ເວເນຊູເອລາບໍ່ສົນຄຳຂູ່ຂອງ ທ່ານ ທຣຳ ເດີນໜ້າຈັດເລືອກຕັ້ງ ສະພາຮ່າງລັດຖະທຳມະນູນ
ລັດຖະບານເວເນຊູເອລາ ຢືນຢັນຈັດການເລືອກຕັ້ງສະພາປະຊາຊົນ ເພື່ອຮ່າງລັດຖະທຳມະນູນຕາມກຳນົດເກົ່າ ຄືໃນວັນທີ 30 ກໍລະກົດນີ້, ເຖິງວ່າປະທານາທິບໍດີອາເມລິກາຂູ່ຈະໃຊ້ມາດຕະການຂວ້ຳບາດທາງເສດຖະກິດກໍຕາມ.
ສຳນັກຂ່າວຕ່າງປະເທດລາຍງານຈາກນະຄອນຫລວງກາຣາກັດ ປະເທດເວເນຊູເອລາ ໃນວັນທີ 19 ກໍລະກົດນີ້ວ່າ: ທ່ານ ຊາມູເອລ ມອນກາດາ ລັດຖະມົນຕີກະຊວງການຕ່າງປະເທດເວເນຊູເອລາ ຖະແຫລງໃນວັນທີ 18 ກໍລະກົດນີ້ ຢືນຢັນຈັດການເລືອກຕັ້ງສະພາປະຊາຊົນ ເພື່ອຮ່າງລັດຖະທຳມະນູນສະບັບໃໝ່ ຕາມກຳນົດການເກົ່າຄືໃນວັນທີ 30 ກໍລະກົດນີ້ ໂດຍຈະບໍ່ມີສິ່ງໃດມາຢຸດໄດ້ ແລະ ກ່າວອີກວ່າ: ປະຊາຊົນເວເນຊູເອລາທຸກຄົນມີເສລີພາບ ຮ່ວມສາມັກຄີກັນໃນການຜະເຊີນກັບໄພຄຸກຄາມຈາກພາຍນອກ.
+ ເວເນຊູເອລາບໍ່ສົນຄຳຂູ່ຂອງທ່ານ ທຣຳ ເດີນໜ້າຈັດເລືອກຕັ້ງສະພາຮ່າງລັດຖະທຳມະນູນ
ຄຳຖະແຫລງຂອງທ່ານ ມອນກາດາ ຖືເປັນການຕອບໂຕ້ຄຳເຕືອນຂອງປະທານາທິບໍດີ ໂດນັນ ທຣຳ ເຊິ່ງກ່າວໃນວັນທີ 17 ກໍລະກົດວ່າ: ອາເມລິກາອາດໃຊ້ມາດຕະການສາຍຟ້າແມບຕໍ່ເສດຖະກິດຂອງເວເນຊູເອລາທີ່ເອີ້ນວ່າ: ລົ້ມສະຫລາຍຢູ່ແລ້ວ, ຖ້າມີການເລືອກຕັ້ງສະພາປະຊາຊົນເກີດຂຶ້ນໃນວັນທີ 30 ກໍລະກົດນີ້ ໂດຍຄວາມພະຍາຍາມຈັດການເລືອກຕັ້ງດັ່ງກ່າວເປັນສິ່ງທີ່ທ່ານ ມາດູໂຣ ຢືນຢັນວ່າຈະເປັນການສ້າງຄວາມປອງດອງໃຫ້ເກີດຂຶ້ນ ເນື່ອງຈາກເປີດໂອກາດໃຫ້ຕົວແທນຈາກທຸກພາກສ່ວນຂອງສັງຄົມມີສ່ວນຮ່ວມໃນການຈັດຮ່າງລັດຖະທຳມະນູນສະບັບໃໝ່ ແທນສະບັບປັດຈຸບັນທີ່ໃຊ້ມາແຕ່ປີ 1999.
ເຖິງຢ່າງໃດກໍຕາມ, ສະຫະປະຊາຊາດ (UN), ສະຫະພາບເອີຣົບ (EU) ແລະ ອົງການບັນດາລັດຢູ່ອາເມລິກາ (OAS) ຕະຫລອດຮອດປະເທດຮ່ວມພາກພື້ນ ທັງອາກຊັງຕິນ, ບຣາຊິນ ແລະ ແມັກຊິກ ລວມທັງການາດາ ຕ່າງສະແດງຄວາມກັງວົນ ແລະ ຮຽກຮ້ອງໃຫ້ທ່ານ ມາດູໂຣ ຍົກເລີກຈັດການເລືອກຕັ້ງ, ສ່ວນພັກຝ່າຍຄ້ານຂອງເວເນຊູເອລາເບິ່ງວ່າເປັນຄວາມພະຍາຍາມຂອງທ່ານ ມາດູໂຣ ໃນການຄວບຄຸມອຳນາດໃຫ້ສາມາດຢູ່ໄດ້ຈົນຄົບວາລະໃນປີໜ້າ, ເຖິງວ່າປະຊາຊົນສ່ວນຫລາຍຕ້ອງການໃຫ້ທ່ານລາອອກ ແລະ ຈັດການເລືອກຕັ້ງໃໝ່ ໂດຍສະຖານະການປະທ້ວງທີ່ຍືດເຍື້ອມາແຕ່ເດືອນເມສາຜ່ານມາ ສົ່ງຜົນໃຫ້ມີຜູ້ເສຍຊີວິດຫລາຍກວ່າ 100 ຄົນ.
