UN ຊີ້ເຢເມນໃກ້ລົ້ມສະຫລາຍ ວອນທົ່ວໂລກຊ່ວຍເຫລືອຈິງຈັງດ່ວນ
ສະຫະປະຊາຊາດຊີ້ເຢເມນໃກ້ລົ້ມສະຫລາຍໃນທຸກດ້ານ ທັງສົງຄາມກາງເມືອງບໍ່ມີທ່າທີຈະຢຸດ, ປະຊາຊົນຂາດເຂີນອາຫານ, ເກີດພະຍາດລະບາດ, ສ່ວນປະເທດມະຫາອຳນາດເມີນເສີຍບໍ່ຊ່ວຍເຫລືອຈິງຈັງ.
ທ່ານ ສະເຕີເຟນ ໂອບຽນ ຮອງເລຂາທິການ ແລະ ຜູ້ປະສານງານດ້ານການຊ່ວຍເຫລືອທາງມະນຸດສະທຳຂອງສະຫະປະຊາຊາດ ກ່າວຕໍ່ກອງປະຊຸມສະພາຄວາມໝັ້ນຄົງແຫ່ງສະຫະປະຊາຊາດວ່າ: ປະເທດເຢເມນພວມປະສົບວິກິດການຮອບດ້ານ ທັງທາງສັງຄົມ ແລະ ເສດຖະກິດ ເຊິ່ງສ່ຽງຕໍ່ການລົ້ມສະຫລາຍຂອງສະຖາບັນສຳຄັນຕ່າງໆຂອງປະເທດ.
ທ່ານ ໂອບຽນ ຮຽກຮ້ອງໃຫ້ມີການເຂົ້າມາຊ່ວຍເຫລືອ ແລະ ແກ້ໄຂວິກິດການຢູ່ເຢເມນຢ່າງຮີບດ່ວນ ເນື່ອງຈາກເຢເມນພວມຕົກຢູ່ໃນສະຖານະການທາງມະນຸດສະທຳທີ່ຮ້າຍແຮງ ໂດຍປະຊາຊົນເກືອບ 7 ລ້ານຄົນພວມອຶດຫິວຂາດເຂີນອາຫານ ທັງການລະບາດຂອງພະຍາດອະຫິວາໄດ້ຂ້າຊີວິດປະຊາຊົນໄປແລ້ວເກືອບ 500 ຄົນໃນໄລຍະເດືອນຜ່ານມາ ແລະ ຄາດວ່າອາດມີຜູ້ເສຍຊີວິດຈາກພະຍາດອະຫິວາເພີ່ມອີກປະມານ 150.000 ຄົນໃນໄລຍະເຄິ່ງປີນີ້
ຮອງເລຂາທິການສະຫະປະຊາຊາດຍັງກ່າວວ່າ: ຄວາມທຸກທໍລະມານຂອງຊາວເຢເມນບໍ່ແມ່ນເລື່ອງບັງເອີນ ຫລື ເປັນຜົນມາຈາກສິ່ງທີ່ຢູ່ເໜືອການຄວບຄຸມຂອງປະຊາຄົມສາກົນ, ແຕ່ເປັນຄວາມຜິດຂອງທຸກຝ່າຍທີ່ກ່ຽວຂ້ອງ ແລະ ມາຈາກການເມີນເສີຍຂອງບັນດາປະເທດມະຫາອຳນາດ.
+ ເຢເມນປະກາດພາວະສຸກເສີນ ພາຍຫລັງພະຍາດອະຫິວາລະບາດ
ເຖິງວ່າຫລາຍປະເທດຈະໃຫ້ຄຳໝັ້ນໃນການບໍລິຈາກເງິນ ເພື່ອຊ່ວຍເຫລືອເຢເມນ, ແຕ່ປັດຈຸບັນນີ້ ໜ່ວຍງານໃຫ້ການຊ່ວຍເຫລືອທາງມະນຸດສະທຳຂອງສະຫະປະຊາຊາດຍັງໄດ້ຮັບເງິນບໍລິຈາກພຽງ 24% ຂອງຈຳນວນເງິນທັງໝົດທີ່ຈຳເປັນຕ້ອງໃຊ້ ເຊິ່ງມີປະມານ 2.100 ລ້ານໂດລາສະຫະລັດ.
ໃນໄລຍະສອງປີຜ່ານມາ, ເຢເມນຕົກຢູ່ໃນສະພາບສົງຄາມກາງເມືອງ ໂດຍການສູ້ຮົບຢ່າງຮຸນແຮງລະຫວ່າງກຸ່ມກະບົດຮູທີ ແລະ ກອງກຳລັງຜູ້ຈົງຮັກພັກດີຕໍ່ອະດີດປະທານາທິບໍດີ ອັບດຣັບບູ ມານຊູ ຮາດີ ເຊິ່ງໄດ້ຮັບການສະໜັບສະໜູນຈາກອາຣັບບີ ຊາອຸດິດ ເຮັດໃຫ້ພົນລະເມືອງປະມານ 8.000 ຄົນຕ້ອງເສຍຊີວິດ ແລະ ອີກເກືອບ 19 ລ້ານຄົນຕ້ອງການການຊ່ວຍເຫລືອທາງມະນຸດສະທຳຢ່າງຮີບດ່ວນ.
ທ່ານ ອິສມາເອລ ອູ ເຊກ ອາເໝັດ ຜູ້ແທນສະຫະປະຊາຊາດ ເຊິ່ງເບິ່ງແຍງເລື່ອງເຢເມນ ໄດ້ຂຶ້ນກ່າວຕໍ່ກອງປະຊຸມສະພາຄວາມໝັ້ນຄົງແຫ່ງສະຫະປະຊາຊາດ ເຊັ່ນກັນວ່າ: ຜົນການເຈລະຈາຫລ້າສຸດລະຫວ່າງກອງກຳລັງສອງຝ່າຍ ເຊິ່ງສູ້ຮົບຕິດພັນໃນສົງຄາມກາງເມືອງນັ້ນ ບໍ່ມີຝ່າຍໃດຕ້ອງການປານີປານອມ ແລະ ສຽງຮຽກຮ້ອງໃຫ້ມີການຢຸດຍິງຈາກສາກົນບໍ່ມີຜູ້ໃດຮັບຟັງ ເຊິ່ງເຮັດໃຫ້ຊາວເຢເມນຕ້ອງປະສົບຄວາມທຸກຍາກຕໍ່ໄປ ເພາະຄວາມຊັກຊ້າທີ່ບໍ່ຄວນເກີດຂຶ້ນໃນການເຈລະຈາສັນຕິພາບນີ້.
