ລັດຖະບານອິດສະລາແອນອະນຸມັດຂໍ້ຕົກລົງຢຸດຍິງ-ປ່ອຍຕົວປະກັນໃນກາຊາ

October 10, 2025 - 3:27 PM

             ລັດຖະບານອິດສະລາແອນໃຫ້ສັດຕະຍາບັນຮັບຮອງຂໍ້ຕົກລົງຢຸດຍິງກັບກຸ່ມຮາມັດແລ້ວໃນວັນທີ 10 ຕຸລາ ໂດຍມີເງື່ອນໄຂຄື: ຢຸດການສູ້ຮົບ ແລະ ປ່ອຍຕົວປະກັນຢູ່ກາຊາທັງໝົດທີ່ເຫລືອຢູ່ພາຍໃນ 72 ຊົ່ວໂມງ ລວມທັງສົ່ງກັບສົບຕົວປະກັນທີ່ເສຍຊີວິດຄືນອິດສະລາແອນ.

             ທັງນີ້, ສື່ທ້ອງຖິ່ນອິດສະລາແອນລາຍງານວ່າ: ຂໍ້ຕົກລົງຢຸດຍິງດັ່ງກ່າວທີ່ໄດ້ຮັບການສະໜັບສະໜູນ ແລະ ໄກ່ເກ່ຍຈາກປະທານາທິບໍດີ ໂດນັລ ທຣໍາ ຂອງອາເມລິກາ ເລີ່ມມີຜົນບັງຄັບໃຊ້ທັນທີ. ຂະນະທີ່ໂຄສົກສໍານັກງານນາຍົກລັດຖະມົນຕີອິດສະລາແອນກ່າວວ່າ: ຂໍ້ຕົກລົງຈະເລີ່ມມີຜົນໃນອີກ 24 ຊົ່ວໂມງ.

              ຂະນະທີ່ເງື່ອນໄຂຂໍ້ຕົກລົງອື່ນໆ ລວມທັງການຖອນກໍາລັງທະຫານອິດສະລາແອນອອກຈາກກາຊາ ເຊິ່ງມີທັງໝົດ 3 ໄລຍະ ໂດຍໄລຍະທໍາອິດຈະຖອນກໍາລັງທະຫານບາງສ່ວນກັບໄປແນວເສັ້ນແບ່ງເຂດແດນ, ແຕ່ຈະຍັງມີກໍາລັງທະຫານຄວບຄຸມພື້ນທີ່ຢູ່ກາຊາປະມານ 53%.

              ນອກຈາກນີ້, ອິດສະລາແອນຈະເປີດທາງໃຫ້ສົ່ງການຊ່ວຍເຫລືອດ້ານມະນຸດສະທໍາເຂົ້າສູ່ກາຊາ ໂດຍຄາດວ່າຈະມີລົດບັນທຸກສິ່ງຂອງຊ່ວຍເຫລືອ ແລະ ສະບຽງອາຫານຫລາຍຮ້ອຍຄັນເຂົ້າໄປກາຊາ.

             ສ່ວນລາຍລະອຽດເລື່ອງການແລກປ່ຽນຕົວປະກັນທີ່ຈະມີຂຶ້ນ 72 ຊົ່ວໂມງນັ້ນ ກໍານົດໃຫ້ກຸ່ມຮາມັດຈະຕ້ອງປ່ອຍຕົວປະກັນ 20 ຄົນທີ່ເຊື່ອວ່າຍັງມີຊີວິດຢູ່ ຈາກນັ້ນຈະສົ່ງສົບຕົວປະກັນ 28 ຄົນກັບຄືນອິດສະລາແອນ, ແຕ່ຍັງບໍ່ຊັດເຈນວ່າຈະໃຊ້ເວລາດົນຊໍ່າໃດ.

            ຂະນະທີ່ລາຍງານຈາກແຫລ່ງຂ່າວຊາວປາແລັສຕິນວ່າ: ອິດສະລາແອນຈະປ່ອຍຕົວນັກໂທດຊາວປາແລັສຕິນປະມານ 250 ຄົນທີ່ກໍາລັງຮັບໂທດຕິດຄຸກຕະຫລອດຊີວິດຢູ່ອິດສະລາແອນ ແລະ ຊາວກາຊາທີ່ຖືກກັກຂັງອີກປະມານ 1,700 ຄົນ.

ອ້າງອີງ: