ສານປະຊາຊົນນະຄອນຫລວງຕັດສີນລົງໂທດຜູ້ຄອບຄອງອາວຸດເສິກຜິດກົດໝາຍ

ໃນວັນທີ 11 ກໍລະກົດນີ້, ສານປະຊາຊົນນະຄອນຫລວງວຽງຈັນໄດ້ລົງໂທດທ້າວ ລີນາ ອາຍຸ 23 ປີຢູ່ບ້ານຕານມີໄຊ, ເມືອງໄຊທານີ, ຈໍາຄຸກເປັນເວລາ 1 ປີ 6 ເດືອນ ແລະ ທ້າວ ອານຸລັກ ອາຍຸ 29 ປີຢູ່ບ້ານຕານມີໄຊ ເຊັ່ນກັນ ໃຫ້ຈໍາຄຸກເປັນເວລາ 2 ປີ, ພ້ອມປັບໃໝ 1 ລ້ານກີບ, ໃນຂໍ້ຫາມີອາວຸດເສິກ(ລູກປືນ) ໄວ້ຄອບຄອງບໍ່ຖືກຕ້ອງຕາມກົດໝາຍ.

ຄະດີມີຢູ່ວ່າ: ໃນວັນທີ 19 ມີນາ 2016, ທ້າວ ລີນາ ໄດ້ໄປຫລີ້ນເກມຢູ່ເຂດບ້ານຄຳຮຸ່ງ, ເມືອງໄຊທານີ ແລະ ທ້າວ ອານຸລັກ ໄດ້ເອົາແມັກປືນ K59 ພ້ອມລູກປືນຈຳນວນໜຶ່ງມາມັດຈໍານໍາທ້າວລີນາ ແລະ ໃນລະຫວ່າງຂີ່ລົດເມືອເຮືອນໄດ້ຖືກເຈົ້າໜ້າທີ່ກັກລົດ ແລະ ກວດພົບລູກປືນດັ່ງກ່າວຈຶ່ງໄດ້ຈັບຕົວມາສືບສວນ-ສອບສວນ ແລະ ໄດ້ຊັກທອດຫາທ້າວ ອານຸລັກ ເຈົ້າໜ້າທີ່ຈຶ່ງນໍາຈັບມາດຳເນີນຄະດີຕາມລະບຽບກົດໝາຍ.

ຜ່ານການສືບສວນ-ສອບສວນຂອງເຈົ້າໜ້າທີ່ທ້າວ ອານຸລັກ ຮັບສາລະພາບວ່າ: ອາວຸດດັ່ງກ່າວເປັນຂອງຕົນແທ້, ໂດຍໄດ້ມັດຈຳນໍາທ້າວ ລີນາ ເພື່ອເອົາເງີນຊື້ຢາເສບຕິດມາເສບ. ຊຶ່ງຜ່ານການສືບສວນ-ສອບສວນ ໃນທີ່ປະຊຸມສານ, ຈຶ່ງໄດ້ຕັດສິນລົງໂທດ ພວກກ່ຽວຕາມລະບຽບກົດໝາຍ.

ສານປະຊາຊົນນະຄອນຫລວງວຽງຈັນ ໃຫ້ຮູ້ວ່າ: ໃນ 6 ເດືອນຜ່ານມາມີຄະດີເຂົ້າມາສານຫລາຍກວ່າ 550 ເລື່ອງ ແລະ ລວມກັບຄະດີທີ່ຄ້າງມາມີຫລາຍກວ່າພັນເລື່ອງ, ໃນນີ້ສາມາດແກ້ໄຂໄດ້ຫລາຍກວ່າ 560 ເລື່ອງ, ກຳລັງຄົ້ນຄວ້າ 555 ເລື່ອງ, ສ່ວນໃຫຍ່ແມ່ນຄະດີຢາເສບຕິດ ແລະ ລັກຊັບພົນລະເມືອງ.