ວຸດທິສະພາອາເມລິກາຜ່ານມາດຕະການ ຂວ້ຳບາດຣັດເຊຍຊຸດໃໝ່
ວຸດທິສະພາອາເມລິກາ (ສະພາສູງ) ອາເມລິກາມີມະຕິ 98 ຕໍ່ 2 ສຽງ ຜ່ານມາດຕະການຂວ້ຳບາດຊຸດໃໝ່ຕໍ່ຣັດເຊຍ, ອີຣານ ແລະ ສປປ ເກົາຫລີ ທ່າມກາງສຽງຄັດຄ້ານຈາກທຳນຽບຂາວ.
ພາຍຫລັງຕົ້ນອາທິດນີ້, ຮ່າງກົດໝາຍສະບັບນີ້ໄດ້ຮັບສຽງສະໜັບສະໜູນຢ່າງຫລວງຫລາຍຈາກການລົງມະຕິໃນສະພາຜູ້ແທນລາສະດອນ (ສະພາຕໍ່າ) ໂດຍທ່ານ ພອລ ໄຣອັນ ປະທານສະພາຕໍ່າອາເມລິກາ ລະບຸວ່າ: ກົດໝາຍນີ້ຈະຊ່ວຍເພີ່ມຂໍ້ຈຳກັດຕໍ່ຝ່າຍກົງກັນຂ້າມທີ່ເປັນອັນຕະລາຍ ເພື່ອຊ່ວຍໃຫ້ຊາວອາເມລິກາປອດໄພຍິ່ງຂຶ້ນ.
ສ່ວນຂັ້ນຕອນຕໍ່ໄປພາຍຫລັງທັງ 2 ສະພາລົງມະຕິແລ້ວ ຄືການສົ່ງໃຫ້ປະທານາທິບໍດີລົງນາມ. ເຖິງຢ່າງໃດກໍຕາມ, ຜ່ານມາ ປະທານາທິບໍດີ ໂດນັນ ທຣຳ ພະຍາຍາມຈະພັດທະນາການພົວພັນໃຫ້ໃກ້ຊິດກັບຣັດເຊຍຍິ່ງຂຶ້ນ ແລະ ຍັງມີອຳນາດໃນການຢັບຢັ້ງກົດໝາຍ.
ແຕ່ອຳນາດຂອງປະທານາທິບໍດີໃນການຢັບຢັ້ງກົດໝາຍອາດຖືກຂັດຂວາງໄດ້ອີກ, ຖ້າທັງສອງສະພາຕໍ່າ ແລະ ສະພາສູງ ລົງຄະແນນສະໜັບສະໜູນເກີນ 2 ໃນ 3 ເຊິ່ງຈາກການລົງຄະແນນອາທິດນີ້ ສະແດງໃຫ້ເຫັນແລ້ວວ່າມີນັກການເມືອງພຽງບໍ່ເທົ່າໃດຄົນເທົ່ານັ້ນທີ່ຕໍ່ຕ້ານຮ່າງກົດໝາຍທີ່ຂຽນຂຶ້ນດ້ວຍເຈດຕະນາເພື່ອລົງໂທດຣັດເຊຍເພີ່ມອີກ ຈາກກໍລະນີຍຶດຄອງດິນແດນໄຄຣເມຍໃນປີ 2014.
ຂໍ້ຖົກຖຽງເລື່ອງມາດຕະການຂວ້ຳບາດນີ້ ເກີດຂຶ້ນໃນໄລຍະທີ່ມີການສອບສວນກໍລະນີກ່າວຫາວ່າຣັດເຊຍແຊກແຊງການເລືອກຕັ້ງປະທານາທິບໍດີອາເມລິກາ ໃນປີ 2016 ເຖິງວ່າປະທານາທິບໍດີ ທຣຳ ປະຕິເສດວ່າຣັດເຊຍບໍ່ໄດ້ມີສ່ວນກ່ຽວຂ້ອງກັບການຫາສຽງຂອງທ່ານ, ແຕ່ສື່ມວນຊົນສາຍການເມືອງຫລາຍຄົນເບິ່ງວ່າຄວາມພະຍາຍາມຢັບຢັ້ງມາດຕະການຂວ້ຳບາດ ອາດເຮັດໃຫ້ເກີດຄວາມກັງວົນໃຈວ່າປະທານາທິບໍດີອາເມລິກາ ໃຫ້ການສະໜັບສະໜູນລັດຖະບານຣັດເຊຍຫລາຍເກີນໄປ.
