ກຸ່ມກໍ່ການຮ້າຍຂ້າຕັດຫົວຫົວໜ້າຕຳຫລວດ ຢູ່ເມືອງທາງພາກໃຕ້ຂອງຟີລິບປິນ
ກຸ່ມກໍ່ການຮ້າຍຂ້າຕັດຫົວຫົວໜ້າສະຖານີຕຳຫລວດຢູ່ເມືອງທາງພາກໃຕ້ຂອງຟີລິບປິນ ໃກ້ເມືອງມາຣາວີທີ່ກຸ່ມຕິດອາວຸດບຸກຍຶດ ແລະ ຂູ່ຈະຂ້າຕົວປະກັນຢູ່ໂບດຄຣິສ, ຂະນະທີ່ປະທານາທິບໍດີ ໂຣດຣິໂກ ດູເຕີເຕ ກ່າວວ່າ: ອາດຂະຫຍາຍພື້ນທີ່ປະກາດກົດໄອຍະການເສິກໄປທົ່ວປະເທດ.
ສຳນັກຂ່າວ AFP ລາຍງານຈາກນະຄອນຫລວງມະນິລາ ປະເທດຟີລິບປິນ ໃນວັນທີ 24 ພຶດສະພານີ້ວ່າ: ປະທານາທິບໍດີ ໂຣດຣິໂກ ດູເຕີເຕ ຜູ້ນຳຟີລິບປິນ ກ່າວຕໍ່ສື່ມວນຊົນພາຍຫລັງຮັບຮູ້ລາຍງານໃນວັນທີ 24 ພຶດສະພາວ່າ: ຫົວໜ້າສະຖານີຕຳຫລວດເມືອງມາລາບັງ ໃກ້ເມືອງມາຣາວີ ຢູ່ເກາະມິນດາເນົາທາງພາກໃຕ້ ຖືກກຸ່ມກໍ່ການຮ້າຍຂ້າຕັດຫົວ ໂດຍເຫດເກີດຂະນະທີ່ຕຳຫລວດຄົນດັ່ງກ່າວພວມເດີນທາງເມືອເຮືອນ ພົບກຸ່ມຄົນຮ້າຍຕັ້ງດ່ານຢູ່ຖະໜົນ ແລະ ຖືກຄົນຮ້າຍບັງຄັບໃຫ້ລົງຈາກລົດ ກ່ອນຈະຂ້າ ແລະ ຕັດຫົວ.
ທ່ານ ດູເຕີເຕ ກ່າວອີກວ່າ: ກຸ່ມຕິດອາວຸດທີ່ບຸກຍຶດເມືອງມາຣາວີແຕ່ວັນທີ 23 ພຶດສະພາ ແລະ ຈັບກຸມຕົວປະກັນທີ່ເດີນທາງໄປເຮັດພິທີທາງສາສະໜາຢູ່ໂບດທັງໝົດ 14 ຄົນ ຂູ່ຈະສັງຫານຕົວປະກັນກຸ່ມນີ້ ຖ້າທະຫານກອງທັບລັດຖະບານບຸກໂຈມຕີພວກເຂົາ ແລະ ກອງທັບບໍ່ຖອນກຳລັງທະຫານອອກຈາກເມືອງມາຣາວີ. ທ່ານ ດູເຕີເຕ ກ່າວວ່າ: ທ່ານພວມພິຈາລະນາຂະຫຍາຍພື້ນທີ່ປະກາດກົດໄອຍະການເສິກ ຈາກເກາະມິນດາເນົາທີ່ຄວບຄຸມປະຊາຊົນປະມານ 20 ລ້ານຄົນ ໄປທົ່ວປະເທດ ຖ້າໄພຄຸກຄາມຈາກກຸ່ມຫົວຮຸນແຮງແຜ່ຂະຫຍາຍ ເພ່ອເປັນການປົກປ້ອງປະຊາຊົນ.
