ນາຍົກຍີ່ປຸ່ນປະກາດເລີ່ມສັກວັກຊີນທົ່ວປະເທດ ກາງອາທິດໜ້າ
ທ່ານ ໂຢຊິຮິເດະ ຊູງະ ນາຍົກລັດຖະມົນຕີຍີ່ປຸ່ນ ຢືນຢັນໃນວັນທີ 10 ກຸມພາວ່າ: ຍີ່ປຸ່ນຈະເລີ່ມສັກວັກຊີນຕ້ານໂຄວິດ-19 ໃຫ້ປະຊາຊົນນັບແຕ່ກາງອາທິດໜ້າເປັນຕົ້ນໄປ. ຂະນະທີ່ຈຳນວນຜູ້ຕິດເຊື້ອສະສົມຫລາສຸດ 407.000 ຄົນ ແລະ ມີຜູ້ເສຍຊີວິດແລ້ວ 6.507 ຄົນ ທ່າມກາງຄວາມກັງວົນກ່ຽວກັບການແຜ່ລະບາດຂອງໂຄວິດ-19 ສາຍພັນໃໝ່ຈາກອັງກິດ.
ທ່ານ ຊູງະ ກ່າວໃນກອງປະຊຸມກັບເຈົ້າໜ້າທີ່ລັດຖະບານ ແລະ ສະມາຊິກພັກລິເບີຣັລ ເດໂມເຄຣຕິກ (LDP) ວ່າ: ການແຈກຢາຍວັກຊີນຈະເລີ່ມຕາມແຜນເກົ່າ ຫລັງຈາກທ່ານເຄີຍປະກາດກ່ອນໜ້ານີ້ວ່າການສັກວັກຊີນຈະເລີ່ມຂຶ້ນໄດ້ໃນກາງເດືອນກຸມພາ.
ການຢືນຢັນດັ່ງກ່າວມີຂຶ້ນໃນໄລຍະທີ່ສະຖານະການການແຜ່ລະບາດຂອງໂຄວິດ-19 ໃນປະເທດຍັງໜ້າກັງວົນ ໂດຍໃນວັນທີ 9 ກຸມພາ ມື້ດຽວມີການຢືນຢັນກໍລະນີຜູ້ຕິດເຊື້ອໃໝ່ 1.570 ຄົນທົ່ວປະເທດ. ຂະນະທີ່ນະຄອນຫລວງໂຕກຽວພົບຜູ້ຕິດເຊື້ອໃໝ່ 412 ຄົນ ເຊິ່ງເປັນຕົວເລກທີ່ເພີ່ມຈາກ 276 ຄົນໃນມື້ກ່ອນໜ້າ ເຊິ່ງເປັນລະດັບຕໍ່າສຸດນັບແຕ່ວັນທີ 24 ພະຈິກປີຜ່ານມາ.
ກະຊວງສາທາລະນະສຸກຍີ່ປຸ່ນ ລະບຸວ່າ: ກວດພົບຜູ້ຊາຍຕິດເຊື້ອໄວຣັສໂຄວິດ-19 ສາຍພັນຈາກອັງກິດເພີ່ມ 11 ຄົນ ອາຍຸລະຫວ່າງ 20-50 ປີ ເຊິ່ງກ່ຽວຂ້ອງກັບກຸ່ມກ້ອນແຫ່ງໜຶ່ງ ໂດຍທັງໝົດບໍ່ມີປະຫວັດການເດີນທາງໄປຕ່າງປະເທດ.
