ປາກະຊັງນໍ້າຂອງຕາຍບໍ່ໄດ້ເກີດຈາກສານພິດ

ສະພາບປາກະຊັງນໍ້າຂອງ ຢູ່ບ້ານ ຫາດດອກແກ້ວ ເມືອງຫາດຊາຍຟອງ ນະຄອນຫຼວງວຽງຈັນ, ຕາຍເປັນຈໍານວນຫຼາຍ ເມື່ອມໍ່ໆມານີ້ ບໍ່ໄດ້ເກີດຈາກສານຜິດໃດໆ ນີ້ແມ່ນຄໍາຢືນຢັນຈາກ ຫ້ອງການກະສິກໍາລ້ຽງສັດ ແລະການປະມົງ ເມືອງ ຫາດຊາຍຟອງ ນະຄອນຫຼວງວຽງຈັນ ໄດ້ລົງໄປຕິດຕາມຢ່າງໃກ້ຊິດ ແລະໄດ້ເກັບເອົາຕົວຢ່າງຂອງນໍ້າ ແລະປາດັ່ງກ່າວໄປວິເຄາະ ແລະຮູ້ວ່າບໍ່ໄດ້ເກີດຈາກສານຜິດໃດໆ, ຊຶ່ງສາເຫດຕົ້ນຕໍແມ່ນ ເກີດຈາກສະພາບແວດລ້ອມຂອງນໍ້າຂຸ່ນ, ເປື້ອນ ເຮັດໃຫ້ປາຂາດອົກຊີ, ໃນຄະນະທີ່ກະຊັງລ້ຽງປາມີຄວາມແອອັດ ແລະລ້ຽງເກີນກໍານົດເວລາເຮັດໃຫ້ປາ ມີຂະໜາດໂຕໃຫຍ່ຫຼາຍ.

ທ່ານ ຈັດ ຂັນຈະເລີນ ຜູ້ປະກອບການລ້ຽງປາກະຊັງ ຢູ່ບ້ານດັ່ງກ່າວ ໄດ້ໃຫ້ສໍາພາດຕໍ່ນັກຂ່າວ ສໍານັກຂ່າວສານປະເທດລາວ ໃນວັນທີ 6 ມິຖຸນາ ນີ້ວ່າ: ສະພາບປາກະຊັງນໍ້າຂອງຕາຍ ໄດ້ເກີດຂຶ້ນເມື່ອທ້າຍເດືອນພຶດສະພາ, ຍ້ອນມີຝົນຕົກໜັກ ເຮັດໃຫ້ສະພາບຂອງນໍ້າຂຸ່ນ, ເປື້ອນ ສົ່ງຜົນໃຫ້ປາຂາດອົກຊີຕາຍ ໂດຍສະເລ່ຍມື້ໜຶ່ງ ມີປາຕາຍປະມານ 300-400 ກິໂລຕໍ່ກະຊັງ, ສ່ວນກະຊັງປານ້ອຍແມ່ນບໍ່ໄດ້ຮັບຜົນກະທົບແຕ່ຢ່າງໃດ ແລະບໍ່ພຽງແຕ່ສ້າງຄວາມເສຍຫາຍໃນຜູ້ລ້ຽງເທົ່ານັ້ນ ສະພາບດັ່ງກ່າວຍັງສົ່ງຜົນໃຫ້ລາຄາປາກະຊັງຕົກລົງ ຈາກ 14-15 ພັນ ໃນເມື່ອກ່ອນມາເປັນ 9-10 ພັນ ກີບ/ກິໂລ ໃນປັດຈຸບັນ ແລະທ່ານ ຈັດ ຂັນຈະເລີນ ກໍມີຂໍ້ສະເໜີໃຫ້ມີພາກລັດ ເຂົ້າຄຸ້ມຄອງຈັດລະບຽບການລ້ຽງ ແລະເນັ້ນຄືນການອະນຸຍາດໃຫ້ຄົນຕ່າງປະເທດເຂົ້າມາລ້ຽງປາກະຊັງແຂ່ງກັບຄົນລາວເຮົາຈະດີບໍ? ໃນຄະນະນີ້ ພາກເອກະຊົນລາວເຮົາຍັງຂາດຄວາມຮູ້ ແລະເຕັກນິກຫຼາຍຢ່າງຈາກການລ້ຽງປາດັ່ງກ່າວ.