ຫວຽດນາມອົບພະຍົບປະຊາຊົນນັບແສນຄົນ ກຽມຮັບມືພາຍຸໄຕ້ຝຸ່ນບົວລອຍ

September 29, 2025 - 3:30 PM

             ຫວຽດນາມໄດ້ລະດົມກໍາລັງທະຫານປະມານ 100,000 ຄົນ ເພື່ອຊ່ວຍອົບພະຍົບປະຊາຊົນ 250,000 ຄົນ ຂະນະທີ່ພາຍຸໄຕ້ຝຸ່ນບົວລອຍເຊິ່ງທະວີຄວາມຮຸນແຮງກໍາລັງມຸ້ງໜ້າສູ່ຫວຽດນາມ ສົ່ງຜົນເຮັດໃຫ້ລັດຖະບານຕ້ອງສັ່ງປິດສະໜາມບິນຫລາຍແຫ່ງຊົ່ວຄາວ, ພ້ອມມີລາຍງານວ່າຊາວປະມົງຢ່າງໜ້ອຍ 9 ຄົນສູນຫາຍ ຫລັງເຮືອຂວໍ້າຢູ່ແຂວງກວາງຈິງ.

             ລາຍງານຂອງກົມອຸຕຸນິຍົມວິທະຍາຫວຽດນາມລະບຸວ່າ: ບົວລອຍຖືເປັນໄຕ້ຝຸ່ນຫົວທີ 10 ທີ່ສົ່ງຜົນກະທົບຕໍ່ຫວຽດນາມໃນປີນີ້ ໂດຍກໍາລັງເຄື່ອນທີ່ດ້ວຍຄວາມໄວລົມປະມານ 130 ກມ/ຊມ ເຊິ່ງເປັນພາຍຸທີ່ເຄື່ອນທີ່ໄວເກືອບສອງເທົ່າຂອງຄ່າສະເລ່ຍ ມີຄວາມຮຸນແຮງສູງ ແລະ ຄວບຄຸມພື້ນທີ່ເປັນວົງກວ້າງ ສາມາດເຮັດໃຫ້ເກີດໄພທໍາມະຊາດຫລາຍຮູບແບບພ້ອມກັນ ບໍ່ວ່າຈະເປັນລົມພັດແຮງ, ຝົນຕົກໜັກ, ນໍ້າຖ້ວມກະທັນຫັນ, ດິນເຈື່ອນ ແລະ ນໍ້າທະເລໝູນຊາຍຝັ່ງ.

             ທ່ານ ຝາມ ມິງ ຈິງ ນາຍົກລັດຖະມົນຕີຫວຽດນາມ ຍັງມີຄໍາສັ່ງໃຫ້ທຸກໜ່ວຍງານທີ່ກ່ຽວຂ້ອງກຽມຄວາມພ້ອມໃນລະດັບສູງສຸດ ເພື່ອກຽມຮັບມືຖ້າເກີດສະຖານະການສຸກເສີນ, ຫລາຍພື້ນທີ່ໂດຍສະເພາະແຂວງຕາມແຄມຝັ່ງໄດ້ມີການບັນທຸກຫີນ, ໄມ້ໄຜ່ ແລະ ເປົາຂີ້ດິນຊາຍ ເພື່ອເພີ່ມແນວປ້ອງກັນແຄມຝັ່ງ.

                ໃນທ້າຍອາທິດຜ່ານມາ, ໄຕ້ຝຸ່ນບົວລອຍໄດ້ພັດຖະຫລົ່ມຟີລິບປິນ ເຮັດໃຫ້ເກີດດິນເຈື່ອນ ແລະ ນໍ້າຖ້ວມ ໂດຍລາຍງານລ້າສຸດຈາກສື່ຟີລິບປິນລະບຸວ່າ: ມີຜູ້ເສຍຊີວິດແລ້ວ 11 ຄົນ ແລະ ສູນຫາຍອີກຈໍານວນໜຶ່ງ.

              ນັກວິທະຍາສາດເຕືອນວ່າ: ພາຍຸມີທ່າອ່ຽງຮຸນແຮງຂຶ້ນເລື້ອຍໆ ເນື່ອງຈາກໂລກຮ້ອນຈາກການປ່ຽນແປງສະພາບອາກາດທີ່ເກີດຈາກມະນຸດ.

             ກະຊວງກະສິກໍາ ແລະ ພັດທະນາຊົນນະບົດຂອງຫວຽດນາມລະບຸວ່າ: ຫວຽດນາມມີຜູ້ເສຍຊີວິດ ຫລື ສູນຫາຍຈາກໄພທໍາມະຊາດ 100 ກວ່າຄົນໃນໄລຍະ 7 ເດືອນທໍາອິດຂອງປີ 2025 ໂດຍເດືອນກໍລະກົດຜ່ານມາ ມີເຮືອນໍາທ່ຽວຂວໍ້າຢູ່ອ່າວຮາລອງ ເຮັດໃຫ້ມີຜູ້ເສຍຊີວິດຢ່າງໜ້ອຍ 37 ຄົນ ແລະ ສູນຫາຍອີກ 5 ຄົນ ຫລັງເກີດພາຍຸຝົນຟ້າຄະນອງກະທັນຫັນ.

             ຫວຽດນາມໄດ້ຮັບຄວາມເສຍຫາຍທາງເສດຖະກິດສູງກວ່າ 3.3 ພັນລ້ານໂດລາສະຫະລັດ ຈາກຜົນກະທົບຂອງໄຕ້ຝຸ່ນຢາງິ ເຊິ່ງພັດຖະຫລົ່ມທາງພາກເໜືອຂອງປະເທດ ແລະ ມີຜູ້ເສຍຊີວິດຈໍານວນຫລາຍ ໃນເດືອນກັນຍາ 2024.

ອ້າງອີງ: