ກະຊວງອຸດສາຫະກໍາ ເເລະ ການຄ້າວາງ 3 ທິດທາງສົ່ງເສີມ ອຸດສາຫະກໍາຂະແໜງບໍ່ແຮ່ໃນ 5 ປີຕໍ່ໜ້າ
November 14, 2025 - 10:41 AM
ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ເເລະ ການຄ້າ ຕອບຄໍາຊັກຖາມ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາເເຫ່ງຊາດ ຊຸດທີ IX ໃນວັນທີ 13 ພະຈິກ 2025 ວ່າ: ທິດທາງການຫັນເປັນອຸດສາຫະກໍາ ໃນຂະແໜງອຸດສາຫະກໍາ ແລະ ການຄ້າ ໃນ 5 ປີຕໍ່ໜ້າ ແມ່ນຈະສຸມໃສ່ 3 ຂະແໜງຕົ້ນຕໍ ຄື :
- ອຸດສາຫະກໍາປຸງແຕ່ງ
- ອຸດສາຫະກໍາພະລັງງານ
- ອຸດສາຫະກໍາບໍ່ແຮ່.
ເພື່ອສົ່ງເສີມການຫັນເປັນອຸດສາຫະກໍາໃນຂະແໜງບໍ່ແຮ່, ກະຊວງຈະປະຕິບັດ 8 ຫົວຂໍ້ສໍາຄັນດັ່ງນີ້:
- ຈັດລໍາດັບຄວາມສໍາຄັນຂອງແຮ່ທາດ ທີ່ເປັນທ່າແຮງສູງສໍາລັບການພັດທະນາໂດຍອີງໃສ່ຄວາມດຶງດູດທາງການຄ້າ ແລະ ຕະຫຼາດ ແລະ ແຮ່ທາດທີ່ເປັນເປົ້າໝາຍການພັດທະນາຂອງລາວ.
- ຈໍາກັດ ຫຼື ຫ້າມການສົ່ງອອກແຮ່ດິບ ທີ່ກໍານົດເປັນແຮ່ທາດບຸລິມະສິດ ເພື່ອການປຸງແຕ່ງເປັນອຸດສາຫະກໍາແບບຕ່ອງໂສ້ເພື່ອຮັບປະກັນໃຫ້ມີວັດຖຸດິບພຽງພໍ ເພື່ອດຶງດູດການລົງທຶນຂະໜາດໃຫຍ່.
- ຄັດເລືອກ ຫຼື ປະມູນ ເອົານັກລົງທຶນທີ່ມີຄຸນນະພາບ ເພື່ອມາເປັນຄູ່ຮ່ວມຍຸດທະສາດ ພັດທະນາອຸດສາຫະກໍາແບບເປັນລະບົບຕ່ອງໂສ້ ແຕ່ຕົ້ນນໍ້າໄປຫາກາງນໍ້າ ແລະ ປາຍນໍ້າ.
- ສົ່ງເສີມການພັດທະນາອຸດສະຫະກໍາ ກາງນໍ້າ ແລະ ປາຍນໍ້າ ໂດຍສະເພາະ ແຮ່ທາດທີ່ມີປະລິມານສະສົມຫຼາຍ ເປັນຕົ້ນ: ບົກຊິດ, ເກືອໂປຕັສ, ເຫຼັກ, ຄໍາ, ທອງ ແລະ ແຮ່ທາດຫາຍາກ.
- ສົ່ງເສີມການຮ່ວມມືກັບລັດວິສາຫະກິດ ຫຼື ວິສາຫະກິດພາຍໃນ ແບບເປັນບໍລິສັດຮຸ້ນສ່ວນ ເພື່ອຜູກມັດການພັດທະນາ ແລະ ຖ່າຍທອດຄວາມຮູ້, ວິທີການ ແລະ ເຕັກໂນໂລຊີ ໃຫ້ແກ່ວິສາຫະກິດພາຍໃນ.
- ສົ່ງເສີມການພັດທະນາຊັບພະຍາກອນມະນຸດ ໂດຍສະເພາະ ໃນຂົງເຂດບໍ່ແຮ່, ຖ່າຍທອດຄວາມຮູ້, ເຕັກໂນໂລຊີ ແລະ ການຄົ້ນຄວ້າວິໄຈ ເພື່ອໃຫ້ເກີດຄັງຄວາມຮູ້ ແລະ ການພັດທະນານະວັດຕະກໍາ ໂດຍການກໍານົດເປັນເງື່ອນໄຂ ຕິດພັນກັບການໄດ້ຮັບສິດລົງທຶນ ແລະ ພັດທະນາແຮ່ທາດ ຢູ່ ສປປ ລາວ.
- ສົ່ງເສີມການນໍາໃຊ້ ແລະ ຈັດຊື້ວັດຖຸດິບ ແລະ ວັດຖຸເຄິ່ງສໍາເລັດຮູບ ເພື່ອສົ່ງເສີມວິສາຫະກິດຂະໜາດນ້ອຍ ແລະ ກາງພາຍໃນເຮັດການຜະລິດ, ຈັດຊື້ ແລະ ສະໜອງ ໃຫ້ແກ່ການຜະລິດ ຂອງໂຄງການບໍ່ແຮ່ຂະໜາດໃຫຍ່.
- ປັບປຸງນິຕິກໍາ ແລະ ບັງຄັບໃຊ້ ຫຼັກການ ແລະ ມາດຕະການທາງດ້ານສິ່ງເເວດລ້ອມ, ສັງຄົມ ເເລະ ການ ບໍລິຫານ (ESG) ເພື່ອໃຫ້ສາມາດຄຸ້ມຄອງ, ນໍາໃຊ້ ເເລະ ພັດທະນາເເຮ່ທາດ ໃຫ້ເກີດປະໂຫຍດສູງສຸດ, ຈໍາກັດຄວາມສ່ຽງ ເເລະ ຜົນກະທົບດ້ານລົບ ຕໍ່ສິ່ງເເວດລ້ອມ, ສັງຄົມ-ປະຊາຊົນ ເເລະ ປະກົດການຫຍໍ້ທໍ້ຕ່າງໆ. (ມາດຕະການເຫຼົ່ານີ້ໄດ້ຖືກກໍານົດ ໃນ 7 ຫຼັກການປະເມີນ ບໍລິສັດ ພັດທະນາບໍ່ແຮ່, ແຕ່ມີຄວາມຈໍາເປັນ ຕ້ອງປັບປຸງຕື່ມ)
