ວັກຊີນໂຄວິດເຖິງກຳປູເຈຍ ຈີນບໍລິຈາກໃຫ້ພັນທະມິດສຳຄັນ
ຖ້ຽວບິນພິເສດຂອງຈີນໄດ້ຈັດສົ່ງວັກຊີນ “ຊິໂນຟາມ” ຊຸດທຳອິດ 6 ແສນໂດສ ເຖິງນະຄອນຫລວງພະນົມເປັນແລ້ວ ເຊິ່ງຈະສັກໃຫ້ບຸກຄະລາກອນທາງການແພດ ແລະ ທະຫານເປັນກຸ່ມທຳອິດ ໂດຍໃນພິທີຮັບວັກຊີນຢູ່ສະໜາມບິນພະນົມເປັນ, ນາຍົກລັດຖະມົນຕີ ຮຸນເຊນ ໄດ້ກ່າວຂອບໃຈຈີນທີ່ບໍລິຈາກວັກຊີນໃຫ້ກຳປູເຈຍ ເຊິ່ງຖືເປັນພັນທະມິດສຳຄັນຂອງຈີນ.
ກ່ອນໜ້ານີ້, ຜູ້ນຳກຳປູເຈຍບອກວ່າ: ທ່ານຈະສັກວັກຊີນເຂັມທຳອິດ, ແຕ່ຫລ້າສຸດທ່ານບອກວ່າ: ຈະບໍ່ສັກ ເພາະອາຍຸ 68 ປີແລ້ວ ເຊິ່ງວັກຊີນສູດນີ້ເໝາະສັກໃຫ້ແກ່ຄົນອາຍຸ 18-59 ປີເທົ່ານັ້ນ, ແຕ່ທ່ານຈະກະຕຸ້ນໃຫ້ຄົນໃນຄອບຄົວທີ່ມີອາຍຸນ້ອຍ ພ້ອມເຈົ້າໜ້າທີ່ລັດຖະບານ ແລະ ນາຍທະຫານລະດັບສູງອາຍຸບໍ່ຮອດ 60 ປີ ສັກວັກຊີນໃນວັນທີ 10 ກຸມພານີ້ ເພື່ອເປັນຕົວຢ່າງໃຫ້ປະຊາຊົນ.
ລັດຖະບານຈີນບອກວ່າ: ຈະບໍລິຈາກວັກຊີນທັງໝົດ 1 ລ້ານໂດສ ໃຫ້ກຳປູເຈຍ ເພື່ອສັກໃຫ້ຊາວກຳປູເຈຍ 5 ແສນຄົນ. ຂະນະທີ່ຜູ້ນຳກຳປູເຈຍເຄີຍບອກວ່າ: ຈະຈັດຫາວັກຊີນ 20 ລ້ານໂດສ ເພື່ອສັກໃຫ້ປະຊາຊົນ 10 ລ້ານຄົນ ຫລື ປະມານ 2 ໃນ 3 ຂອງປະຊາກອນທັງໝົດ.
ກະຊວງສາທາລະນະສຸກກຳປູເຈຍ ໄດ້ອະນຸມັດນຳໃຊ້ວັກຊີນຊິໂນຟາມເປັນກໍລະນີສຸກເສີນແລ້ວ, ແຕ່ບໍ່ໄດ້ລະບຸວ່າຈະເລີ່ມສັກວັກຊີນໃຫ້ຄົນທົ່ວໄປເມື່ອໃດ. ທັງນີ້ ກຳປູເຈຍເປັນປະເທດໜຶ່ງທີ່ມີຄົນຕິດເຊື້ອໂຄວິດໜ້ອຍ ຫລື ມີຜູ້ຕິດເຊື້ອສະສົມພຽງ 474 ຄົນເທົ່ານັ້ນ ແລະ ບໍ່ມີຜູ້ເສຍຊີວິດ.
