ແມ່ຊີຊາວຝຣັ່ງອາຍຸຫລາຍທີ່ສຸດໃນເອີຣົບເຊົາຈາກການຕິດເຊື້ອໂຄວິດ-19 ກຽມສະຫລອງວັນເກີດປີທີ 117
ວັນທີ 10 ກຸມພາ 2021, ຊິສເຕີອັງເດຣ ແມ່ຊີຊາວຝຣັ່ງທີ່ກວດພົບການຕິດເຊື້ອໂຄວິດ-19 ຢູ່ເມືອງຕູລົງ ທາງຕອນໃຕ້ຂອງຝຣັ່ງ ໃນເດືອນມັງກອນຜ່ານມາ ເຊົາຈາກອາການຕິດເຊື້ອແລ້ວ ຖືເປັນບຸກຄົນທີ່ມີອາຍຸຫລາຍທີ່ສຸດໃນເອີຣົບ ແລະ ຫລາຍທີ່ສຸດເປັນອັນດັບສອງຂອງໂລກ ຕໍ່ຈາກແມ່ຕູ້ ຄາເນະ ທານາກະ ຊາວຍີ່ປຸ່ນ ໂດຍ ຊິສເຕີອັງເດຣ ກຽມສະຫລອງວັນເກີດຄົບຮອບ 117 ປີ ໃນວັນທີ 11 ກຸມພານີ້.
ເຮືອນພັກ Sainte-Catherine Laboure ທີ່ ຊິສເຕີອັງເດຣ ອາໄສຢູ່ ກວດພົບຜູ້ຕິດເຊື້ອໂຄວິດ-19 81 ຄົນ ຈາກທັງໝົດ 88 ຄົນ ໃນຈຳນວນນີ້ 10 ຄົນເສຍຊີວິດແລ້ວ ໂດຍ ຊິສເຕີອັງເດຣ ເປັນຜູ້ຕິດເຊື້ອໂຄວິດ-19 ທີ່ບໍ່ສະແດງອາການຮຸນແຮງ ເຊິ່ງລາວຈະຍັງກັກຕົວ ແລະ ຫລຸດການພົບປະຜູ້ຄົນໃນໄລຍະນີ້ ເພື່ອຫລຸດຄວາມສ່ຽງຈາກໂຄວິດ-19 ທີ່ກຳລັງແຜ່ລະບາດຢ່າງຕໍ່ເນື່ອງໃນຫລາຍພື້ນທີ່ທົ່ວໂລກ.
ຫລ້າສຸດ ຝຣັ່ງມີຜູ້ຕິດເຊື້ອສະສົມແລ້ວ 3.419.210 ຄົນ, ເສຍຊີວິດ 8 ໝື່ນກວ່າຄົນ ຖືເປັນປະເທດອັນດັບທີ 6 ທີ່ມີຜູ້ຕິດເຊື້ອສະສົມຫລາຍທີ່ສຸດ.
