ສປປ ເກົາຫລີ ຊ້ອມຍິງປືນໃຫຍ່ສະຫລອງວັນສ້າງຕັ້ງກອງທັບ
ເຊອຸນ 25 ເມສາ: ລາຍງານລະບຸວ່າ: ສປປ ເກົາຫລີ ຊ້ອມຍິງປືນໃຫຍ່ ເນື່ອງໃນໂອກາດວັນສ້າງຕັ້ງກອງທັບປະຊາຊົນເກົາຫລີຄົບຮອບ 85 ປີ ແລະ ຫລັງສຸດຍັງບໍ່ມີສັນຍານວ່າ ຈະມີການທົດລອງຍິງລູກສອນໄຟໃນວັນທີ 25 ເມສານີ້.
ກ່ອນໜ້ານີ້, ມີການຄາດກະວ່າ: ສປປ ເກົາຫລີ ອາດຈະມີການທົດລອງອາວຸດນິວເຄຼຍຄັ້ງທີ 6 ຫລື ຍິງລູກສອນໄຟເນື່ອງໃນໂອກາດວັນສ້າງຕັ້ງກອງທັບ, ແຕ່ຍັງບໍ່ມີເຫດການດັ່ງກ່າວເກີດຂຶ້ນ. ຂະນະທີ່ກະຊວງປ້ອງກັນປະເທດ ສ.ເກົາຫລີ ລະບຸວ່າ: ຍັງບໍ່ພົບການເຄື່ອນໄຫວຜິດປົກກະຕິຢູ່ ສປປ ເກົາຫລີ.
ສ່ວນສຳນັກຂ່າວຢອນຮັບຂອງ ສ.ເກົາຫລີ ລາຍງານໂດຍອ້າງແຫລ່ງຂ່າວລັດຖະບານທີ່ບໍ່ໄດ້ຮັບການເປີດເຜີຍຊື່ລະບຸວ່າ: ສປປ ເກົາຫລີ ຊ້ອມຍິງປືນໃຫຍ່ເທື່ອໃຫຍ່ທີ່ສຸດເທົ່າທີ່ເຄີຍມີມາ ເນື່ອງໃນໂອກາດວັນສ້າງຕັ້ງກອງທັບຢູ່ເມືອງວອນຊອນທາງຕາເວັນອອກຂອງປະເທດ.
