ຟີລິບປິນຖະຫລົ່ມຜິດເຮັດໃຫ້ທະຫານຕາຍ ຄິດວ່າເປັນກຸ່ມຕິດອາວຸດທາງໃຕ້
ມານີລາ 1 ມິຖຸນາ: ກອງທັບຟີລິບປິນໃຊ້ປະຕິບັດການໂຈມຕີທາງອາກາດຫວັງຖະຫລົ່ມກຸ່ມຕິດອາວຸດຢູ່ເມືອງມາຣາວີ ທາງໃຕ້ຂອງປະເທດ, ແຕ່ເກີດຄວາມເຂົ້າໃຈຜິດເຮັດໃຫ້ທະຫານເສຍຊີວິດ ແລະ ບາດເຈັບຈຳນວນໜຶ່ງ.
+ ດູເຕີເຕ ເຜີຍອາດໃຊ້ກົດໄອຍະການເສິກຢູ່ພາກໃຕ້ເປັນເວລາ 1 ປີ
+ ກອງທັບຟີລິບປິນຕັ້ງເປົ້າຍຶດຄືນມາຣາວີ
+ ຟີລິບປິນຂໍໃຫ້ກຸ່ມຕິດອາວຸດຍອມເສຍໄຊເພື່ອຫລຸດການສູນເສຍ
ພົນຕີ ເດລຟິນ ໂລເຣນຊານາ ລັດຖະມົນຕີປ້ອງກັນປະເທດຟີລິບປິນ ກ່າວກັບນັກຂ່າວຢູ່ນະຄອນຫລວງມະນີລາ ໃນວັນທີ 1 ມິຖຸນານີ້ວ່າ: ທະຫານກຸ່ມໜຶ່ງຕົກເປັນເປົ້າໂຈມຕີທາງອາກາດຂອງກອງທັບໃນວັນທີ 31 ພຶດສະພາແລ້ວນີ້ ມີທະຫານເສຍຊີວິດ 10 ຄົນ ເປັນເລື່ອງໜ້າເສົ້າທີ່ເກີດຂຶ້ນໄດ້ໃນຍາມສົງຄາມ ເມື່ອການປະສານງານບໍ່ຖືກຕ້ອງ. ຈາກນັ້ນໄດ້ສົ່ງຂໍ້ຄວາມສັ້ນແຈ້ງນັກຂ່າວໃນເວລາຕໍ່ມາວ່າ: ມີທະຫານບາດເຈັບຈາກເຫດການນີ້ອີກ 7 ຄົນ.
ກອງທັບຟີລິບປິນໃຊ້ເຮືອບິນເຮລິກົບແຕໂຈມຕີຖິ້ມລະເບີດ ແລະ ຍິງຈະຫລວດຖະຫລົ່ມກຸ່ມຕິດອາວຸດທີ່ລີ້ຊ້ອນຢູ່ຕາມເຮືອນປະຊາຊົນ ໂດຍຢືນຢັນວ່າເປັນປະຕິບັດການທີ່ແນ່ນອນ ແລະ ເດັດຂາດ, ພ້ອມກັບຮັບຮອງວ່າຈະບໍ່ເຮັດໃຫ້ປະຊາຊົນ ຫລື ຕົວປະກັນໄດ້ຮັບອັນຕະລາຍ. ກອງທັບຖະແຫລງໃນວັນທີ 31 ພຶດສະພາແລ້ວນີ້ວ່າ: ສັງຫານກຸ່ມຕິດອາວຸດໄດ້ 89 ຄົນ ແລະ ມີປະຊາຊົນຖືກກຸ່ມຕິດອາວຸດສັງຫານ 19 ຄົນ.
ກຸ່ມຕິດອາວຸດບຸກຍຶດເມືອງມາຣາວີທີ່ມີປະຊາກອນ 200.000 ຄົນ ນັບແຕ່ວັນທີ 23 ພຶດສະພາແລ້ວນີ້ ແລະ ຈັບບາງສ່ວນໄວ້ເປັນຕົວປະກັນ ເພື່ອຕອບໂຕ້ທີ່ຖືກກອງທັບບຸກຈັບແກນນຳ. ປະທານາທິບໍດີ ໂຣດຣິໂກ ດູເຕີເຕ ປະກາດກົດໄອຍະການເສິກທົ່ວເກາະມິນດາເນົາໃນວັນດັ່ງກ່າວ. ທາງການທ້ອງຖິ່ນເປີດເຜີຍວ່າ: ຍັງມີປະຊາຊົນຄົງຄ້າງຢູ່ໃນພື້ນທີ່ 2.000 ຄົນ, ຂະນະທີ່ຄະນະກຳມະການກາແດງສາກົນຮຽກຮ້ອງໃຫ້ຢຸດຍິງ ເພື່ອໃຫ້ປະຊາຊົນໄດ້ອົບພະຍົບອອກມາ.
