ການເກັບມ້ຽນຂີ້ເຫຍື້ອຢູ່ເມືອງວັງວຽງຫລ້າຊ້າ – ບໍ່ທົ່ວເຖິງ ຍ້ອນພາຫະນະ ແລະ ບຸກຄະລາກອນບໍ່ພຽງພໍ

ວັນທີ 25 ຕຸລາ 2025 ທ່ານ ພຸດທະສອນ ຄໍາລື ຮອງຫ້ອງການອົງການພັດທະນາ ແລະ ບໍລິຫານຕົວເມືອງວ່າ: ໜ່ວຍງານ ອພບ ໜ້າວຽກຫລັກແມ່ນການເກັບມ້ຽນຂີ້ເຫຍື້ອໃນພາກສະໜາມ ພາຍຫລັງທີ່ລົດນໍາເອົາຂີ້ເຫຍື້ອມາແລ້ວ ກໍຕ້ອງເບິ່ງວ່າຂີ້ເຫຍື້ອນີ້ ແມ່ນຂີ້ເຫຍື້ອປະເພດ ໃດຖ້າເປັນຂີ້ເຫຍື້ອຕິດເຊື້ອກໍຕ້ອງແຍກອອກໄປຈູດໃນເຕົາເຜົາທີ່ໄດ້ມາດຕະຖານ, ສ່ວນຂີ້ເຫຍື້ອທີ່ສາມາດແຍກໄດ້ກໍເອົາໄປແຍກ ໂຕໃດທີ່ບໍ່ສາມາດນໍາໃຊ້ໄດ້ກໍເອົາໄປຖິ້ມຕາມມາດຕະຖານຂອງທາງ ອພບ ປະຕິບັດຄື ຂີ້ເຫຍື້ອທີ່ໃຊ້ບໍ່ໄດ້ເຮົາກໍຈະຖິ້ມໃສ່ຂຸມຂີ້ເຫຍື້ອ ເມື່ອດັບກິ່ນ ກໍຈະເອົາດິນຖົມ ແລະ ປູກຕົ້ນ ໄມ້ໃສ່ ເພື່ອຄວາມສວຍງາມ. ສໍາລັບການເຂົ້າເຖິງບໍລິການເກັບມ້ຽນຂີ້ເຫຍື້ອໃນປັດຈຸບັນ ເລີ່ມຕົ້ນທີ່ບໍລິສັດສໍາປະທານເລື່ອງການມ້ຽນຂີ້ເຫຍື້ອ ໃນໄລຍະທຳອິດແມ່ນ 27 ບ້ານແຕ່ໄລຍະນີ້ ແມ່ນຫລຸດລົງເຫລືອ 15 ບ້ານ ຍ້ອນວ່າ ບໍລິສັດຜູ້ຮັບເໝົາບໍ່ໄປເອົາບ່ອນທີ່ຫ່າງໄກ ແຕ່ຈະເນັ້ນຕົວເມືອງທີ່ມີລາຍຮັບສູງ. ສ່ວນເຂດທີ່ຢູ່ໄກອາດຈະບໍ່ກຸ້ມຄ່າ.

ສໍາລັບການເກັບລາຍຮັບ ແມ່ນຄອບຄົວລະ 45,000 ກີບຕໍ່ເດືອນ, ສ່ວນຫົວໜ່ວຍທຸລະກິດແມ່ນໄລ່ຕາມປະລິມານນ້ອຍ ຫລື ຫລາຍ. ຕໍ່ກັບບັນຫາຂີ້ເຫຍື້ອ ກໍຍັງມີການສ່ອງແສງມາເລື້ອຍໆທາງດ້ານການບໍລິການທີ່ບໍ່ທົ່ວເຖິງ ປະຊາຊົນກໍໄດ້ຕຳນິຕິຊົມ ສ່ອງແສງມາ ເລື່ອງການເກັບຂີ້ເຫຍື້ອທີ່ຊ້າ, ບາງເດືອນ  2 ເທື່ອ, ແຕ່ປັດຈຸບັນການເກັບຂີ້ເຫຍື້ອແມ່ນທິດໜຶ່ງ 2 ເທື່ອ, ພາກເອກະຊົນຮຽກຮ້ອງໃຫ້ເກັບ 3 ເທື່ອຕໍ່ອາທິດ ແຕ່ຜູ້ສຳປະທານບໍລິການ ບໍ່ສາມາດບໍລິການໃຫ້ປະຊາຊົນໄດ້, ຍ້ອນພາຫະນະບໍ່ພຽງພໍ ແລະ ບຸກຄະລາກອນບໍ່ພຽງພໍ.

ຕໍ່ກັບບັນຫານີ້ ທາງອົງປົກຄອງເມືອງກໍກຳລັງຫາວິທີແກ້ໄຂ ເປັນຕົ້ນການເພີ່ມລົດມ້ຽນຂີ້ເຫຍື້ອຕື່ມ ເພື່ອໃຫ້ ການບໍລິການວ່ອງໄວ, ກວ້າງຂວາງຂຶ້ມຕື່ມ. 

ທີ່ມາ: ສຳນັກຂ່າວປະເທດລາວ