ອີຣານວາງເງື່ອນໄຂ ຕໍ່ໄບເດັນທີ່ສະແດງທ່າທີຕໍ່ຕ້ານ
ສຳນັກຂ່າວ RT ໃຫ້ຮູ້ວ່າ ການປະກາດຂອງຜູ້ນຳໃນທຳນຽບຂາວ ມີທັດສະນະກົງກັນຂ້າມກັບຜູ້ນຳທາງຈິດວິນຍານສູງສຸດຂອງ ອີຣານ Ayatollah Ali Khamenei, ຊຶ່ງເປັນຜູ້ວາງຄຳຂາດວ່າສະຫະລັດຕ້ອງຍົກເລີກການລົງໂທດທັງໝົດ ຖ້າຢາກໃຫ້ ອີຣານ ປະຕິບັດຕາມຄຳໝັ້ນສັນຍາທີ່ລົງນາມໃນຂໍ້ຕົກລົງສາກົນ JCPOA ກ່ອນໜ້ານີ້ 6 ປີ.
ທ່ານ Khamenei ຂຽນລົງໃນທະວິດເຕີ ກ່ອນທີ່ສື່ມວນຊົນຂອງສະຫະລັດ ຈະລົງບົດປາໄສຂອງ ໄບເດັນວ່າ: “ອີຣານໄດ້ເຮັດຫລ້ອນພັນທະທັງໝົດຂອງຕົນຕາມໃນຂໍ້ຕົກລົງນິວເຄລຍປີ 2015 ຫາກບໍ່ແມ່ນສະຫະລັດ ຫຼື 3 ປະເທດໃນເອີຣົບ…ສະຫະລັດຕ້ອງຍົກເລີກທຸກຂັ້ນຕອນຂອງການລົງໂທດກ່ອນ. ຫຼັງຈາກນັ້ນ, ພວກເຮົາຈຶ່ງຈະເບີ່ງຕົນເອງຄືນ ແລະ ຈະກັບຄືນສູ່ຂໍ້ຕົກລົງ”.
ປີ 2018 ປະທານາທິບໍດີ ທຣຳ ໄດ້ຖອນຕົວອອກຈາກຂໍ້ຕົກລົງນິວເຄຣຍສາກົນ JCPOA ໂດຍລຳພັງໃຈຕົນເອງແຕ່ຝ່າຍດຽວ ພ້ອມດຽວກັນນັ້ນກໍວາງມາດຕະການລົງໂທດຕໍ່ເສດຖະກິດຂອງອີຣານ. ເພື່ອຕອບໂຕ້ກັບຄືນ ອີຣານ ກໍມ້າງຂໍ້ຕົກລົງ ແລະ ດຳເນີນການເພີ່ມຄວາມເຂັ້ມຂຸນທາດ ອູຣານີອອມ ຄືນໃໝ່.
ໃນຂະນະທີ່ຫາຫາງສຽງເລືອກຕັ້ງປະທານາທິບໍດີນັ້ນ, ໄບເດັນໄດ້ສະແດງຄວາມຫວັງຢາກໃຫ້ສະຫະລັດ ກັບຄືນສູ່ຂໍ້ຕົກລົງ JCPOA, ແຕ່ໃນເມື່ອຖືກຖາມວ່າ ອາເມລິກາຈະຜ່ອນຜັນໃຫ້ອີຣານກັບຄືນສູ່ໂຕເຈລະຈາຫຼືບໍ່, ໄບເດັນພຽງແຕ່ຕອບແບບງ່າຍດາຍວ່າ “ບໍ່”.
