ນະໂຍບາຍອຸດໜູນຕຳແໜ່ງ ຕໍ່ ປະທານ ແລະ ຮອງປະທານ ຄະນະກຳມະການປົກຄອງນະຄອນຫຼວງ, ແຂວງ, ເມືອງ, ນະຄອນ ແລະ ຄະນະກຳມະການປົກຄອງຕາແສງ

ວັນທີ 10/10/25 ນາຍົກລັດຖະມົນຕີ ອອກດໍາລັດ ເລກທີ 627/ນຍ ວ່າດ້ວຍການປະຕິບັດນະໂຍບາຍອຸດໜູນຕຳແໜ່ງ ຕໍ່ ປະທານ ແລະ ຮອງປະທານ ຄະນະກຳມະການປົກຄອງນະຄອນຫຼວງ, ແຂວງ, ເມືອງ, ນະຄອນ ແລະ ຄະນະກຳມະການປົກຄອງຕາແສງ

– ອີງຕາມ ກົດໝາຍ ວ່າດ້ວຍລັດຖະບານ ສະບັບເລກທີ 03/ສພຊ, ລົງວັນທີ 16 ພະຈິກ 2021;

– ອີງຕາມ ກົດໝາຍ ວ່າດ້ວຍການປົກຄອງທ້ອງຖິ່ນ (ສະບັບປັບປຸງ) ສະບັບເລກທີ 78/ສພຊ, ລົງວັນທີ 20 ມິນາ 2025;

– ອີງຕາມ ກົດໝາຍ ວ່າດ້ວຍພະນັກງານ-ລັດຖະກອນ ສະບັບເລກທີ 79/ສພຊ, ລົງວັນທີ 20 ມີນາ 2025;

– ອີງຕາມ ໜັງສືສະເໜີ ຂອງຄະນະຈັດຕັ້ງສູນກາງພັກ ສະບັບເລກທີ 618/ຄຈສພ, ລົງວັນທີ 02 ຕຸລາ 2025.

ນາຍົກລັດຖະມົນຕີ ອອກດໍາລັດ:

ມາດຕາ 1 ເຫັນດີປະຕິບັດນະໂຍບາຍອຸດໜູນຕໍາແໜ່ງ ຕໍ່ ປະທານ ແລະ ຮອງປະທານຄະນະກຳມະການປົກຄອງ ນະຄອນຫຼວງ, ແຂວງ, ເມືອງ, ນະຄອນ ແລະ ຄະນະກຳມະການປົກຄອງຕາແສງ ດັ່ງນີ້:

1. ຕຳແໜ່ງບໍລິຫານ ຕໍ່ ປະທານ ແລະ ຮອງປະທານ ຂັ້ນແຂວງ

1. ຊັ້ນ 6 ຂັ້ນ 2 ແມ່ນ ເລຂາຄະນະບໍລິຫານງານພັກນະຄອນຫຼວງ, ແຂວງ ທັງເປັນ ປະທານສະພາປະຊາຊົນ ນະຄອນຫຼວງ, ແຂວງ;

2. ຊັ້ນ 6 ຂັ້ນ 1 ທີ່ຮັບນະໂຍບາຍອຸດໜູນຕຳແໜ່ງ ຊັ້ນ 6 ຂັ້ນ 2 ປະກອບມີ:

ຮອງເລຂາຄະນະບໍລິຫານງານພັກນະຄອນຫຼວງ, ແຂວງ ທັງເປັນປະທານ ຄະນະກຳມະການປົກຄອງ ນະຄອນຫຼວງ, ແຂວງ;

-ຮອງເລຂາຄະນະບໍລິຫານງານພັກນະຄອນຫຼວງ, ແຂວງ ຮັບຜິດຊອບຊີ້ນໍາວຽກງານການເມືອງແນວຄິດ, ວຽກງານພັກ-ພະນັກງານ, ວຽກງານປັບປຸງກົງຈັກການຈັດຕັ້ງ ແລະ ອົງການຈັດຕັ້ງມະຫາຊົນ.

3. ຕຳແໜ່ງບໍລິຫານປະເພດ 1 ທີ່ຮັບນະໂຍບາຍອຸດໜູນຕຳແໜ່ງ ຊັ້ນ 6 ຂັ້ນ 1 ແມ່ນ ກຳມະການປະຈຳພັກ ນະຄອນຫຼວງ, ແຂວງ ທັງເປັນ ຮອງປະທານຄະນະກຳມະການປົກຄອງນະຄອນຫຼວງ, ແຂວງ;

4. ຕຳແໜ່ງບໍລິຫານປະເພດ 1 ແມ່ນ ອຸດໜູນຕຳແໜ່ງ ຂອງກຳມະການປະຈຳພັກນະຄອນຫຼວງ, ແຂວງ;

5. ຕຳແໜ່ງບໍລິຫານປະເພດ 2 ແມ່ນ ອຸດໜູນຕຳແໜ່ງ ຂອງກຳມະການໃນຄະນະບໍລິຫານງານພັກ ນະຄອນຫຼວງ, ແຂວງ;

6. ຕຳແໜ່ງບໍລິຫານປະເພດ 3 ແມ່ນ ຕຳແໜ່ງບໍລິຫານ ຂອງຫົວໜ້າພະແນກ-ທຽບເທົ່ານະຄອນຫຼວງ, ແຂວງ ທີ່ບໍ່ແມ່ນກຳມະການໃນຄະນະບໍລິຫານງານພັກນະຄອນຫຼວງ, ແຂວງ.

II. ຕຳແໜ່ງບໍລິຫານ ຕໍ່ ປະທານ ແລະ ຮອງປະທານ ຂັ້ນເມືອງ

1. ຕຳແໜ່ງບໍລິຫານປະເພດ 2 ທີ່ຮັບນະໂຍບາຍອຸດໜູນຕຳແໜ່ງບໍລິຫານປະເພດ 1 ແມ່ນ ເລຂາພັກເມືອງ, ນະຄອນ ທັງເປັນ ຫົວໜ້າຄະນະສະມາຊິກສະພາປະຊາຊົນນະຄອນຫຼວງ, ແຂວງ ປະຈຳເຂດເລືອກຕັ້ງ ຢູ່ ເມືອງ, ນະຄອນ;

2. ຕຳແໜ່ງບໍລິຫານປະເພດ 3 ທີ່ຮັບນະໂຍບາຍອຸດໜູນຕຳແໜ່ງບໍລິຫານປະເພດ 2 ແມ່ນ:

ຮອງເລຂາພັກເມືອງ, ນະຄອນ ທັງເປັນ ປະທານຄະນະກຳມະການປົກຄອງເມືອງ, ນະຄອນ;

ຮອງເລຂາພັກເມືອງ, ນະຄອນຮັບຜິດຊອບຊີ້ນໍາວຽກງານການເມືອງແນວຄິດ, ວຽກງານພັກ-ພະນັກງານ, ວຽກງານປັບປຸງກົງຈັກການຈັດຕັ້ງ ແລະ ອົງການຈັດຕັ້ງມະຫາຊົນ ຂອງເມືອງ, ນະຄອນ;

3. ຕຳແໜ່ງບໍລິຫານປະເພດ 3 ແມ່ນ ອຸດໜູນຕຳແໜ່ງ ຂອງກຳມະການປະຈຳພັກເມືອງ, ນະຄອນ;

4. ຕຳແໜ່ງບໍລິຫານປະເພດ 4 ແມ່ນ ຕຳແໜ່ງບໍລິຫານ ຂອງຫົວໜ້າຫ້ອງການ-ທຽບເທົ່າເມືອງ, ນະຄອນ.

III. ຕຳແໜ່ງບໍລິຫານ ຕໍ່ ປະທານ ແລະ ຮອງປະທານ ຂັ້ນຕາແສງ

1. ຕຳແໜ່ງບໍລິຫານປະເພດ 4 ແມ່ນ ຕຳແໜ່ງບໍລິຫານ ຂອງເລຂາຄະນະພັກ ທັງເປັນ ປະທານຄະນະ

ກຳມະການປົກຄອງຕາແສງ;

2. ຕຳແໜ່ງບໍລິຫານປະເພດ 5 ແມ່ນ ຕຳແໜ່ງບໍລິຫານ ຂອງຮອງເລຂາຄະນະພັກ ທັງເປັນ ຮອງປະທານຄະນະ ກຳມະການປົກຄອງຕາແສງ;

3. ຕຳແໜ່ງບໍລິຫານປະເພດ 6 ແມ່ນ ຕຳແໜ່ງບໍລິຫານ ຂອງຫົວໜ້າໜ່ວຍງານ ທີ່ຂຶ້ນກັບ ຄະນະພັກ ແລະ ຄະນະກຳມະການປົກຄອງຕາແສງ.

ມາດຕາ 2 ບັນດາການຈັດຕັ້ງພັກ, ກະຊວງ-ອົງການທຽບເທົ່າ ແລະ ອົງການປົກຄອງທ້ອງຖິ່ນ ຈົ່ງຮັບຮູ້ ແລະ ຈັດຕັ້ງ ປະຕິບັດດຳລັດສະບັບນີ້ໃຫ້ໄດ້ຮັບຜົນດີ,

ມາດຕາ 3 ດຳລັດສະບັບນີ້ມີຜົນສັກສິດ ນັບແຕ່ວັນລົງລາຍເຊັນ ເປັນຕົ້ນໄປ: