ກອງທັບຟີລິບປິນລະບຸໃກ້ຈະເອົາຊະນະກຸ່ມກະບົດມຸສລິມໄດ້ແລ້ວ
ມາຣາວີ 29 ພຶດສະພາ: ກອງທັບຟີລິບປິນກ່າວໃນວັນທີ 29 ພຶດສະພານີ້ວ່າ: ໃກ້ຈະຍຶດຄືນເມືອງທາງໃຕ້ຂອງປະເທດທີ່ຖືກກຸ່ມກະບົດມຸສລິມຕິດອາວຸດຍຶດໄວ້ເປັນວັນທີ 7 ໄດ້ແລ້ວ, ຂະນະທີ່ເຮລິບກົບແຕຫລາຍລຳຍັງຍິງຈະຫລວດເຂົ້າໂຈມຕີເປົ້າໝາຍ ເຊິ່ງເປັນຖານທີ່ໝັ້ນຂອງກຸ່ມກະບົດທີ່ສະແດງຕົວຈົງຮັກພັກດີຕໍ່ກຸ່ມລັດອິສລາມ ຫລື IS.
+ ກອງທັບຟີລິບປິນຕັ້ງເປົ້າຍຶດຄືນມາຣາວີ
+ ທະຫານຟີລິບປິນປະທະກຸ່ມຕິດອາວຸດຢູ່ມາຣາລີ ເສຍຊີວິດເກືອບ 20 ຄົນ
+ ກຸ່ມກໍ່ການຮ້າຍຂ້າຕັດຫົວຫົວໜ້າຕຳຫລວດ ຢູ່ເມືອງທາງພາກໃຕ້ຂອງຟີລິບປິນ
ໂຄສົກຂອງກອງທັບຟີລິບປິນກ່າວວ່າ: ຜູ້ບັນຊາການກອງກຳລັງທີ່ຢູ່ໃນພື້ນທີ່ຮັບປະກັນວ່າ: ການສູ້ຮົບຢູ່ເມືອງມາຣາວີໃກ້ຈະຢຸດລົງແລ້ວ, ກອງທັບສາມາດເຂົ້າຄວບຄຸມ ແລະ ກວດສອບຜູ້ເຂົ້າ-ອອກໃນເມືອງດັ່ງກ່າວວ່າຜູ້ໃດເປັນຜູ້ໃດ ແລະ ພວມຕັດກຳລັງ ແລະ ແຍກກຸ່ມຕໍ່ຕ້ານອອກຈາກກັນ. ກອງທັບຟີລິບປິນກ່າວວ່າ: ກຸ່ມກະບົດມໍເຕ້ ເຊິ່ງປະທະກັບທະຫານຟີລິບປິນຢູ່ເມືອງມາຣາວີ ທາງໃຕ້ຂອງປະເທດນັ້ນ ອາດຈະໄດ້ຮັບການຊ່ວຍເຫລືອຈາກກຸ່ມຜູ້ທີ່ເຫັນໃຈ ແລະ ນັກຮົບທີ່ຮ່ວມໃນການຕໍ່ສູ້ກໍເປັນນັກໂທດທີ່ທາງກຸ່ມມໍເຕ້ ປ່ອຍຕົວອອກຈາກຄຸກໃນລະຫວ່າງການປະທະກັບກອງກຳລັງລັດຖະບານ ເຊິ່ງເລີ່ມຂຶ້ນໃນວັນທີ 23 ພຶດສະພາ. ການປະທະທີ່ເກີດຂຶ້ນເຮັດໃຫ້ມີຜູ້ເສຍຊີວິດຫລາຍກວ່າ 100 ຄົນ ສ່ວນຫລາຍເປັນສະມາຊິກຂອງກຸ່ມຕິດອາວຸດ, ຂະນະທີ່ປະຊາຊົນສ່ວນຫລາຍຫລົບໜີອອກໄປນອກເມືອງແລ້ວ. ກອງທັບຟີລິບປິນກ່າວວ່າ: ກຸ່ມມໍເຕ້ຍັງຫລົງເຫລືອຢູ່ໃນທ້ອງຖິ່ນ 9 ແຫ່ງ ຈາກຈຳນວນ 96 ແຫ່ງຂອງເມືອງມາຣາວີ ທີ່ມີປະຊາກອນປະມານ 200.000 ຄົນ.
