ອາເມລິກາ-ສ.ເກົາຫລີ ເຕືອນຈະໃຊ້ແຜນຕອບໂຕ້ທັນທີ ຖ້າ ສປປ ເກົາຫລີ ທ້າທາຍອີກ

ສ.ເກົາຫລີ ແລະ ອາເມລິກາ ຕົກລົງກັນໃນວັນທີ 27 ເມສານີ້ວ່າ: ຈະໃຊ້ມາດຕະການລົງໂທດຕໍ່ ສປປ ເກົາຫລີ ທັນທີ, ຖ້າຍັງມີການທ້າທາຍອີກ. ຂະນະເຈົ້າໜ້າທີ່ ສປປ ເກົາຫລີ ປະກາດວ່າຈະເດີນໜ້າໂຄງການທົດລອງນິວ ເຄຼຍ ແລະ ລູກສອນໄຟ ເພື່ອຕອບໂຕ້ການເປັນປໍລະປັກຂອງອາເມລິກາ.

ການເຄື່ອນລະບົບປ້ອງກັນລູກສອນໄຟຂອງກອງທັບອາເມລິກາເຂົ້າມາຕິດຕັ້ງຢູ່ ສ.ເກົາຫລີ ມີຂຶ້ນກ່ອນກຳນົດ ທ່າມກາງສະພາບຢຸດສະງັກຈາກການທົດລອງອາວຸດນິວເຄຼຍ ແລະ ລູກສອນໄຟໄລຍະໄກຂອງ ສປປ ເກົາຫລີ ລວມທັງການຕໍ່ຕ້ານການຕິດຕັ້ງລະບົບປ້ອງກັນລູກສອນໄຟຢູ່ ສ.ເກົາຫລີ ແລະ ຄວາມບໍ່ພໍໃຈຈາກຈີນ. ທຳນຽບ ປະທານາທິບໍດີ ສ.ເກົາຫລີ ຖະແຫລງວ່າ: ສ.ເກົາຫລີ ແລະ ອາເມລິກາໃຫ້ສັນຍານຳກັນວ່າ: ຖ້າ ສປປ ເກົາຫລີ ທ້າທາຍທາງທະຫານອີກຈະໃຊ້ມາດຕະການລົງໂທດຕອບໂຕ້ທັນທີ ແລະ ເດີນໜ້າມະຕິໃໝ່ຈາກສະພາຄວາມ ໝັ້ນຄົງແຫ່ງສະຫະປະຊາຊາດ ເພື່ອຕອບໂຕ້ ສປປ ເກົາຫລີ. ພາຍຫລັງທ່ານ ກິມຄວນຈິນ ຜູ້ແທນເຈລະຈາ ສ.ເກົາຫລີ ໄດ້ຫາລືທາງໂທລະສັບກັບທ່ານ ເອດ ອາຣ ແມກມາສເຕີ ຜູ້ແທນເຈລະຈາຝ່າຍອາເມລິກາ.