ຊາວ ສ.ເກົາຫລີ ຢາກໃຫ້ຜູ້ນຳຄົນໃໝ່ຈ້າງວຽກເພີ່ມ ແລະ ຫລຸດສຸຈະລິດ
ເຊອຸນ 7 ພຶດສະພາ: ບັນດາຜູ້ສະໝັກຊິງຕຳແໜ່ງປະທານາທິບໍດີ ສ.ເກົາຫລີ ພະຍາຍາມບັນເທົາກະແສຄວາມບໍ່ພໍໃຈຂອງປະຊາຊົນທີ່ມີຕໍ່ອັດຕາການວ່າງວຽກໃນກຸ່ມໄວໜຸ່ມ ແລະ ບັນຫາສໍ້ລາດບັງຫລວງ, ແຕ່ຍັງບໍ່ມີນະໂຍບາຍເປັນຮູບປະທຳທີ່ໜ້າສົນໃຈຢ່າງຈະແຈ້ງ.
ປະຊາຊົນຕ້ອງການໃຫ້ເກີດການປ່ຽນແປງລະບົບເສດຖະກິດຢ່າງຫລວງຫລາຍ ເນື່ອງຈາກການເຕີບໃຫຍ່ ແລະ ຄວາມໝັ້ນຄົງຍັງຢູ່ໃນມືຂອງກຸ່ມທຸລະກິດຄອບຄົວຕະກູນໃຫຍ່ຜູ້ຊົງອິດທິພົນຢູ່ ສ.ເກົາຫລີ ທີ່ເອີ້ນວ່າແຊບອລ. ພາຍຫລັງຄວາມບໍ່ພໃຈທີ່ມີຕໍ່ຂໍ້ກ່າວຫາວ່າກຸ່ມທຸລະກິດໃຫຍ່ ແລະ ລັດຖະບານຮ່ວມຄິດກັນເຮັດໃຫ້ເກີດການປະທ້ວງທົ່ວປະເທດ ຈົນສົ່ງຜົນໃຫ້ທ່ານນາງ ປັກກິນເຮ ຕ້ອງອອກຈາກຕຳແໜ່ງປະທານາທິບໍດີ ແລະ ຈັບກຸມຜູ້ບໍລິຫານບໍລິສັດຊຳຊຸງຈົນກາຍເປັນຄະດີດັງ. ທ່ານ ມຸນ ແຈອິນ ຜູ້ສະໝັກຄາດວ່າຈະເປັນປະທານາທິບໍດີ ສ.ເກົາຫລີ ໝັ້ນໃຈວ່າ: ລັດຖະບານຈະສາມາດຈ້າງວຽກເພີ່ມໄດ້, ສ່ວນທ່ານ ອັນ ຊອລຊູ ຄູ່ແຂ່ງຄົນສຳຄັນບອກວ່າ: ລັດຖະບານບໍ່ຄວນເຂົ້າໄປກ່ຽວຂ້ອງກັບພາກເອກະຊົນ.
