G20 ຈະເພີ່ມຄວາມພະຍາຍາມ ສະກັດເງິນທຶນໝູນກໍ່ການຮ້າຍ
ຜູ້ນຳກຸ່ມປະເທດເສດຖະກິດຂະໜາດໃຫຍ່ (G20) ເຫັນພ້ອມກັນເລື່ອງຈະເພີ່ມຄວາມພະຍາຍາມເປັນ 2 ເທົ່າເພື່ອສະກັດເງິນທຶນສະໜັບສະໜູນກຸ່ມກໍ່ການຮ້າຍ.
ກອງປະຊຸມສຸດຍອດ G20 ອອກຖະແຫລງການຮ່ວມກັນໃນວັນທີ 7 ກໍລະກົດ ປະນາມຄວາມຊົ່ວຮ້າຍຂອງການໃຫ້ທຶນສະໜັບສະໜູນກໍ່ການຮ້າຍ ແລະ ຍົກຍ້ອງມາດຕະການຕ່າງໆທີ່ມີຢູ່ໃນປັດຈຸບັນ ເພື່ອສະກັດກັ້ນທຶນກໍ່ການຮ້າຍ. G20 ຈະມຸ່ງເຮັດໃຫ້ລະບົບການເງິນສາກົນເປັນປໍລປັກຢ່າງເດັດຂາດຕໍ່ການໃຫ້ທຶນກຸ່ມກໍ່ການຮ້າຍ, ຈະຮັດແໜ້ນການຮ່ວມມື ແລະ ການແລກປ່ຽນຂໍ້ມູນລະຫວ່າງກັນ, ຂໍໃຫ້ປະເທດຕ່າງໆສະໜັບສະໜູນການເຮັດວຽກຂອງຄະນະສະເພາະກິດທາງການເງິນ ເຊິ່ງເປັນອົງການ 37 ປະເທດທີ່ປາບປາມການໃຫ້ທຶນກຸ່ມກໍ່ການຮ້າຍໂດຍສະເພາະ ເພື່ອບໍ່ໃຫ້ການໃຫ້ທຶນກຸ່ມກໍ່ການຮ້າຍມີບ່ອນລີ້ຊ້ອນຢູ່ໃນໂລກນີ້.
ບັນຫານີ້ຖືເປັນເລື່ອງທີ່ G20 ມີຄວາມເຫັນກົງກັນທ່າມກາງບັນຫາທີ່ເຫັນຕ່າງ ທັງເລື່ອງການປົກປ້ອງສະພາບອາກາດ ແລະ ການຄ້າ ຈົນເຮັດໃຫ້ຫລາຍຝ່າຍຄາດວ່າກອງປະຊຸມສຸດຍອດ G20 ຢູ່ເມືອງຮຳບົວຂອງເຢຍລະມັນຄັ້ງນີ້ຈະເຜັດຮ້ອນທີ່ສຸດຄັ້ງໜຶ່ງໃນຮອບຫລາຍປີ.
