ມາເລເຊຍ, ອິນໂດເນເຊຍ ແລະ ຟີລິບປິນ ຈະຮ່ວມກັນລາດຕະເວນນອກເກາະມິນດາເນົາ
ມາເລເຊຍ, ອິນໂດເນເຊຍ ແລະ ຟີລິບປິນ ຈະຮ່ວມກັນລາດຕະເວນນ່ານນ້ຳນອກເກາະມິນດາເນົາ ທາງຕອນໃຕ້ຂອງຟີລິບປິນ ໃນເດືອນນີ້ ເພື່ອສະກັດກັ້ນໄພຄຸກຄາມຈາກນັກຮົບກຸ່ມລັດອິສລາມ (IS).
ທ່ານ ຮິຊຳນຸດດິນ ຮຸສເຊນ ລັດຖະມົນຕີປ້ອງກັນປະເທດມາເລເຊຍ ກ່າວຕໍ່ຜູ້ເຂົ້າຮ່ວມການເຈລະຈາແຊງກຣີ-ລາ ເຊິ່ງເປັນກອງປະຊຸມຄວາມໝັ້ນຄົງໃນອາຊີ ຢູ່ສິງກະໂປວ່າ: ການຮ່ວມກັນລາດຕະເວນທາງທະເລໃນຊ່ອງແຄບຊູລູ ເຊິ່ງເປັນຊາຍແດນຂອງທັງສາມປະເທດຈະເລີ່ມຂຶ້ນໃນວັນທີ 19 ມິຖຸນານີ້, ສ່ວນການຮ່ວມກັນລາດຕະເວນທາງອາກາດຈະມີຂຶ້ນຫລັງຈາກນັ້ນ. ຜ່ານມາທັງສາມປະເທດເຄີຍຮ່ວມກັນລາດຕະເວນສະກັດກັ້ນໂຈນສະລັດໃນຊ່ອງແຄບມະລະກາສຳເລັດມາແລ້ວ. ລັດຖະມົນຕີປ້ອງກັນປະເທດມາເລເຊຍເຕືອນວ່າ: ຄວນລະວັງອັນຕະລາຍຈາກນັກຮົບ IS ທີ່ຈະກັບມາອາຊີຕາເວັນອອກສຽງໃຕ້ ເນື່ອງຈາກກຸ່ມ IS ຢູ່ຊີຣີ ແລະ ອີຣັກກຳລັງສູນເສຍດິນແດນ ລວມທັງໄພຈາກນັກຮົບຫົວຮຸນແຮງທີ່ສຶກສາ ແລະ ກໍ່ເຫດຕາມລຳພັງ. ໄພເຫລົ່ານີ້ເປັນເລື່ອງຈິງ ແລະ ມີຫລາກຫລາຍແງ່ມຸມ.
+ ຟີລິບປິນຖະຫລົ່ມຜິດເຮັດໃຫ້ທະຫານຕາຍ ຄິດວ່າເປັນກຸ່ມຕິດອາວຸດທາງໃຕ້
+ ທະຫານຟີລິບປິນປະທະກຸ່ມຕິດອາວຸດຢູ່ມາຣາລີ ເສຍຊີວິດເກືອບ 20 ຄົນ
+ ກຸ່ມກໍ່ການຮ້າຍຂ້າຕັດຫົວຫົວໜ້າຕຳຫລວດ ຢູ່ເມືອງທາງພາກໃຕ້ຂອງຟີລິບປິນ
ນັກວິເຄາະດ້ານຄວາມໝັ້ນຄົງເບິ່ງວ່າ: ກຸ່ມ IS ຄິດຍຶດພື້ນທີ່ຢູ່ເກາະມິນດາເນົາຂອງຟີລິບປິນ ເພື່ອສ້າງການປົກຄອງແບບກາຫລິບຂຶ້ນໃນອາຊີຕາເວັນອອກສຽງໃຕ້ ເນື່ອງຈາກເກາະມິນດາເນົາເປັນພື້ນທີ່ທີ່ກົດໝາຍເຂົ້າໄປບໍ່ຮອດ ແລະ ມີກຸ່ມຕິດອາວຸດຫລາຍກຸ່ມປະກາດຕົວພັກດີຕໍ່ IS ແລ້ວ, ສ່ວນການຮ່ວມມືລາດຕະເວນຊາຍແດນຂອງມາເລເຊຍ, ອິນໂດເນເຊຍ ແລະ ຟີລິບປິນມີອຸປະສັກຈາກກໍລະນີທັງສາມປະເທດອ້ອມຮອບໄປດ້ວຍນ່ານນ້ຳ, ການສະກັດກັ້ນການເຄື່ອນໄຫວຂອງກຸ່ມ IS ທີ່ຈະແຊກຊຶມເຂົ້າອອກຊາຍແດນຂອງປະເທດເຫລົ່ານີ້ຈຶ່ງເຮັດໄດ້ຍາກ.
