ຈີນຍົກເລີກການຫລຸດຜ່ອນພາສີຄໍາ ອາດສົ່ງຜົນໃຫ້ຕົ້ນທຶນຄໍາສູງຂຶ້ນ

ສໍານັກຂ່າວ Bloomberg ລາຍງານວັນທີ 1 ພະຈິກ 2025 – ລັດຖະບານຈີນ ໄດ້ປະກາດຍົກເລີກມາດຕະການຫລຸດຜ່ອນພາສີສຳລັບ ຄຳ ທີ່ມີມາດົນນານ, ຖືເປັນຈຸດປ່ຽນໃນຕະຫລາດຄຳໂລກ ທີ່ມີຜົນບັງຄັບໃຊ້ນັບແຕ່ວັນທີ 1 ພະຈິກ ເປັນຕົ້ນໄປ, ໂດຍຈະ ບໍ່ອະນຸຍາດ ໃຫ້ຜູ້ຄ້າຂາຍຍ່ອຍ ຫັກພາສີມູນຄ່າເພີ່ມ (VAT) ທີ່ຈ່າຍໃນການຊື້ຄຳໃນຕະຫລາດ Shanghai Gold Exchange ນຳມາຫັກອອກເມື່ອຂາຍຕໍ່ ບໍ່ວ່າຈະເປັນການຂາຍຍ່ອຍ ຫລື ຂາຍເພື່ອນໍາໄປແປຮູບ.

ມາດຕະການດັ່ງກ່າວແມ່ນເປັນໄປຕາມກົດໝາຍສະບັບໃໝ່ຂອງ ກະຊວງການເງິນແຫ່ງສາທາລະນະລັດປະຊາຊົນຈີນ ເຊິ່ງຄອບຄຸມທັງຄຳເພື່ອການລົງທຶນ ແລະ ຄຳເພື່ອການໃຊ້ງານທົ່ວໄປ.

ດ້ານນັກວິເຄາະເບິ່ງວ່າ:

• ເຖິງແມ່ນມາດຕະການນີ້ຈະສົ່ງຜົນໃຫ້ ຕົ້ນທຶນການຊື້ຄໍາຂອງຜູ້ບໍລິໂພກຈີນເພີ່ມຂຶ້ນ, ແຕ່ປັດໄຈສະໜັບສະໜູນທອງຄຳທົ່ວໂລກຍັງຄົງມີຢູ່.
• ປັດໄຈເຫລົ່ານັ້ນລວມມີ: ການຊື້ທອງໂດຍທະນາຄານກາງຫລາຍປະເທດ, ການຫລຸດອັດຕາດອກເບ້ຍຂອງສະຫະລັດ ແລະ ຄວາມບໍ່ແນ່ນອນທາງດ້ານເສດຖະກິດ-ພູມສາດການເມືອງ.

ປັດຈຸບັນ ລາຄາທອງຄຳຍັງຄົງຕົວຢູ່ໃກ້ຄຽງລະດັບ 4,000 ໂດລາສະຫະລັດຕໍ່ອອນສ໌ ແລະ ມີຜູ້ຊ່ຽວຊານຈຳນວນຫລາຍຄາດຄະເນວ່າ ລາຄາຄຳອາດຈະ “ແຕະໃກ້ 5,000 ໂດລາ/ອອນສ໌” ໃນປີໜ້າ.

ສະຫລຸບແລ້ວ ການຍົກເລີກຫັກ VAT ຂອງຈີນອາດເຮັດໃຫ້ຕົ້ນທຶນຂອງຄຳໃນຈີນສູງຂຶ້ນ ແລະ ສົ່ງຜົນຕໍ່ໂຄງສ້າງຕະຫລາດຄຳໂລກ, ໃນຂະນະທີ່ຄຳຍັງຖືກເບິ່ງວ່າເປັນຊັບສິນທີ່ປອດໄພໃນສາຍຕານັກລົງທຶນ ເຊິ່ງອາດຈະສົ່ງຜົນໃຫ້ລາຄາຄໍາຂຶ້ນໄດ້ໃນໄລຍະຍາວ.

ແຫລ່ງອ້າງອີງ: ກະຊວງການເງິນຂອງຈີນ (Ministry of Finance of China), Bloomberg, bangkokbiznews