ຂາຍເຄື່ອງກອງບຸນກໍລ້ຽງຊີບໄດ້
ປ້າຄໍາຜັນເປັນຄົນມັກເຂົ້າວັດເຂົ້າວາເຮັດບຸນສິນກິນທານຕາມຮີດຄອງປະເພນີຂອງຊາວພຸດລາວເຮົາມາຕັ້ງແຕ່ຍັງເຍົາໄວ, ຍ້ອນວ່າພໍ່-ແມ່ເພິ່ນພາເຮັດຈຶ່ງ ເຮັດໃຫ້ຈິດໃຈຂອງປ້າຄໍາຜັນມີຄວາມຜູກພັນ ຢູ່ກັບວັດ ວາອາຮາມຕະຫຼອດມາ, ຈົນກະທັ້ງ ໄດ້ ມາສ້າງ ຄອບຄົວກໍຍັງໄດ້ພາລູກພາຫຼານສືບຕໍ່ເຂົ້າວັດຟັງທໍາ ຕັກບາດຢາດນໍ້າຄໍ້າຈັງຫັນເພື່ອ ອຸປະຖໍາຄໍ້າຊູພະພຸດທະສາສະໜາ, ຊຸກຍູ້ລູກຫຼານນັບຖືສິນຫ້າ ແລະ ພ້ອມກັນງົດເຫຼົ້າເຂົ້າພັນສາທຸກໆປີ.
ປັດຈຸບັນ, ປ້າຄໍາຜັນຢູ່ບ້ານ ໜອງສ້າງທໍ່, ເມືອງໄຊເຊດຖາ, ນະຄອນຫຼວງວຽງຈັນ ເຖິງແມ່ນ ອາຍຸຂອງເພີ່ມ ກ້າວເຂົ້າ 70 ປີ ແລ້ວກໍຕາມ, ແຕ່ສຸຂະພາບທາງ ຈິດໃຈ ແລະ ຮ່າງກາຍຍັງຄົງເຂັ້ມ ແຂງພໍໃນການປະກອບອາ ຊີບຂອງເພິ່ນດ້ວຍການເຮັດກອງບຸນຂາຍແບບທຸລະກິດຄອບຄົວ, ເຊິ່ງແຕ່ລະມື້ກໍຈະມີລູກຄ້າ ແລະ ຂາປະຈໍາມາ ຊື້ເຄື່ອງກອງບຸນຢູ່ ຮ້ານເປັນປະຈໍາ. ປ້າຄໍາຜັນໄດ້ ເລົ່າໃຫ້ຟັງວ່າ: ການເຮັດອາຊີບ ຂາຍເຄື່ອງກອງບຸນ ໄດ້ດໍາເນີນ ມາເປັນເວລາ 40ກວ່າປີແລ້ວ ເຊິ່ງໄດ້ເລີ່ມເຮັດແຕ່ປີ 1981 ເປັນ ຕົ້ນມາ. ການທີ່ໄດ້ຢຶດຖືເອົາອາ ຊີບນີ້ເປັນ ຫຼັກກໍຍ້ອນວ່າຕົນເອງ ໄດ້ໃຊ້ຊີວິດຢູ່ກັບການເຮັດບຸນ ສິນກິນທານໂດຍຕະຫຼອດມາ ແລະ ອີກຢ່າງໜຶ່ງ ສໍາລັບຄົນ ລາວ ຊາວພຸດເຮົາແລ້ວມັກຈະ ເຮັດບຸນສິນກິນທານຕາມປົກ ກະຕິ ຈຶ່ງເຮັດໃຫ້ເຄື່ອງກອງບຸນ ໄດ້ຂາຍດີເຊັ່ນ ດຽວກັນ ຈົນກາຍ ເປັນທຸລະກິດທີ່ດີ ແລະ ສາມາດ ສ້າງ ລາຍຮັບມາສູ່ຄອບຄົວ ໄດ້ຢ່າງໜ້າເພິງພໍໃຈ ເຮັດໃຫ້ຊີ ວິດການເປັນຢູ່ຂອງຄອບຄົວດີຂຶ້ນເລື້ອຍໆ.
ປ້າຄໍາຜັນຍັງໄດ້ໃຫ້ຮູ້ຕື່ມ ວ່າ: ອາຊີບເຮັດເຄື່ອງກອງບຸນ ຂາຍເປັນອາຊີບທີ່ເບົາ, ບໍ່ໄດ້ນໍາ ໃຊ້ແຮງງານ ຫຼາຍພໍປານໃດເຊິ່ງມີແຮງງານພຽງສາມແຮງງານ, ເປັນວຽກທີ່ສະອາດສາມາດເຮັດຢູ່ໃນຮົ່ມ, ນໍາໃຊ້ຕົ້ນທຶືນບໍ່ຫຼາຍ ແຕ່ອາໃສສີມືທາງການຊ່າງມາປະດິດຄິດແຕ່ງໃຫ້ມີສີສັນ ແລະ ໂດດເດັ່ນໄປຕາມຄ່ານິຍົມຂອງສັງຄົມ ແລະ ໄປ ຕາມຮີດຄອງ ປະເພນີທາງພະພຸດທະສາດ ສະໜາທີ່ເຄີຍປະຕິບັດຜ່ານມາ ເຊິ່ງແຕ່ລະປີກໍໄດ້ມີການປັບປຸງ ແລະ ພັດທະນາທາງດ້ານສີ ມືແຮງງານ ແລະ ຮູບແບບໃນ ການ ຜະລິດໃຫ້ໄປຕາມຍຸກຕາມ ສະໄໝເລື້ອຍໆ ຈຶ່ງສາມາດດໍາເນີນກິດຈະການດັ່ງກ່າວມາຮອດຍຸກປັດຈຸບັນ ເຊິ່ງແຕ່ລະ ມື້ສາມາດສ້າງລາຍຮັບມາ ໃຫ້ຄອບຄົວໄດ້ປະມານ 7-8 ແສນກີບ .
ປ້າຄໍາຜັນ ເປັນຜູ້ທີ່ມີຄວາມອົດທົນພາກພຽນຮຽນຮູ້ເອົາວິ ຊາອາຊີບດັ່ງກ່າວຈາກພໍ່-ແມ່, ບັນພະບູລຸດຄົນບູຮານ ແລະ ກໍ ໄດ້ສືບຕໍ່ມາຮອດປະຈຸບັນຈົນ ກາຍເປັນທຸລະກິດທີ່ໂດດເດັ່ນ, ສາມາດພັດທະນາຄອບຄົວໃຫ້ ຫຼຸດພົ້ນຈາກ ຄວາມທຸກຍາກເທື່ອລະກ້າວ ແລະ ກາຍເປັນ ຄອບຄົວຕົວແບບດ້ານຜະລິດຕະພັນ ປະຈໍາບ້ານໜອງສ້າງທໍ່, ເມືອງໄຊເຊດຖາ, ນະຄອນຫຼວງວຽງຈັນ.
