ວຸດທິສະພາອາເມລິກາຈະເລີ່ມຂະບວນການສືບສວນ ທຣຳ
ວຸດທິສະພາອາເມລິກາກຽມເປີດຂະບວນການສືບສວນ ອະດີດປະທານາທິບໍດີ ໂດນັລ ທຣຳ ໃນວັນທີ 9 ກຸມພານີ້ ໃນຄວາມຜິດກໍລະນີກະຕຸ້ນກຸ່ມຜູ້ສະໜັບສະໜູນໃຫ້ກໍ່ຈະລາຈົນຢູ່ອາຄານລັດຖະສະພາ (US Capitol) ເມື່ອວັນທີ 6 ມັງກອນຜ່ານມາ.
ທຣຳ ຖືກຕັ້ງຂໍ້ຫາ “ປຸກລະດົມໃຫ້ເກີດຈະລາຈົນ” ໃນຂະນະທີ່ທ່ານປາໄສຢູ່ທຳນຽບຂາວໃນນະຄອນຫລວງວໍຊິງຕັນ ດີ.ຊີ. ເຊິ່ງເປັນເຫດໃຫ້ກຸ່ມຜູ້ສະໜັບສະໜູນບຸກເຂົ້າອາຄານລັດຖະສະພາທີ່ຢູ່ໃກ້ຄຽງ ໃນລະຫວ່າງທີ່ສະມາຊິກສະພາຜູ້ແທນລາຊະດອນ ແລະ ສະມາຊິກວຸດທິສະພາກຳລັງປະຊຸມ ເພື່ອລົງຄະແນນຮັບຮອງຜົນການເລືອກຕັ້ງຂອງຄະນະຜູ້ເລືອກຕັ້ງ (Electoral College) ໂດຍເຫດການຮຸນແຮງໃນວັນນັ້ນເຮັດໃຫ້ມີຜູ້ເສຍຊີວິດ 5 ຄົນ.
ສະມາຊິກພັກເດໂມແຄຣດໃນສະພາຄອງເກຣດ ກ່າວວ່າ: ພວກເຂົາມີຫລັກຖານຈຳນວນຫລາຍທີ່ຊີ້ຄວາມຜິດຂອງ ທຣຳ, ແຕ່ທີມກົດໝາຍຂອງ ທຣຳ ອ້າງວ່າ: ກຸ່ມຜູ້ກໍ່ຈະລາຈົນໄດ້ກະທຳການດ້ວຍຕົວຂອງພວກເຂົາເອງ. ພ້ອມທັງຕຳໜິການສືບສວນຄັ້ງນີ້ວ່າ: “ໄຮ້ສາລະ ແລະ ຜິດລັດຖະທຳມະນູນ”.
ໂດຍທີມທະນາຍຄວາມຂອງ ທຣຳ ອອກຖະແຫລງການໃນວັນທີ 8 ກຸມພາວ່າ: ການສືບສວນຄັ້ງນີ້ບໍ່ຊອມດ້ວຍລັດຖະທຳມະນູນ ເນື່ອງຈາກ ທຣຳ ສິ້ນສຸດວາລະດຳລົງຕຳແໜ່ງໄປແລ້ວ ແລະ ປັດຈຸບັນທ່ານເປັນພຽງປະຊາຊົນທຳມະດາເທົ່ານັ້ນ.
ທຣຳ ຖືເປັນປະທານາທິບໍດີຄົນທຳອິດໃນປະຫວັດສາດທີ່ຖືກສະພາຜູ້ແທນລາຊະດອນລົງມະຕິຖອດຖອນຈາກຕຳແໜ່ງ 2 ຄັ້ງໃນລະຫວ່າງທີ່ດຳລົງຕຳແໜ່ງ ໂດຍຄັ້ງທີສອງເກີດຂຶ້ນກ່ອນທີ່ທ່ານຈະພົ້ນຕຳແໜ່ງຕາມວາລະບໍ່ດົນ, ແຕ່ຖ້າ ທຣຳ ຖືກຕັດສິນວ່າຜິດແທ້ໃນວຸດທິສະພາ ອາດເຮັດໃຫ້ທ່ານຖືກຕັດສິນຫ້າມລົງສະໝັກເລືອກຕັ້ງປະທານາທິບໍດີອີກຕໍ່ໄປ. ເຖິງຢ່າງໃດກໍດີ, ການລົງຄະແນນຊີ້ຄວາມຜິດໃນສະພາສູງຕ້ອງໃຊ້ສຽງສະໜັບສະໜູນຢ່າງໜ້ອຍ 2 ໃນ 3 ຈາກຈຳນວນບ່ອນນັ່ງ ສ.ວ ທັງໝົດ 100 ຄົນ, ແຕ່ເດໂມແຄຣດມີບ່ອນນັ່ງໃນສະພາດັ່ງກ່າວພຽງ 50 ບ່ອນນັ່ງ ແລະ ມີສັນຍານພຽງໜ້ອຍດຽວວ່າຈະມີ ສ.ວ ຣີພັບລິກັນ ລົງຄະແນນເຫັນພ້ອມນຳ.
