ເປີດນຳໃຊ້ສູນວັດທະນະທໍາຈີນ ປະຈໍາລາວ ຫລັງໃໝ່

ພິທີເປີດນຳໃຊ້ ຫ້ອງການສູນວັດທະນະທໍາຈີນ ປະຈໍາ ລາວ ຫລັງໃໝ່ ຢ່າງເປັນທາງການ ແລະ ສະເຫລີມສະຫລອງ ການການຕັ້ງສູນວັດທະນະທຳຈີນ ປະຈຳລາວ ຄົບຮອບ 6 ປີ, ເຊິ່ງໄດ້ຈັດຂຶ້ນໃນວັນທີ 5 ກຸມພາ 2021. ໃຫ້ກຽດເຂົ້າຮ່ວມພິທີໂດຍ ທ່ານ ກິແກ້ວ ໄຂຄໍາພິທູນ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ຈ່ຽງຈ່າຍຕົ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ.

ໃນໂອກາດດັ່ງກ່າວ, ຫົວໜ້າສູນວັດທະນະທໍາຈີນ ປະຈຳລາວ ກ່າວວ່າ: ສູນວັດທະນະທຳຈີນ ປະຈຳລາວ ໄດ້ຮັບການສ້າງຕັ້ງມາ 6 ປີ, ຕະຫລອດໄລຍະຜ່ານມາ ໄດ້ປະກອບສ່ວນໃນການພັດທະນາ ແລກປ່ຽນວັດທະນະທໍາ ແລະ ທ່ອງທ່ຽວສອງປະເທດ ລາວ-ຈີນ ຢ່າງເລິກເຊິ່ງ ແລະ ກ້ວາງຂວາງກວ່າເກົ່າ, ເພື່ອຊ່ວຍໃຫ້ການຮ່ວມມືແລກປ່ຽນວັດທະນະທໍາ ແລະ ທ່ອງທ່ຽວລາວ-ຈີນ ໃຫ້ກ້າວສູ່ລະດັບສູງຂຶ້ນໄປ, ປີນີ້ ຄົບຮອບ 60 ປີແຫ່ງສາຍພົວພັນການທູດລາວ-ຈີນ ເຊິ່ງລັດຖະບານທັງສອງຝ່າຍ ໄດ້ປະກາດໃຫ້ປີ 2021 ເປັນປີມິດຕະພາບລາວຈີນ, ພາຍໃຕ້ການຊີ້ນໍາຂອງສະຖານທູດຈີນ, ສູນວັດທະນະທໍາຈີນ ປະຈໍາ ສປປ ລາວ ຈະຈັດທຸກກິດຈະກໍາ ຂອງປີມິດຕະພາບໃຫ້ດີທີ່ສຸດ.

ສູນວັດທະນະທໍາຈີນ ປະຈຳລາວ ຫລັງໃໝ່ ຕັ້ງຢູ່ບ້ານ ໂພສະອາດ ນະຄອນຫລວງວຽງຈັນ ຖະໜົນໄກສອນພົມວິຫານ ມີເນື້ອທີ່ 1.760 ຕາລາງແມັດ, ເປັນອາຄານສອງຊັ້ນ ມີຫ້ອງອະເນກປະສົງ ທີ່ສາມາດຈັດການສະແດງ ແລະ ກອງປະຊຸມຂະໜາດນ້ອຍ ທີ່ບັນຈຸຄົນໄດ້ 130 ຄົນ, ຫ້ອງວາງສະແດງ ທີ່ທັນສະໄໝ ເນື້ອທີ່ 220 ກວ່າຕາລາງແມັດ ທີ່ສາມາດຈັດງານວາງສະແດງ ໄດ້ຫລາກຫລາຍຮູບແບບ, ມີຫ້ອງຮຽນ, ຫ້ອງສິລະປະ, ຫ້ອງຊ້ອມຟ້ອນ ທີ່ສາມາດຈັດຫ້ອງຮຽນ ແລະ ຫ້ອງຝຶກອົບຮົມໄດ້ຫລາຍຫ້ອງພ້ອມກັນ. ນອກນີ້, ຍັງມີຫ້ອງວັດທະນະທໍາ ທີ່ເຕັມໄປດ້ວຍສີສັນ ຂອງວັດທະນະທໍາຈີນ ທີ່ສາມາດຈັດກິດຈະກໍາແລກປ່ຽນ ແລະ ວາງສະແດງສິລະປະທຸກຮູບແບບ ພ້ອມສິ່ງອໍານວຍຄວາມສະດວກທີ່ທັນສະໄໝ, ທັງນີ້ແນໃສ່ເພື່ອບັນລຸ ບົດບາດຂອງສູນວັດທະນະທໍາຈີນ ແລະ ຮັບປະກັນການພັດທະນາ ການຮ່ວມມືແລກປ່ຽນກັບທຸກຂະແໜງການ ຂອງຝ່າຍລາວໃຫ້ກວ້າງຂວາງ ແລະ ດີຂຶ້ນກວ່າເກົ່າ, ທັງເປັນການເປີດເສັ້ນທາງໃໝ່ ໃນການແລກປ່ຽນຮ່ວມມື ດ້ານວັດທະນະທໍາ ແລະ ທ່ອງທ່ຽວລາວ-ຈີນ.

ໂອກາດນີ້, ທ່ານ ກິແກວ ໄຂຄຳພິທູນ ໄດ້ຕາງໜ້າໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ມອບໃບຍ້ອງຍໍລັດຖະບານ ໃຫ້ ທ່ານ ນາງ ຕິ່ງຊິ່ງ ຫົວໜ້າສູນວັດທະນະທໍາຈີນ  ປະ ຈຳລາວ ທີ່ໄດ້ປະກອບສ່ວນເຂົ້າໃນການສ້າງຊັບພະຍາກອນມະນຸດ ແລະ ອຸປະກອນຕ່າງໆ ແກ່ ສປປ ລາວ ຖືເປັນການປະກອບສ່ວນສຳຄັນ ເຂົ້າໃນສາຍພົວພັນມິດຕະພາບລາວ-ຈີນ.