ຍີ່ປຸ່ນ ສະໜັບສະໜູນຊ່ວຍເຫລືອ ດ້ານການສຶກສາໃນແຂວງຜົ້ງສາລີ ມູນຄ່າ 77,500 ໂດລາ
ວັນທີ 20 ຕຸລາ 2025 ຜ່ານມານີ້, ລັດຖະບານຍີ່ປຸ່ນໄດ້ໃຫ້ການຊ່ວຍເຫລືອ ມູນຄ່າປະມານ 77,500 ໂດລາ ໃນການສະໜັບສະໜູນໂຄງການດ້ານການສຶກສາໃນແຂວງຜົ້ງສາລີ ພາຍໃຕ້ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP). ໂດຍການເຊັນສັນຍາລົງນາມ ລະຫວ່າງ ທ່ານ ໂຄອິຊຶມິ ຊຶໂຕະມຸ ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ທ່ານບຸນເຊີນ ບຸນທະລາ ຫົວໜ້າຫ້ອງການສຶກສາທິການ ແລະ ກິລາເມືອງສຳພັນແຂວງຜົ້ງສາລີ, ມີ ພົນຕີ ສົມພອນ ມິດຕະພອນ ເຈົ້າແຂວງຜົ້ງສາລີ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂຄງການຈະໃຫ້ການສະໜັບສະໜູນທຶນເພື່ອກໍ່ສ້າງອາຄານຮຽນ ແລະ ຫ້ອງນ້ຳໃໝ່ ພ້ອມທັງສະໜອງສິ່ງອຳນວຍຄວາມສະດວກທີ່ຈຳເປັນໃຫ້ແກ່ໂຮງຮຽນປະຖົມບ້ານລາວແສນ ເມືອງສຳພັນ ແຂວງຜົ້ງສາລີ ເພື່ອຍົກລະດັບໂອກາດໃນການເຂົ້າເຖິງການສຶກສາຊັ້ນປະຖົມຂອງເດັກນ້ອຍໃນທ້ອງຖິ່ນ.
ທ່ານ ໂຄອິຊຶມິ ໄດ້ໃຫ້ຄຳເຫັນວ່າ: “ຂ້າພະເຈົ້າເຂົ້າໃຈວ່າ ພາຍຫຼັງທີ່ກໍ່ສ້າງໂຮງຮຽນປະຖົມ ລາວແສນສຳເລັດແລ້ວ ເດັກນ້ອຍຈະໄດ້ມີຫ້ອງຮຽນທີ່ພຽງພໍໃນອາຄານຮຽນຫຼັງໃໝ່ທີ່ປອດໄພ ແລະ ສາມາດເອົາໃຈໃສ່ໃນການຮ່ຳຮຽນໄດ້ຢ່າງເຕັມທີ່. ພ້ອມກັນນັ້ນ, ການກໍ່ສ້າງຫ້ອງນ້ຳທີ່ຖືກຕ້ອງຕາມມາດຕະຖານຂອງກະຊວງສຶກສາທິການ ແລະ ກິລາ ວາງອອກ ເພື່ອປັບປຸງສະພາບສຸຂານາໄມໃນໂຮງຮຽນປະຖົມລາວແສນ ກໍເປັນເປົ້າໝາຍຫຼັກໜຶ່ງຂອງໂຄງການດັ່ງກ່າວ. ຂ້າພະເຈົ້າຄາດຫວັງວ່າ ປະຊາຊົນບ້ານລາວແສນ ເມືອງສຳພັນ ແລະ ແຂວງຜົ້ງສາລີ ຈະເປັນເຈົ້າການໃນການບົວລະບັດ ແລະ ຮັກສາສິ່ງອໍານວຍຄວາມສະດວກດັ່ງກ່າວ ເພື່ອໃຫ້ເປັນປະໂຫຍດຕໍ່ເດັກນ້ອຍໃນໄລຍະຍາວ.”
ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP) ແມ່ນການສະໜອງທຶນທີ່ຈຳເປັນໃຫ້ແກ່ໂຄງ ການຂະໜາດນ້ອຍທີ່ໃຫ້ຜົນປະໂຫຍດໂດຍກົງແກ່ປະຊາຊົນຜູ້ອາໄສ ແລະ ມີຈຸດປະສົງເພື່ອການພັດທະນາເສດ ຖະກິດ-ສັງຄົມຂອງປະເທດລາວ ໂດຍອີງຕາມຄວາມຕ້ອງການພື້ນຖານຂອງມະນຸດເປັນຫຼັກ.
ໄລຍະຜ່ານມາ ລັດຖະບານຍີ່ປຸ່ນໄດ້ໃຫ້ການສະໜັບສະໜູນໃຫ້ແກ່ແຂວງຜົ້ງສາລີ ລວມເປັນມູນຄ່າຫລາຍກວ່າ 780,000 ໂດລາ ໃນດ້ານການສຶກສາ ແລະ ສາທາລະນະສຸກ. ປະເທດຍີ່ປຸ່ນຈະສືບຕໍ່ໃຫ້ການຊ່ວຍເຫລືອປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນດ້ານການພັດທະນາເສດຖະກິດ-ສັງຄົມໃນພາກພື້ນ.
ທີ່ມາ: ໜັງສືພິມປະຊາຊົນ
