ສິງກະໂປ ມອບປຶ້ມອ່ານສຳລັບເດັກ 1.000 ຫົວໃຫ້ຫໍສະໝຸດແຫ່ງຊາດລາວ
ໃນວັນທີ 9 ກຸມພາ 2021 ທີ່ນະຄອນຫລວງວຽງຈັນ, ທ່ານ ນາງ ຫລຽວ ຊຸຍ ຫລິງ (Leow Siu Lin) ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ສິງກະໂປ ປະຈຳ ສປປ ລາວ ໄດ້ຕາງໜ້າໃຫ້ແກ່ຫໍສະໝຸດແຫ່ງຊາດສິງກະໂປ ມອບປຶ້ມອ່ານສຳລັບເດັກ (ສະບັບພາ ສາອັງກິດ) ຈໍານວນ 1.000 ຫົວ ໃຫ້ຫໍສະໝຸດແຫ່ງຊາດລາວ, ເຊິ່ງຕາງໜ້າຮັບ ໂດຍ ທ່ານ ນາງ ຂັນທະມາລີ ຍົງນຸວົງ ຜູ້ອຳນວນການຫໍສະໝຸດແຫ່ງຊາດ, ໂດຍມີ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ນ້ອງນັກຮຽນ ແລະ ພະນັກງານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ໂອກາດນີ້, ທ່ານ ບົວເງິນ ຊາພູວົງ ກໍໄດ້ສະແດງຄວາມຂອບອົກຂອບໃຈ ມາຍັງ ທ່ານເອກອັກຄະລັດຖະທູດສິງກະໂປ ປະຈຳລາວ ທີ່ໄດ້ໃຫ້ການສະໜັບສະໜູນຊ່ວຍເຫລືອ ຫໍສະໝຸດແຫ່ງຊາດລາວໃນຄັ້ງນີ້, ເຊິ່ງເປັນການປະກອບສ່ວນສຳຄັນ ເຂົ້າໃນການປັບປຸງທັກສະການອ່ານ ສຳລັບເດັກໃນທົ່ວປະເທດ, ປຶ້ມຈຳນວນດັ່ງກ່າວ, ແມ່ນຈະໄດ້ແຈກຍາຍໃຫ້ແກ່ຫໍສະໝຸດຈຳນວນ 10 ແຂວງ ແລະ ຈຳນວນໜຶ່ງນຳໃຊ້ສຳລັບຫໍສະໝຸດເຄື່ອນທີ່ຂອງຫໍສະໝຸດແຫ່ງຊາດລາວ.
ທ່ານ ນາງ ຫລຽວ ຊຸຍ ຫລິງ (Leow Siu Lin) ໄດ້ກ່າວວ່າ: ຂ້າພະເຈົ້າດີໃຈ ທີ່ຫໍສະໝຸດແຫ່ງຊາດສິງກະໂປ ໄດ້ມອບປຶ້ມ 1.000 ຫົວ ໃຫ້ແກ່ຫໍສະໝຸດແຫ່ງຊາດລາວ ເພື່ອປະກອບສ່ວນໃນການສົ່ງ ເສີມຄວາມຮັກໃນການອ່ານ ຂອງເດັກນ້ອຍລາວ ແລະ ສາມາດຍົກລະດັບທັກສະດ້ານພາສາອັງກິດຂອງເຂົານຳອີກ.
