ຍອດຜູ້ເສຍຊີວິດເຄິ່ງຮ້ອຍ ຈາກນ້ຳຖ້ວມໜັກຢູ່ເນປານ
ຈຳນວນຜູ້ເສຍຊີວິດຈາກອຸທົກກະໄພຄັ້ງໃຫຍ່ຢູ່ເນປານທີ່ເກີດຂຶ້ນໃນອາທິດຜ່ານມາ ເພີ່ມຂຶ້ນຢ່າງຕໍ່ເນື່ອງເປັນປະມານ 50 ຄົນແລ້ວ ໂດຍພື້ນທີ່ທາງຕອນໃຕ້ຂອງປະເທດໄດ້ຮັບຜົນກະທົບຫລາຍທີ່ສຸດ.
ສຳນັກຂ່າວຕ່າງປະເທດລາຍງານຈາກນະຄອນຫລວງກາມານທຸ ປະເທດເນປານ ໃນວັນທີ 14 ສິງຫາວ່າ: ສູນບໍລິຫານແກ້ໄຂໄພພິບັດສຸກເສີນແຫ່ງຊາດຂອງເນປານລາຍງານໃນວັນທີ 13 ສິງຫາວ່າ: ສະຖານະການອຸທົກກະໄພຄັ້ງໃຫຍ່ທີ່ສ້າງຄວາມເສຍຫາຍໃຫ້ແກ່ພື້ນທີ່ສ່ວນຫລາຍໃນປະເທດນັບແຕ່ອາທິດຜ່ານມາ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 49 ຄົນ ແລະ ປະຊາຊົນອີກຫລາຍກວ່າ 31.000 ຄົນບໍ່ມີບ່ອນຢູ່ອາໄສ ສ່ວນຫລາຍເປັນປະຊາຊົນທີ່ອາໄສຢູ່ໃນບໍລິເວນທາງຕອນໃຕ້. ເຖິງຢ່າງໃດກໍຕາມ, ກາແດງຂອງເນປານລາຍງານຈຳນວນຜູ້ເສຍຊີວິດສູງກວ່າຄືຢ່າງໜ້ອຍ 53 ຄົນ ແລະ ປະຊາຊົນໄດ້ຮັບຄວາມເດືອດຮ້ອນຫລາຍກວ່າ 100.000 ຄົນ, ອີກທັງເຮືອນຫລາຍພັນຫລັງຕ້ອງຈົມຢູ່ໃຕ້ລະດັບນ້ຳທີ່ສູງເຖິງ 2 ແມັດ.
+ ດິນເຈື່ອນຢູ່ຈີນ ມີຜູ້ເສຍຊີວິດ 8 ຄົນ ສູນຫາຍ 17 ຄົນ
+ ເກີດເຫດດິນເຈື່ອນຢູ່ໂກລົມບີ ມີຜູ້ເສຍຊີວິດກວ່າ 17 ຄົນ
ໃນເວລາດຽວກັນ, ນາຍົກລັດຖະມົນຕີ ນາເຣນທຣາ ໂມດີ ສະແດງຄວາມເສຍໃຈຢ່າງສຸດຊຶ້ງຕໍ່ເຫດດິນເຈື່ອນລົງມາທັບລົດເມໂດຍສານເຊິ່ງພວມຈອດຢູ່ບໍລິເວນທາງຫລວງເສັ້ນໜຶ່ງໃກ້ກັບເມືອງສິມາລາ ເມືອງເອກຂອງລັດອິມາຈັດປະເທດ ຢູ່ທາງຕອນເໜືອ ໃນຄືນວັນທີ 12 ສິງຫາຕາມເວລາທ້ອງຖິ່ນ ສົ່ງຜົນໃຫ້ລົດເມຄັນດັ່ງກ່າວຕົກເຫວເລິກ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 45 ຄົນ ໂດຍສາເຫດຂອງການເກີດດິນເຈື່ອນມາຈາກສະພາບອາກາດໃນລະດູມໍລະສຸມເຊັ່ນກັນ ເຊິ່ງຄວບຄຸມລະຫວ່າງເດືອນມິຖຸນາຫາເດືອນສິງຫາຂອງທຸກປີໃນພາກພື້ນອາຊີໃຕ້.
