ຜູ້ນຳອິນໂດເນເຊຍຮຽກຮ້ອງ G20 ເພີ່ມການຮ່ວມມືປ້ອງກັນກໍ່ການຮ້າຍ
ປະທານາທິບໍດີອິນໂດເນເຊຍຮຽກຮ້ອງກຸ່ມປະເທດສະມາຊິກ G20 ເພີ່ມການໃຫ້ຄວາມສຳຄັນກັບການປ້ອງກັນການກໍ່ການຮ້າຍ ແລະ ເຕືອນວ່າການແກ້ໄຂດ້ວຍອາວຸດໃນພາຍຫລັງມີແຕ່ຈະຍິ່ງເຮັດໃຫ້ສະຖານະການຍືດເຍື້ອ ແລະ ອາດຮຸນແຮງຂຶ້ນອີກ.
ສຳນັກຂ່າວຕ່າງປະເທດລາຍງານຈາກເມືອງຮຳບົວ ປະເທດເຢຍລະມັນ ໃນວັນທີ 8 ກໍລະກົດນີ້ວ່າ: ປະທານາທິບໍດີ ໂຈໂຄ ວິໂດໂດ ກ່າວຖະແຫລງຕໍ່ກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ (G20) ຢູ່ເມືອງຮຳບົວ ໃນວັນທີ 7 ກໍລະກົດ ຮຽກຮ້ອງໃຫ້ປະຊາຄົມໂລກເພີ່ມຄວາມເປັນເອກະພາບໃນການຜະເຊີນ ແລະ ຮັບມືກັບສະຖານະການກໍ່ການຮ້າຍທີ່ຖືເປັນໄພຄຸກຄາມຮ້າຍແຮງລະດັບໂລກ.
ທັງນີ້, ທ່ານ ວິໂດໂດ ຍົກຕົວຢ່າງມາດຕະການຂອງອິນໂດເນເຊຍທີ່ມີທັງການໃຊ້ອຳນາດອ່ອນເຊັ່ນ: ໂຄງການປັບທັດສະນະຄະຕິ ເພື່ອດັດແປງແນວຄິດຫົວຮຸນແຮງທາງສາສະໜາ ແລະ ການແກ້ໄຂບັນຫາເສດຖະກິດໂດຍມຸ່ງເນັ້ນການຫລຸດຄວາມແຕກແຍກທາງສັງຄົມ ເຊິ່ງເປັນປັດໄຈສຳຄັນເຮັດໃຫ້ບຸກຄົນເກີດຄວາມຄິດຫົວຮຸນແຮງ ຄຽງຄູ່ກັບການໃຊ້ອຳນາດແຂງ ຄືການບັງຄັບໃຊ້ກົດໝາຍຢ່າງເຂັ້ມງວດ ແລະ ການເພີ່ມການແບ່ງປັນຂໍ້ມູນດ້ານການຂ່າວກັບພັນທະມິດ.
ຜູ້ນຳອິນໂດເນເຊຍເນັ້ນວ່າ: ທຸກຝ່າຍຄວນໃຫ້ຄວາມສຳຄັນກັບມາດຕະການປ້ອງກັນ ເຊິ່ງລັດຖະບານຈາກາຕາເຊື່ອວ່າເປັນກົນລະຍຸດທີ່ມີປະສິດທິພາບໃນໄລຍະຍາວ ຫລາຍກວ່າການໃຊ້ກຳລັງທາງທະຫານ ທີ່ເປັນການແກ້ໄຂປາຍເຫດ ແລະ ມີແຕ່ຈະເຮັດໃຫ້ສະຖານະການຍືດເຍື້ອ. ປັດຈຸບັນອິນໂດເນເຊຍເປັນປະເທດທີ່ມີພົນລະເມືອງມຸດສະລິມຫລາຍທີ່ສຸດໃນໂລກ ແລະ ຕື່ນຕົວກັບສະຖານະການການກໍ່ການຮ້າຍຫລາຍຂຶ້ນ ນັບແຕ່ເກີດການສູ້ຮົບລະຫວ່າງກອງທັບຟີລິບປິນກັບກຸ່ມຫົວຮຸນແຮງແນວຮ່ວມ IS ຢູ່ເມືອງມາລາວີ ເກາະມິນດາເນົາ ເຊິ່ງເຮັດໃຫ້ມີຜູ້ເສຍຊີວິດຫລາຍກວ່າ 460 ຄົນແລ້ວ ນັບແຕ່ເດືອນພຶດສະພາຜ່ານມາ.
