ຣັດເຊຍເບິ່ງວ່າການຂວ້ຳບາດ ຈາກອາເມລິກາເປັນສົງຄາມ ການຄ້າເຕັມຮູບແບບ
ນາຍົກລັດຖະມົນຕີ ດີມີຕຣີ ເມກເວເດຟ ຂອງຣັດເຊຍ ຊີ້ວ່າກົດໝາຍຂວ້ຳບາດຣັດເຊຍຮອບໃໝ່ຂອງອາເມລິກາ ເປັນການປະກາດສົງຄາມການຄ້າເຕັມຮູບແບບ ແລະ ເບິ່ງວ່າການລົງນາມໂດຍປະທານາທິບໍດີອາເມລິກາ ສະແດງເຖິງຄວາມອ່ອນແອຂອງທ່ານ ທຣຳ ທີ່ຖືກລັດຖະສະພາເຮັດໃຫ້ຂາຍໜ້າ.
ກົດໝາຍສະບັບໃໝ່ນີ້ມີເປົ້າໝາຍເພື່ອລົງໂທດຣັດເຊຍ ກໍລະນີທີ່ຖືກກ່າວຫາວ່າແຊກແຊງການເລືອກຕັ້ງອາເມລິກາ ໃນປີ 2016 ແລະ ການຍຶດດິນແດນໄຄຣເມຍຈາກອູແກຣນ.
+ ຣັດເຊຍຕຳໜິອາເມລິກາທີ່ປະນາມ ປະເທດຕົນ ແລະ ຈີນໃນບັນຫາແຫລມເກົາຫລີ
+ ທ່ານ ປູຕິນ ສັ່ງຫລຸດຈຳນວນ ນັກການທູດອາເມລິກາຢູ່ຣັດເຊຍຄັ້ງໃຫຍ່
+ ວຸດທິສະພາອາເມລິກາຜ່ານມາດຕະການ ຂວ້ຳບາດຣັດເຊຍຊຸດໃໝ່
+ ສະພາຕໍ່າອາເມລິກາເຫັນພ້ອມ ມາດຕະການຂວ້ຳບາດຣັດເຊຍຮອບໃໝ່
ທັງນີ້, ປະທານາທິບໍດີ ໂດນັນ ທຣຳ ກ່າວຫາລັດຖະສະພາວ່າໃຊ້ອຳນາດເກີນຂອບເຂດໃນການຜ່ານກົດໝາຍດັ່ງກ່າວ ໂດຍລະບຸວ່າກົດໝາຍຕໍ່ຕ້ານສັດຕູຂອງອາເມລິກາດ້ວຍການຂວ້ຳບາດ (Countering America’s Adversaries Through Sanctions Act) “ມີຂໍ້ບົກພ່ອງຢ່າງຮຸນແຮງ”.
ກົດໝາຍສະບັບນີ້ ຍັງລວມທັງການຂວ້ຳບາດອີຣານ ແລະ ສປປ ເກົາຫລີ ນຳອີກ ໂດຍສຳນັກຂ່າວອິສນາ ເຊິ່ງເປັນສື່ທາງການຂອງອີຣານ ລະບຸວ່າ: ການຂວ້ຳບາດຮອບໃໝ່ລະເມີດຂໍ້ຕົກລົງນິວເຄຼຍ ແລະ ລັດຖະບານອີຣານຈະຕອບໂຕ້ຢ່າງເໝາະສົມ, ແຕ່ຍັງບໍ່ມີປະຕິກິລິຍາຕອບໂຕ້ຈາກ ສປປ ເກົາຫລີ.
ນາຍົກລັດຖະມົນຕີ ດີມີຕຣີ ເມດເວເດຟ ຂອງຣັດເຊຍ ລະບຸຂໍ້ຄວາມໃນເຟສບຸກສ່ວນຕົວ ວັນທີ 2 ສິງຫານີ້ວ່າ: ການຂວ້ຳບາດທຳລາຍຄວາມຫວັງທີ່ຈະປັບປຸງການພົວພັນກັບລັດຖະບານໃໝ່ຂອງອາເມລິກາ ໂດຍກົດໝາຍຂວ້ຳບາດທີ່ຜ່ານການຮັບຮອງແລ້ວ ຈະມີຜົນບັງຄັບໃຊ້ຕໍ່ໄປອີກຫລາຍທົດສະວັດ ຍົກເວັ້ນວ່າຈະມີປະຕິຫານເກີດຂຶ້ນ.
ທ່ານ ເມດເວເດຟ ກ່າວເຕືອນອີກວ່າ: ຕໍ່ຈາກນີ້ໄປ ທ່ານຈະເນັ້ນເປົ້າໝາຍໃສ່ການກຳຈັດປະທານາທິບໍດີ ໂດນັນ ທຣຳ ຈາກອຳນາດ ເຊິ່ງທ່ານເອີ້ນວ່າເປັນ “ຕົວແປທີ່ບໍ່ໄດ້ຢູ່ໃນລະບົບ”.
ທັງນີ້, ຣັດເຊຍປະຕິເສດມາໂດຍຕະຫລອດວ່າ: ບໍ່ມີສ່ວນເຂົ້າໄປແຊກແຊງການເລືອກຕັ້ງອາເມລິກາ ແລະ ກ່ອນໜ້າປະທານາທິບໍດີອາເມລິກາ ລົງນາມກົດໝາຍສະບັບນີ້, ໂຄສົກລັດຖະບານຣັດເຊຍ ກ່າວວ່າ: ນີ້ບໍ່ແມ່ນຂ່າວໃໝ່ ເພາະບັນຫາຄື ຮ່າງກົດໝາຍສະບັບນີ້ຈະຕ້ອງຖືກປະກາດໃຊ້ຢ່າງແນ່ນອນ ບໍ່ວ່າປະທານາທິບໍດີຈະລົງນາມ ຫລື ບໍ່ ເຊິ່ງອາທິດຜ່ານມາ, ພາຍຫລັງທັງສອງສະພາຂອງອາເມລິກາ ລົງມະຕິຜ່ານຮ່າງກົດໝາຍສະບັບດັ່ງກ່າວ, ທາງລັດຖະບານຣັດເຊຍໄດ້ອອກມາຕອບໂຕ້ແລ້ວຄັ້ງໜຶ່ງ ໂດຍສັ່ງຂັບໄລ່ເຈົ້າໜ້າທີ່ການທູດອາເມລິກາ 755 ຄົນອອກຈາກປະເທດ.
ສ່ວນລັດຖະບານຂອງອີກຫລາຍປະເທດໃນເອີຣົບ ລວມທັງເຢຍລະມັນ ກຳລັງກັງວົນເຖິງຜົນກະທົບທີ່ອາດຈະຕາມມາຈາກມາດຕະການຂວ້ຳບາດຣັດເຊຍສະບັບນີ້ ໂດຍທ່ານ ໝອງ ຄລັອກ ຍຸງເກີ ປະທານຄະນະກຳມາທິການເອີຣົບ ເຕືອນວ່າ: ອາດເກີດຜົນກະທົບຝ່າຍດຽວຕໍ່ຜົນປະໂຫຍດດ້ານພະລັງງານຂອງ EU.
ໃນການລົງນາມກົດໝາຍຕໍ່ຕ້ານສັດຕູຂອງອາເມລິກາໂດຍການຂວ້ຳບາດ, ປະທານາທິບໍດີ ທຣຳ ໄດ້ຂຽນຂໍ້ຄວາມວ່າ: ມີຂໍ້ບົກພ່ອງຢ່າງຮຸນແຮງເອົາໄວ້ ໂດຍເປັນການກ່າວຫາທັງສອງສະພາ ວ່າເຮັດເກີນຂອບເຂດອຳນາດຕາມລັດຖະທຳມະນູນ ແລະ ລະບຸວ່າ: ໃນຖານະປະທານາທິບໍດີ ຂ້າພະເຈົ້າສາມາດຫາຂໍ້ຕົກລົງກັບຕ່າງປະເທດໃຫ້ດີກວ່າທີ່ຄອງເກຣສເຮັດໄດ້.
ສ່ວນທ່ານ ລິນເຊ ເກຣແຣມ ສະມາຊິກວຸດທິສະພາຈາກພັກລີພັບບລິກັນ ກ່າວຍ້ອງຍໍກົດໝາຍສະບັບນີ້ວ່າ: ຈະເຮັດໃຫ້ປະທານາທິບໍດີ ທຣຳ ມີທາງເລືອກຈຳກັດ ເນື່ອງຈາກຈຳນວນສຽງລົງຄະແນນສະໜັບສະໜູນຫລາຍເກີນກວ່າທີ່ປະທານາທິບໍດີຈະໃຊ້ອຳນາດຢັບຢັ້ງໄດ້ ເຊິ່ງທ່ານລະບຸກັບສຳນັກຂ່າວ CNN ວ່າ: ປະທານາທິບໍດີ ປູຕິນ ເຮັດສິ່ງທີ່ບໍ່ມີໃຜໃນອາເມລິກາສາມາດເຮັດໄດ້, ທ່ານເຮັດໃຫ້ສະພາຄອງເກຣດຫັນມາເປັນໜຶ່ງດຽວກັນ.
ສ່ວນທ່ານ ຄອນສແຕນຕິນ ໂຄຊາເຊຟ ສະມາຊິກວຸດທິສະພາຂອງຣັດເຊຍ ກ່າວວ່າ: ກໍລະນີທີ່ປະທານາທິບໍດີ ທຣຳ ບໍ່ຕໍ່ສູ້ກັບສະພາເທົ່າກັບວ່າຍອມເສຍໄຊ.
ສຳລັບຜູ້ນຳຂອງທັງສອງປະເທດ ເຄີຍພົບກັນຄັ້ງທຳອິດໃນກອງປະຊຸມ G20 ຢູ່ປະເທດເຢຍລະມັນ ໃນເດືອນກໍລະກົດຜ່ານມາ ທ່າມກາງຂໍ້ກ່າວຫາຈາກໜ່ວຍງານຂ່າວຂອງອາເມລິກາວ່າ: ຣັດເຊຍແຊກແຊງການເລືອກຕັ້ງອາເມລິກາ ເພື່ອຊ່ວຍໃຫ້ປະທານາທິບໍດີ ທຣຳ ຊະນະການເລືອກຕັ້ງ ເຊິ່ງກຳລັງເປັນກໍລະນີທີ່ຢູ່ໃນຂະບວນການກວດສອບຂອງລັດຖະສະພາ ແລະ ຜູ້ກວດກາພິເສດ.
