫດການຫຼ້າສຸດທີ່ກໍ່ຄວາມກັງວົນກ່ຽວກັບຄວາມປອດໄພຂອງວັກຊີນ.

ທ່ານ ຮາເວີດ ຊັດເຄີ ຄະນະກຳມະການສາທາລະນະສຸກ ທີ່ນິວຢອກ ຢືນຢັນ ເມື່ອວັນທີ 8 ກຸມພານີ້ວ່າ: ຜູ້ເຖົ້າຄົນໜຶ່ງ ອາຍຸ 70 ປີ ໄດ້ລົ້ມຟຸບລົງ ໃນຂະນະທີ່ກຳລັງອອກຈາກສູນສັກວັກຊີນ ເຈົ້າໜ້າທີ່ຮັກສາຄວາມປອດໄພ ແລະ ໜ່ວຍພະຍາບານ ໄດ້ໄປຢູ່ອ້ອມຂ້າງເຂົາ ພາຍຫຼັງບໍ່ເທົ່າໃດນາທີ. ເຖິງຢ່າງໃດກໍຕາມ ໃນທີ່ສຸດ ຜູ້ເຖົ້າຄົນນີ້ກໍໄປເສຍຊີວິດຢູ່ທີ່ໂຮງໝໍທ້ອງຖິ່ນແຫ່ງໜຶ່ງ ໃນເວລາຕໍ່ມາບໍ່ດົນ.

ເຖິງຢ່າງໃດກໍຕາມ, ຍັງບໍ່ທັນມີລາຍງານທີ່ຊັດເຈນວ່າ ການເສຍຊີວິດຂອງຜູ້ເຖົ້າຄົນນີ້ ແມ່ນຍ້ອນວັກຊີນຫຼືບໍ່, ຂະນະນີ້ໜ່ວຍງານທີ່ກ່ຽວຂ້ອງກຳລັງເລັ່ງສອບສວນຫາສາເຫດຢູ່.