ສານປະຊາຊົນນະຄອນຫລວງວຽງຈັນຕັດສິນປະຫານຊີວິດຜູ້ຄ້າຢາເສບຕິດ

ໃນວັນທີ 5 ກໍລະກົດນີ້, ສານປະຊາຊົນນະຄອນຫລວງວຽງຈັນ ໄດ້ຕັດສິນປະຫານຊີວິດນາງ ອ່ອນຈັນ ພົງປະດິດ ອາຍຸ 42 ປີຢູ່ບ້ານນາທົ່ມ ເມືອງໄຊທານີ ນະຄອນຫລວງວຽງຈັນ ໃນຂໍ້ຫາຄ້າຂາຍຢາເສບຕິດ ໂດຍຖືກເຈົ້າໜ້າທີ່ຈັບຕົວໄດ້ເມື່ອທ້າຍເດືອນມັງກອນ 2015 ຜ່ານມາ ພ້ອມຂອງກາງຢາບ້າ  ຈໍານວນ 30 ມັດ.

ຄະດີມີຢູ່ວ່າ: ໃນວັນທີ 29 ມັງກອນ 2015 ໄດ້ມີຄົນຕິດຕໍ່ຊື້ຢາບ້ານຳຜູ້ກ່ຽວຈຳນວນ 30 ມັດ ໃນລາຄາ 73.000 ບາດ (ສະກຸນເງິນໄທ) ຕໍ່ມັດຢູ່ຫ້ອງເຊົ່າຂອງທ້າວ ຊຽງອ່ອນຈັນ ຢູ່ບ້ານທົ່ງປົ່ງ ເມືອງສີໂຄດຕະບອງ. ຈາກນັ້ນຜູ້ກ່ຽວຈຶ່ງໄດ້ໂທລະສັບຫານາງ ແສງ ແລະ ທ້າວ ສົມ ຢູ່ເມືອງສິງ ແຂວງຫລວງນ້ຳທາ ໃຫ້ເອົາຢາບ້າຈໍານວນດັ່ງກ່າວມາສົ່ງໃຫ້ຕົນຢູ່ເຂດບ້ານທົ່ງປົ່ງ ເມືອງສີໂຄດຕະບອງ ແລະ ພາຍຫລັງໄດ້ຢາບ້າແລ້ວກໍເອົາໄປສົ່ງໃຫ້ລູກຄ້າທີ່ຕິດຕໍ່ຊື້ຢູ່ເຂດບ້ານຊຳເກດ ເມືອງນາຊາຍທອງ ນະຄອນຫລວງວຽງຈັນ ໃນວັນທີ 30 ມັງກອນ 2015 ໂດຍໄດ້ເອົາຢາບ້າທັງໝົດຊຸກເຊື່ອງໄວ້ໃນແກັດເຈ້ຍແລ້ວໃສ່ລົດກະບະວີໂກ້ ໝາຍເລກທະບຽນ ມນ 1666 ກໍາແພງນະຄອນ ໄປສົ່ງໃຫ້ລູກຄ້າ, ພໍມາຮອດເຂດປ້ຳນ້ຳມັນເຂດບ້ານຊຳເກດກໍໄດ້ຖືກເຈົ້າໜ້າທີ່ສະແດງຕົວເຂົ້າຈັບກຸມ ພ້ອມຂອງກາງດັ່ງກ່າວ. ນອກຈາກນີ້ ເຈົ້າໜ້າທີ່ຍັງໄດ້ຍຶດຊັບສິນຂອງຜູ້ກ່ຽວທີ່ໄດ້ມາຈາກການຄ້າຢາເສບຄ້າອີກຫລາຍລາຍການ.

ຂ່າວໃຫ້ຮູ້ຕື່ມວ່າ: ເມື່ອບໍ່ດົນມານີ້, ເຈົ້າໜ້າທີ່ສະກັດກັ້ນ ແລະ ຕ້ານຢາເສບຕິດກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ ໄດ້ນຳກຳລັງເຂົ້າຈັບເປົ້າໝາຍຄ້າຂາຍຢາເສບຕິດລາຍໃຫຍ່ຢູ່ເຮືອນພັກແຫ່ງໜຶ່ງເຂດບ້ານໜອງພະຍາ ເມືອງໄຊທານີ ນະຄອນຫລວງວຽງຈັນ ແລະ ສາມາດຈັບຕົວເປົ້າໝາຍ ຄືທ້າວ ໄມແອ່ນ ອາຍຸ 27 ປີຢູ່ບ້ານຊຽງກົກໃໝ່ ເມືອງລອງ ແຂວງຫລວງນ້ຳທາ, ນາງ ທຳມາ ອາຍຸ 43 ປີຢູ່ບ້ານໜອງທາ ເມືອງຈັນທະບູລີ ນະຄອນຫລວງວຽງຈັນ, ທ້າວ ໄມຫລ້າ ອາຍຸ 30 ປີ ແລະ ນາງ ອ່ອນ ອາຍຸ 28 ປີຢູ່ບ້ານຊຽງລຽບ ເມືອງທ່າຂີ້ເຫລັກ ແຂວງຊຽງຕຸງ ປະເທດມຽນມາ ພ້ອມຂອງກາງຢາບ້າຈຳນວນ 54 ພັນເມັດ, ໂທລະສັບມືຖື 6 ໜ່ວຍ, ລົດໃຫຍ່ 1 ຄັນ, ພ້ອມເງິນຈຳນວນໜຶ່ງທີ່ໃຊ້ເຂົ້າໃນການເຄື່ອນໄຫວກະທໍາຜິດຄັ້ງນີ້ ຈຶ່ງໄດ້ຍຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ.

ຄະດີຢາເສບຕິດລາຍນີ້, ເຈົ້າໜ້າທີ່ຈະຂະຫຍາຍຜົນຫາຜູ້ຮ່ວມຂະບວນການ ເພື່ອຕິດຕາມຈັບໄປດຳເນີນຄະດີຕາມຂັ້ນຕອນຂອງກົດໝາຍ.