ລາວ-ຫວຽດນາມເພີ່ມທະວີການຮ່ວມມືວຽກງານກະສິກໍາ ແລະ ພັດທະນາຊົນນະບົດ

ກອງປະຊຸມພົບປະລະຫວ່າງກະຊວງກະສິກໍາ-ປ່າໄມ້ ແລະ ກະຊວງກະສິກໍາ ແລະພັດທະນາຊົນນະບົດ ສສ ຫວຽດນາມ ເພື່ອເສີ່ມຂະຫຍາຍການພົວພັນຮ່ວມມືສອງຝ່າຍ ໄດ້ມີຂຶ້ນໃນຕອນເຊົ້າວັນທີ 5 ກັນຍານີ້, ທີ່ນະຄອນຫລວງຮ່າໂນຍ, ຝ່າຍຫວຽດນາມນໍາໂດຍທ່ານ ຫງວຽນ ຊ້ວນເກື່ອງ ລັດຖະມົນຕີກະຊວງກະສິກໍາ ແລະ ພັດທະນາຊົນນະບົດ, ຝ່າຍລາວນໍາໂດຍທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້, ມີຜູ້ຕາງໜ້າເອກອັກຄະລັດຖະທູດລາວປະຈໍາຫວຽດນາມເຂົ້າຮ່ວມນໍາດ້ວຍ.

ເພື່ອທົບທວນຄືນການຈັດຕັ້ງປະຕິບັດວຽກງານການຮ່ວມມືກ່ຽວກັບວຽກງານກະສິກໍາ ແລະ ປ່າໄມ້ ແນ່ໃສ່ຖອດຖອນບົດຮຽນເຊິ່ງກັນ ແລະ ກັນໃນວຽກງານດັ່ງກ່າວ, ຊຶ່ງອັນພົ້ນເດັ່ນແມ່ນ: ການຈັດຕັ້ງປະຕິບັດວຽກງານ 8 ໂຄງການຢູ່ໃນ ສປປ ລາວ ໂດຍນໍາໃຊ້ທຶນຊ່ວຍເຫລືອລ້າຈາກລັດຖະບານຫວຽດນາມລວມມີມູນຄ່າ 70 ຕື້ດົງ ຫລືປະມານ 3 ລ້ານກວ່າໂດລາສະຫະລັດ.

ໃນກອງປະຊຸມຍັງເປັນເອກະພາບສືບຕໍ່ໃຫ້ການຊ່ວຍເຫລືອບາງໂຄງການຕື່ມ ເປັນຕົ້ນ: ໂຄງການສ້າງຄອບຄົວຕົວແບບຂອງການຈັດຕັ້ງປະຕິບັດຍຸດທະສາດພັດທະນາກະສິກໍາຊົນນະບົດ ແລະ ຊາວກະສິກອນ, ໂຄງການຍົກລະດັບດ່ານກັກກັນພືດ ແລະ ສັດ, ໂຄງການສ້າງສູນບໍລິການເຕັກນິກ ແລະ ໂຄງການຊົນລະປະທານອີກຈໍານວນໜື່ງ, ຊື່ງລ້ວນແຕ່ເປັນໂຄງການທີ່ມີຄວາມສໍາຄັນໃນການຍົກລະດັບ ແລະ ປັບປຸງຊີວິດການເປັນຢູ່ຂອງປະຊາຊົນ ເພື່ອຮັບປະກັນໃຫ້ວຽກງານການຮ່ວມມືດັ່ງກ່າວໄດ້ຮັບການຈັດຕັ້ງປະຕິບັດສໍາເລັດຜົນ ທັງສອງຝ່າຍໄດ້ຮ່ວມກັນລົງນາມເຊັນບົດບັນທຶກການຕົກລົງດັ່ງກ່າວອີກດ້ວຍ.