ຕໍາຫລວດແຂວງວຽງຈັນຈັບຜູ້ຄ້າຢາເສບຕິດພ້ອມຂອງກາງຢາບ້າ 34 ພັນເມັດ
ເມື່ອບໍ່ດົນມານີ້, ເຈົ້າໜ້າທີ່ ປກສ ແຂວງວຽງຈັນ, ສາມາດຈັບຕົວທ້າວ ຕູ້ທ່າວ ອາຍຸ 24 ປີຢູ່ບ້ານໂພນງາມເມືອງໝື່ນແຂວງວຽງຈັນ, ໃນຂະນະນໍາຢາເສບຕິດປະເພດຢາບ້າ 34 ພັນເມັດໄປສົ່ງໃຫ້ຜູ້ສັ່ງຊື້ໃນເຂດບ້ານນາໂພໃຕ້ເມືອງໂພນໂຮງແຂວງວຽງຈັນ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງໄດ້ຮັບລາຍງານຈາກພົນລະເມືອງດີວ່າຈະມີການລັກລອບຊື້-ຂາຍຢາເສບຕິດຈໍານວນຫລາຍໃນເຂດບ້ານນາໂພໃຕ້, ຈຶ່ງໄດ້ຈັດກໍາລັງລົງຕິດຕາມ ແລະ ຕັ້ງຈຸດກວດຕາມເສັ້ນທາງຕ່າງໆ ແລະ ພົບເຫັນເປົ້າໝາຍສອງຄົນຂັບຂີ່ລົດຈັກມາຈຶ່ງໄດ້ຢຸດກວດ ແລະ ພົບເຫັນຢາບ້າດັ່ງກ່າວຢູ່ໃນຖົງພາຍ, ຈຶ່ງໄດ້ຢຶດໄວ້ເປັນຫລັກຖານເພື່ອດໍາເນີນຄະດີ ແລະ ໃນຂະນະ ກວດຄົ້ນ, ໝູ່ທີ່ມານໍາຄົນໜຶ່ງສາມາດເອົາຕົວຫລົບໜີໄປໄດ້, ປັດຈຸບັນເຈົ້າໜ້າທີ່ກຳລັງເລັ່ງຕິດຕາມຜູ້ຮ່ວມຂະບວນການມາດຳເນີນຄະດີຕາມກົດໝາຍໂດຍໄວ.
ພາບ-ຂ່າວ : ຫນັງສືພິມ ປກສ
+ຕຳຫລວດຫລວງນ້ຳທາຈັບຂະບວນການຄ້າຢາເສບຕິດຂ້າມຊາດຂອງກາງຢາບ້າ 48 ພັນເມັດ
