ໂຄງການກໍ່ສ້າງທາງລົດໄຟລາວ-ຈີນ ຈະປະຕິບັດຕາມລະບຽບຢ່າງເຂັ້ມງວດ
ທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ຫົວໜ້າຄະນະຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ ເປັນປະທານເປີດຝຶກອົບຮົມບັນດາລະບຽບການທີ່ກ່ຽວຂ້ອງກັບການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນ ຂຶ້ນໃນວັນທີ 25-26 ຕຸລາ ນີ້, ທີ່ນະຄອນຫຼວງວຽງຈັນ ເພື່ອເຂົ້າໃຈຕື່ມອີກກ່ຽວກັບລະບຽບການຄຸ້ມຄອງສິ່ງແວດລ້ອມ ການຄຸ້ມຄອງແຮ່ທາດ ການຄຸ້ມຄອງແຮງງານ ແລະ ການຄຸ້ມຄອງຄົນຕ່າງປະເທດ. ໃຫ້ແກ່ 7 ພາກສ່ວນຄື: ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກພະລັງງານ ແລະ ບໍ່ແຮ່, ພະແນກການຕ່າງປະເທດ, ພະແນກ ຍທຂ, ກອງບັນຊາການປ້ອງກັນຄວາມສະຫງົບ ແລະ ຫ້ອງການປະສານງານໂຄງການກໍ່ສ້າງທາງລົດໄຟລາວ-ຈີນຂອງແຂວງວຽງຈັນ, ຫຼວງພະບາງ, ອຸດົມໄຊ, ແຂວງຫຼວງນ້ຳທາ ແລະ ນະຄອນຫຼວງວຽງຈັນ.
ປັດຈຸບັນໂຄງການກໍ່ສ້າງທາງລົດໄຟລາວ-ຈີນ ແມ່ນໄດ້ລົງມືຈັດຕັ້ງປະຕິບັດແລ້ວ ແຕ່ເຫັນວ່າການຄຸ້ມຄອງຕາມຂະແໜງການຍັງເຮັດບໍ່ໄດ້ດີ ມີປະກົດການທັກທ້ວງວ່າການຈັດຕັ້ງປະຕິບັດໂຄງການບໍ່ໄດ້ເອົາໃຈໃສ່ດຳເນີນຕາມລະບຽບການຂອງຂະແໜງການເຊັ່ນ:ມີການທັກທ້ວງສົງໃສວ່າມີແຮ່ທາດໃນອຸໂມງ ນ້ຳທີ່ໄຫຼອອກຈາກຈຸດເຈາະອຸໂມງ ຈຸດຖິ້ມດິນຂຸດຈາກອຸໂມງ ການຄຸ້ມຄອງແຮງງານ ແລະ ອື່ນໆ ຕໍ່ກັບບັນຫາດັ່ງກ່າວຍ້ອນຜູ້ຮັບເໝົາບໍ່ທັນໄດ້ຮັບການເຜີຍແຜ່ລະບຽບການຂອງແຕ່ລະຂະແໜງການກ່ຽວກັບການດຳເນີນຂັ້ນຕອນຕ່າງໆໃນການປະຕິບັດໂຄງການ.
ທ່ານ ຮອງລັດຖະມົນຕີກະຊວງ ໂຍທາທິການ ແລະ ຂົນສົ່ງ ໃຫ້ຮູ້ວ່າ: ການກໍ່ສ້າງທາງລົດໄຟລາວ-ຈີນ ແມ່ນມີຄວາມຄືບໜ້າສູງ, ມາຮອດປັດຈຸບັນ ບໍລິສັດຮັບເຫມົາໄດ້ມີການຕັ້ງແຄ້ມແບບສົມບູນແລ້ວ 100 ກວ່າແຫ່ງ, ສຳເລັດການຕັ້ງໂຮງງານເບຕົງ, ໂຮງງານຫລອມເຫລັກ ໃນທຸກຊ່ວງກໍ່ສ້າງ, ເຈາະອຸມົງ 48 ແຫ່ງ ຍາວ 3.500 ກ່ວາແມັດ ສ້າງທາງຍາວ 450 ກິໂລແມັດ ແລະ ດຶງສາຍໄຟຟ້າເຂົ້າໃນສະໜາມກໍ່ສ້າງໄດ້ແລ້ວຫລາຍກວ່າ 300 ກິໂລແມັດ, ໂດຍລວມເຫັນວ່າມີຄວາມຄືບໜ້າປະມານ 24% ຂອງແຜນການ.
