ຈຳນວນຜູ້ເສຍຊີວິດຈາກພະຍາດ ໄຂ້ຫວັດໃຫຍ່ສາຍພັນໃໝ່ ຢູ່ມຽນມາເພີ່ມເປັນ 10 ຄົນ
ສຳນັກຂ່າວມຽນມາລາຍງານໃນວັນທີ 31 ກໍລະກົດແລ້ວນີ້ວ່າ: ພົບຜູ້ເສຍຊີວິດຈາກການຕິດເຊື້ອໄວຣັດໄຂ້ຫວັດໃຫຍ່ສາຍພັນໃໝ່ຊະນິດ A (H1N1) 2009 ເພີ່ມອີກ 3 ຄົນຢູ່ເຂດຢາງກຸ້ງ ສົ່ງຜົນໃຫ້ຈຳນວນຜູ້ເສຍຊີວິດເພີ່ມຂຶ້ນເປັນ 10 ຄົນແລ້ວ ນັບແຕ່ເຊື້ອໄວຣັດແຜ່ລະບາດ.
ລາຍງານລະບຸວ່າ: ປັດຈຸບັນມີຄົນເຈັບທີ່ສົງໄສວ່າຈະຕິດເຊື້ອໄຂ້ຫວັດໃຫຍ່ສາຍພັນດັ່ງກ່າວແລ້ວທັງໝົດ 44 ຄົນ, ສ່ວນພະແນກຄວບຄຸມພະຍາດຕິດຕໍ່ຂອງກະຊວງສາທາລະນະສຸກ ແລະ ກິລາມຽນມາອອກໂປຣແກຣມອ້າງອີງຜົນວິເຄາະການຕິດເຊື້ອ ແລະ ໂອກາດການຕິດເຊື້ອຈາກຜູ້ຊ່ຽວຊານ. ຂະນະທີ່ກະຊວງດັ່ງກ່າວຂໍໃຫ້ປະຕິບັດຕາມຄຳແນະນຳ ແລະ ຕິດຕາມຄຳປະກາດຈາກກະຊວງຢ່າງເຂັ້ມງວດ ເພື່ອຫລຸດຈຳນວນຜູ້ຕິດເຊື້ອ.
ນອກຈາກນີ້, ທາງການຍັງໄດ້ປະກາດເລື່ອນການຈັດງານເທດສະການບູຊານັດ ເຊິ່ງມີກຳນົດຈັດຂຶ້ນໃນເຂດມັນທະເລລະຫວ່າງວັນທີ 31 ກໍລະກົດຫາວັນທີ 7 ສິງຫານີ້ ໄປຈົນກວ່າຈະສາມາດຄວບຄຸມການແຜ່ລະບາດຂອງໄຂ້ຫວັດໃຫຍ່ໄດ້ ເນື່ອງຈາກເທດສະການດັ່ງກ່າວຈະມີຄົນມາລວມກັນເປັນຈຳນວນຫລາຍ. ຂະນະທີ່ເຊື້ອໄວຣັດສາມາດແຜ່ກະຈາຍໄດ້ຢ່າງວ່ອງໄວຈາກຄົນສູ່ຄົນ.
ໃນເວລາດຽວກັນ, ກົມລ້ຽງສັດຂອງມຽນມາລາຍງານການຂ້າໄກ່ຫລາຍກວ່າ 1.800 ໂຕ ຈາກຟາມຫລາຍແຫ່ງໃນພື້ນທີ່ທາງຕອນໃຕ້ຂອງປະເທດ, ພາຍຫລັງພົບການແຜ່ລະບາດຂອງເຊື້ອໄວຣັດໄຂ້ຫວັດສັດປີກສາຍພັນ H5N1 ຢູ່ຟາມແຫ່ງໜຶ່ງໃນເມືອງທວາຍ ທາງຕາເວັນອອກສຽງໃຕ້ຂອງປະເທດ ໃນເດືອນຜ່ານມາ.
