ເປັນເລື່ອງໜ້າຄິດຫງໍາບໍ່ໜ້ອຍເມື່ອບໍ່ດົນມານີ້ສື່ສັງຄົມ (Laopost) ເພິ່ນໄດ້ເຜີຍແຜ່ຮູບພາບຂອງສາວພະນັກງານຮັບຕ້ອນຢູ່ໂຮງໝໍແຫ່ງໜຶ່ງໃນປະເທດໄທໃສ່ຊຸດປະຈຳຊາດລາວ, ຖ້າຫາກຂໍ້ມູນດັ່ງກ່າວເປັນຄວາມຈິງ ກໍຄົງເປັນໜ້າສົນໃຈແລະຫຼາຍຄົນກໍອາດມີທັດສະນະຄະຕິທີ່ແຕກຕ່າງກັນໄປ. ຕໍ່ເຫດການດັ່ງກ່າວບາງຜ່ອງກໍວ່າມັນເປັນຍຸດທະວິທີທາງການຕະຫຼາດຂອງເຂົາເຈົ້າເພື່ອມັດໃຈແລະຂວັກເອົາເງິນຈາກກະເປົາຄົນລາວທີ່ນິຍົມໄປໃຊ້ບໍລິການຢູ່ໂຮງໝໍໄທຢູ່ແລ້ວຫຼືເອີ້ນວ່າເປັນຜູ້ໃຊ້ບໍລິການຫຼັກຂອງໂຮງໝໍເຂດແຂວງໜອງຄາຍ, ອຸດອນທານີກັນເລີຍ, ແຕ່ບາງຜ່ອງກໍວ່າເປັນການດີແລ້ວທີ່ເຂົານິຍົມໃຊ້ຊຸດຂອງຄົນລາວເພາະຄົນພາກອີສານກໍຄືຄົນລາວຕັ້ງແຕ່ກີ້. ຜູ້ຂຽນອາດບໍ່ລົງເລິກດອກວ່າຊຸດປະຈຳຊາດນັ້ນຄວນເຜີຍແຜ່ໃນຮູບແບບໃດຫຼືເປັນຂອງໃຜແຕ່ຢາກຂໍແລກປ່ຽນກ່ຽວກັບເລື່ອງລະບົບສາທາລະນະສຸກທີ່ເປັນເລື່ອງໜ້າສົນທະນາກັນບໍ່ເລິກບໍ່ແລ້ວ, ເປັນເພາະມັນກ່ຽວກັບຄວາມເປັນຄວາມຕາຍທີ່ພວກເຮົາໃສ່ໃຈເປັນພິເສດ. ກ່ອນອື່ນພວກເຮົາມາເບິ່ງຄວາມແຕກໂຕນກັນຂອງຄຸນນະພາບດ້ານລະບົບສາທາລະນະສຸກລະຫວ່າງເຮົາກັບປະເທດເພື່ອນບ້ານໂດຍອີງຕາມຕົວເລກຂອງອົງການອະນາໄມໂລກປີ 2015 ໃຫ້ຮູ້ວ່າໃນບັນດາປະເທດອາຊຽນປະເທດທີ່ມີລະບົບສາທາລະນະສຸກທີ່ດີທີ່ສຸດແມ່ນປະເທດສິງກະໂປ (ລຳດັບ 6 ຂອງໂລກ), ຮອງລົງມາແມ່ນບຼູໄນ (ລຳດັບ 40 ຂອງໂລກ),…