ສື່ມວນຊົນຕ້ອງເຮັດພາລະບົດບາດເປັນກະບອກສຽງຂອງພັກ-ລັດຖະບານຢ່າງແທ້ຈິງ
ໂດຍ: ຊາຍພະເນຈອນ.
ອີກບໍ່ພໍເທົ່າໃດມື້ກໍຈະຮອດວັນເກີດຂອງສື່ມວນຊົນພໍດີຄົບຮອບ 68ປີ ວັນທີ 13/8/1950-13/8/2018 ແລະ ເຫັນໄດ້ວ່າໃນໄລຍະຜ່ານມາສື່ມວນຊົນ ເຮົາກໍໄດ້ສ້າງຜົນງານອັນໃຫຍ່ຫຼວງໃຫ້ແກ່ສັງຄົມ ແລະ ປະເທດຊາດ ເຊິ່ງມີສື່ສິ່ງພິມທັງໝົດ 100ກວ່າສະບັບ ນັບທັງສື່ພິມລາຍວັນ, ສະຖານີວິທະຍຸກະຈາຍສຽງ ແລະ ສະຖານີໂທລະພາບກໍໄດ້ກະຈາຍ ແລະ ອອກອາກາດທົ່ວພາກພື້ນຂອງປະເທດ ເຮັດໃຫ້ປະຊາຊົນທີ່ອາໄສຢູ່ທັງຕົວເມືອງ ແລະ ເຂດຫ່າງໄກສອກຫຼີກ ກໍສາມາດໄດ້ເບິ່ງ ແລະ ໄດ້ຟັງຂ່າວຄາວ ແລະ ສາລະໜ້າຮູ້ຕ່າງໆຢ່າງສະດວກສະບາຍ. ນອກນັ້ນ, ຍັງມີສື່ໃໝ່ທີ່ກໍາລັງຂະຫຍາຍຕົວອອກສູ່ສັງຄົມຢ່າງກວ້າງຂວາງ ແລະ ວ່ອງໄວ ເປັນຕົ້ນແມ່ນແຕ່ລະສື່ໄດ້ມີແວບໄຊ ແລະ ເຟສບຸກຂອງຕົນ, ມີໂທລະພາບໃຊ້ສາຍ ແລະ ອອນລາຍອື່ນໆ ເຊິ່ງ ສາມາດຖ່າຍທອດສົດໃຫ້ສັງຄົມໄດ້ເຫັນສະພາບຕົວຈິງຂອງເຫດການຕ່າງໆເກີດຂຶ້ນໄດ້ຢ່າງຖືກຕ້ອງ ກາຍເປັນກະບອກສຽງ ໃຫ້ພັກ-ລັດຖະບານ ແລະປະເທດຊາດໂດຍດີຕະຫຼອດມາ.
ປັດຈຸບັນນີ້ ເປັນຍຸກແຫ່ງໂລກາພິວັດ ຂອງໂລກອອນລາຍໃນການພັດທະນາດ້ານການສື່ສານຍິ່ງກ້າວໜ້າ, ຍິ່ງທັນສະໄໝ ແລະ ວ່ອງໄວກວ່າເກົ່າອີກ ເຊິ່ງນອກຈາກສື່ຂອງພວກເຮົາແລ້ວ ປະຊາຊົນພົນລະເມືອງໃນທຸກມູມໂລກກໍລ້ວນແລ້ວແຕ່ມີສື່ຂອງຕົນເອງ ເປັນຕົ້ນແມ່ນ ການໃຊ້ສື່ສານທາງເຟສບຸກ ແລະ ອອນລາຍຕ່າງໆຈາກສາກົນ ແລະ ພາກພື້ນໄດ້ຢ່າງກວ້າງຂວາງ, ແຕ່ຄຽງຄູ່ກັນນັ້ນ, ພວກເຮົາຍັງຈະຕ້ອງໄດ້ພັດທະນາຕົນເອງຫຼາຍຢ່າງ ໂດຍສະເພາະລະດັບຄວາມຮູ້ ຄວາມສາມາດຂອງພະນັກງານເຮັດວຽກສື່ ໃນໄລຍະໃໝ່ນີ້ຍັງຈໍາກັດ ເຊິ່ງມັນສະແດງອອກໃນການຜະລິດຂ່າວຍັງຂາດເນື້ອຫາສາລະ ,ຂາດສີສັນໃນການເຮັດ, ການບໍລິການໃນການອອກຂ່າວ ໂຄສະນາຕ່າງໆຍັງຢູ່ໃນຂອບເຂດຈໍາກັດບໍ່ກ້ວາງຂວາງ, ການນໍາໃຊ້ເຄື່ອງມື ແລະ ອຸປະກອນຮັບໃຊ້ເຂົ້າໃນວຽກສື່ຍັງຫຼ້າຫຼັງ ແລະ ບໍ່ທັນທົ່ວເຖິງ ເຮັດໃຫ້ວຽກງານສື່ພວກເຮົາ ບໍ່ທັນດຶງດູດຄວາມສົນໃຈໃຫ້ກັບຜູ້ອ່ານ-ຜູ້ຊົມໄດ້ດີເທົ່າທີ່ຄວນ. ຕົວຢ່າງ: ສະຖານີວິທະຍຸກະຈາຍສຽງ, ສະຖານີໂທລະພາບ ແລະ ສິ່ງພິມຕ່າງໆຍັງສັງເກດເຫັນປະຊາຊົນລາວເຮົາໂດຍສະເພາະແມ່ນຊາວໜຸ່ມ, ນັກຮຽນ, ນັກສຶກສາປັນຍາຊົນ ຍັງບໍລິໂພກໜ້ອຍ, ສ່ວນຫຼາຍຫັນໄປຊົມໃຊ້ສື່ຂອງຕ່າງປະເທດ ແລະ ປະເທດເພື່ອນບ້ານຫຼາຍກວ່າສື່ຂອງຕົນເອງ. ເພາະສະນັ້ນ, ພວກເຮົາຕ້ອງຍົກລະດັບຄວາມຮູ້ຄວາມສາມາດຂອງພະນັກງານຜູ້ທີ່ເຮັດວຽກສື່ໃຫ້ເຊື່ອມໂຍງເຂົ້າກັບຂົງເຂດພາກພື້ນ ແລະ ສາກົນໃນລະດັບທີ່ແນ່ນອນ ພ້ອມທັງປະກອບເຄື່ອງມື ແລະ ອຸປະກອນຮັບໃຊ້ເຂົ້າໃນວຽກງານສື່ມວນຊົນໃຫ້ທັນສະໄໝ, ພຽງພໍ ແລະ ຂະຫຍາຍລາຍການອອກອາກາດ ໃຫ້ຫຼາຍກວ່າເກົ່າໂດຍສະເພາະແມ່ນ ທາງວິທະຍຸກະຈາຍສຽງ ແລະ ໂທລະພາບໃຫ້ມີສີສັນໂດດເດັ່ນຂຶ້ນຕື່ມ, ຖ້າພວກເຮົາຫາກພ້ອມກັນປັບປຸງ ແລະ ພັດທະນາຕົນເອງໄດ້ ດັ່ງນີ້ ກໍຈະເຮັດໃຫ້ວຽກງານສື່ມວນຊົນເຮົາເຕີບໃຫຍ່ຂະຫຍາຍຕົວຍິ່ງໆຂຶ້ນ, ສາມາດເຮັດພາລະບົດບາດຂອງຕົນໃຫ້ ກາຍເປັນກະບອກສຽງທີ່ດີຂອງພັກ-ລັດຖະບານຕະຫຼອດໄປ.
