ອາເມລິກາຂູ່ຂວ້ຳບາດ ທາງເສດຖະກິດຕໍ່ເວເນຊູເອລາ
ປະທານາທິບໍດີອາເມລິກາຂູ່ຈະໃຊ້ມາດຕະການຂວ້ຳບາດທາງເສດຖະກິດແບບສາຍຟ້າແມບຕໍ່ເວເນຊູເອລາ, ໃນຂະນະທີ່ພັກຝ່າຍຄ້ານກຽມປະລະວຽກປະທ້ວງໃນວັນທີ 20 ກໍລະກົດນີ້ ຫວັງເພີ່ມແຮງກົດດັນໃຫ້ລັດຖະບານລົ້ມແຜນການຮ່າງລັດຖະທຳມະນູນສະບັບໃໝ່.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 17 ກໍລະກົດນີ້ວ່າ: ປະທານາທິບໍດີ ໂດນັນ ທຣຳ ກ່າວໃນວັນທີ 17 ກໍລະກົດນີ້ວ່າ: ອາເມລິກາຈະບໍ່ມີທາງເມີນເສີຍຕໍ່ສະຖານະການຢູ່ເວເນຊູເອລາທີ່ກຳລັງຈະລົ້ມສະຫລາຍ ໂດຍປະນາມປະທານາທິບໍດີ ນິໂກລັດ ມາດູໂຣ ວ່າເປັນຜູ້ນຳທີ່ໂຫດຮ້າຍ ແລະ ຝັນຈະເປັນຜະເດັດການ. ທັງນີ້ ທ່ານ ທຣຳ ຍັງບໍ່ໄດ້ກ່າວຢ່າງຈະແຈ້ງວ່າຈະໃຊ້ມາດຕະການໃດຕໍ່ລັດຖະບານກາຣາກັດ, ແຕ່ການກ່າວວ່າອາດໃຊ້ມາດຕະການສາຍຟ້າແມບທາງເສດຖະກິດມີທ່າອ່ຽງຈະຍິ່ງສົ່ງຜົນກະທົບຕໍ່ສະຖານະການການເມືອງ ແລະ ເສດຖະກິດຂອງເວເນຊູເອລາທີ່ຢູ່ໃນຂັ້ນວິກິດແລ້ວ.
ລາຍງານຂອງກະຊວງພະລັງງານອາເມລິກາລະບຸວ່າ: ຍັງມີການນຳເຂົ້ານ້ຳມັນດິບຈາກເວເນຊູເອລາປີລະ 270 ລ້ານບາເຣວ ໃນຮອບທົດສະວັດຫລ້າສຸດ ແຕ່ເປັນປະລິມານທີ່ຫລຸດລົງປະມານ 1 ໃນ 3 ເມື່ອທຽບໃສ່ໄລຍະ 10 ປີຜ່ານມາ.
ເຖິງຢ່າງໃດກໍຕາມ, ຄຳຖະແຫລງດັ່ງກ່າວຂອງຜູ້ນຳອາເມລິກາເກີດຂຶ້ນໃນເວລາດຽວກັນທີ່ພັນທະມິດພັກຮ່ວມຝ່າຍຄ້ານປະກາດປະລະວຽກປະທ້ວງເປັນເວລາ 24 ຊົ່ວໂມງ ໃນວັນທີ 20 ກໍລະກົດນີ້ ເພື່ອເພີ່ມແຮງກົດດັນໃຫ້ແກ່ທ່ານ ມາດູໂຣ ທີ່ຍັງຢືນຢັນຈັດການເລືອກຕັ້ງສະມາຊິກສະພາປະຊາຊົນເພື່ອປະຕິຮູບລັດຖະທຳມະນູນໃນວັນທີ 30 ກໍລະກົດນີ້, ພາຍຫລັງພັກຝ່າຍຄ້ານຈັດການລົງປະຊາມະຕິທາງສັນຍາລັກໃນອາທິດຜ່ານມາ ເພື່ອຄັດຄ້ານການເດີນໜ້າດັ່ງກ່າວຂອງລັດຖະບານ ໂດຍມີປະຊາຊົນເຂົ້າຮ່ວມການລົງຄະແນນສູງເກືອບ 7,2 ລ້ານຄົນ ທ່າມກາງການປະທ້ວງຂັບໄລ່ລັດຖະບານທີ່ຍືດເຍື້ອມາແຕ່ເດືອນເມສາຜ່ານມາ ແລະ ມີຜູ້ເສຍຊີວິດແລ້ວຫລາຍກວ່າ 100 ຄົນ.
