ກະຊວງການເງິນຈະເຂັ້ມງວດກວດກາພະນັກງານໃນຂະແໜງຕົນ

ພາຍຫລັງມີຄໍາຖາມຈາກສັງຄົມວ່າ: ກະຊວງການເງິນຈະມີວິທີການແນວໃດ ເພື່ອແກ້ໄຂບັນຫາພະນັກງານທີ່ມີທັດສະນະແນວຄິດການເມືອງບໍ່ໜັກແໜ້ນໃນການປະຕິບັດໜ້າທີ່ ແລະ ສະພາບການສໍ້ລາດບັງຫລວງຈໍານວນຫລາຍ? ຕໍ່ບັນຫານີ້ກະຊວງດັ່ງກ່າວໄດ້ຢືນຢັນວ່າ: ກ່ອນອື່ນແມ່ນສຸມໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນເປັນປະຈຳ, ໂດຍການນຳເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ມູນເຊື້ອອັນດີງາມຂອງບັນດາຜູ້ນຳມາເຜີຍແຜ່ແນະນຳໃຫ້ພະນັກງານ-ລັດຖະກອນຮັບຮູ້ເຊື່ອມຊຶມ, ພ້ອມທັງຖືເອົາການຮ່ວມຊີວິດປະຈຳເດືອນຂອງຮາກຖານພັກ ແລະ ກົມເປັນບ່ອນສຶກສາອົບຮົມ ແລະ ຕຳນິສົ່ງຂ່າວເຊິ່ງກັນ ແລະ ກັນ, ພ້ອມທັງແກ້ໄຂບັນດາກະແສແນວຄິດທີ່ບໍ່ຖືກຕ້ອງໃຫ້ທັນການ, ເພີ່ມທະວີຄວາມເປັນແບບຢ່າງຂອງພະນັກງານນຳພາແຕ່ລະຂັ້ນ, ແຕ່ສູນກາງລົງຮອດທ້ອງຖິ່ນ ເພື່ອອັດຊ່ອງຫວ່າງການຮົ່ວໄຫລ, ສະກັດກັ້ນການສໍ້ລາດບັງຫລວງ ແລະ ສະພາບການສວຍໂອກາດຕ່າງໆ ດ້ວຍການປັບປຸງກົນໄກວິທີເຮັດວຽກ ແລະ ນຳໃຊ້ເຕັກໂນໂລຊີ, ການປະຕິບັດລະບຽບວິໄນໃຫ້ເຄັ່ງຄັດ, ເດັດຂາດ ແລະ ແກ້ໄຂປະກົດການຫຍໍ້ທໍ້ຕ່າງໆໃຫ້ໝົດໄປ, ເອົາໃຈໃສ່ຊຸກຍູ້ສົ່ງເສີມພະນັກງານຜູ້ທີ່ດີເດັ່ນ, ມີຄວາມຫ້າວຫັນປະຕິບັດວຽກງານ ແລະ ຕິດຕາມກວດກາການເຄື່ອນໄຫວຂອງພະນັກງານ-ລັດຖະກອນທີ່ຢູ່ໃນຄວາມຮັບຜິດຊອບຂອງຕົນໃຫ້ເປັນປົກກະຕິຕໍ່ເນື່ອງ ແລະ ເມື່ອພົບເຫັນພະນັກງານ-ລັດຖະກອນຂາດຕົກບົກພ່ອງຕ້ອງໃຊ້ 3 ມາດຕະການຄື: ສຶກສາອົບຮົມ, ບໍລິຫານ ແລະ ປະຕິບັດລະບຽບວິໄນຢ່າງເຂັ້ມງວດ, ສືບຕໍ່ປັບປຸງລະບຽບການຄຸ້ມຄອງພະນັກງານ-ລັດຖະກອນສະເພາະຂະແໜງການເງິນໃຫ້ຄົບຖ້ວນ ແລະ ຊັດເຈນຢູ່ໃນແຕ່ລະຂົງເຂດວຽກງານ ແລະ ເຂັ້ມງວດປະຕິບັດລະບຽບກົດໝາຍທີ່ມີ, ສືບຕໍ່ກຳນົດຕຳແໜ່ງງານໃຫ້ຊັດເຈນແທດເໝາະກັບວຽກຕົວຈິງ, ໂດຍສະເພາະແມ່ນຈະເລັ່ງໃສ່ຂະແໜງສາຍຕັ້ງພາສີ, ອາກອນ ແລະ ຄັງເງິນ, ບັນຫາສໍາຄັນພະນັກງານຂະແໜງການເງິນທຸກຄົນຕ້ອງປະຕິບັດຕາມຂໍ້ຕົກລົງຂອງທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນວ່າດ້ວຍຂໍ້ຫ້າມ ແລະ ວິໄນຂອງພະນັກງານ-ລັດຖະກອນຂະແໜງການເງິນຢ່າງເຂັ້ມງວດ ແລະ ອີກບັນຫາໜຶ່ງທີ່ສັງຄົມສົນໃຈຫລາຍກໍຄືຍັງມີພະນັກງານສັນຍາຈ້າງເປັນຈໍານວນຫລາຍໃນຂະແໜງການເງິນນັບທັງສູນກາງ ແລະ ທ້ອງຖິ່ນ ເປັນຕົ້ນ: ຂະແໜງສ່ວຍສາອາກອນ, ພາສີ, ຄັງເງິນ ແລະ ອື່ນໆ, ຊຶ່ງເປັນສາເຫດໜຶ່ງເຮັດໃຫ້ການເກັບລາຍຮັບຮົ່ວໄຫລຈະແກ້ໄຂຄືແນວໃດ?. ກະຊວງດັ່ງກ່າວຊີ້ແຈງວ່າຕໍ່ບັນຫານີ້ແມ່ນຈະໄດ້ດຳເນີນມາດຕະການຄື:  ສືບຕໍ່ຕີລາຄາຄືນສະພາບການປະຕິບັດວຽກງານຂອງພະນັກງານດັ່ງກ່າວແຕ່ລະຄົນເພື່ອໃຫ້ເຫັນດ້ານດີ ແລະ ດ້ານອ່ອນ, ຖ້າເຫັນວ່າຜູ້ໃດບໍ່ປະຕິບັດຕາມລະບຽບກົດໝາຍ ຫລື ມີການເຄື່ອນໄຫວແບບບໍ່ເໝາະສົມກໍໃຫ້ຍົກເລີກສັນຍາທັນທີ, ນອກນີ້ກໍຈະໃຫ້ນຳໃຊ້ພະນັກງານສັນຍາຈ້າງໄປເຮັດໜ້າທີ່ແທນພະນັກງານລັດຖະກອນສົມບູນ ເຊັ່ນ: ໄປເກັບເງິນ, ກວດກາສິນຄ້າ, ຮັບຜິດຊອບຄັງເງິນ, ງົບປະມານ ແລະ ບໍ່ໃຫ້ນຸ່ງເຄື່ອງແບບຂອງຂະແໜງການເງິນຢ່າງເດັດຂາດ ແລະ ຈະບໍ່ອະນຸຍາດໃຫ້ຫ້ອງການກະຊວງ, ບັນດາກົມ ແລະ ທຽບເທົ່າ, ສະຖາບັນພັດທະນາຂໍ້ມູນຂ່າວສານການເງິນ, ສະຖາບັນເສດຖະກິດການເງິນ, ວິທະຍາໄລການເງິນພາກເໜືອ ແລະ ພາກໃຕ້, ບັນດາພະແນກການເງິນ, ພະແນກສ່ວຍສາອາກອນ, ຄັງເງິນແຫ່ງຊາດປະຈຳແຂວງ, ນະຄອນຫລວງ ແລະ ຫ້ອງການໆເງິນເມືອງ ຮັບເອົາພະນັກງານຕາມສັນຍາ ແລະ ພະນັກງານອາສາສະໝັກອີກ, ຈົນກວ່າຈະໄດ້ຮັບການອະນຸມັດຈາກລັດຖະບານ.